Job sbꞌi jun libro tic, yujto a dꞌay tzꞌibꞌabꞌilcan yabꞌixal jun vin̈ scuchan Job. A vin̈aj Job chiꞌ te vachꞌ sbꞌeybꞌal vin̈, te bꞌeyum pax vin̈, man̈ jantacoc yuninal vin̈ yedꞌ yisil, nivan yelcꞌoch vin̈ dꞌa scal ebꞌ scꞌabꞌyoc. Palta axo ix aji, ix javi juntzan̈ nivac yaelal dꞌa yibꞌan̈ vin̈. Junn̈ej cꞌual ix lajviel masanil tastac ay dꞌa vin̈. Ix laj cham ebꞌ yuninal vin̈ yedꞌ ebꞌ ix yisil chiꞌ. Ix lajvi chiꞌ ix och val jun yabꞌil dꞌa snivanil vin̈, aton tic syalcot capítulo 1 yedꞌ 2.

Axo dꞌa capítulo 3 masanto dꞌa capítulo 37, syalcot tas ix aj stelan sbꞌa vin̈aj Job yedꞌ juntzan̈ ebꞌ vin̈ yamigo. A snaan juntzan̈ ebꞌ vin̈ yamigo vin̈ chiꞌ to scꞌoch ebꞌ vin̈ yacꞌ snivanil scꞌol vin̈, palta axo ix aji ton̈ej stelaj sbꞌa ebꞌ vin̈ yedꞌ vin̈. A snaan ebꞌ vin̈ yamigo vin̈ chiꞌ to yuj smul vin̈ sjavi juntzan̈ yaelal dꞌa yibꞌan̈ vin̈ yuj Dios. Palta ix yalan vin̈ to vachꞌ sbꞌeybꞌal vin̈, te tojol spensar vin̈. Max schalaj yabꞌ ebꞌ vin̈ yamigo vin̈ chiꞌ, a yalan ebꞌ vin̈ to ay val smul vin̈ scꞌubꞌejeli.

Yuj chiꞌ stecꞌbꞌej val sbꞌa vin̈aj Job chiꞌ yalani to man̈ yujoc smul vin̈ icha chiꞌ sjavi dꞌa yibꞌan̈ vin̈. Ix scꞌanan vin̈ dꞌa Dios to syabꞌ tas syal vin̈, yujto man̈ smojoc tzꞌacꞌji juntzan̈ yaelal chiꞌ dꞌa vin̈. Yuj chiꞌ snibꞌej vin̈ to schꞌoxel Dios dꞌa yichan̈ ebꞌ anima, to yel vachꞌ sbꞌeybꞌal vin̈, ayn̈ejoch scꞌol vin̈ dꞌa Dios. Axo ix aji, ix lolon Dios dꞌa vin̈, ix syamanoch scꞌanbꞌan juntzan̈ tastac dꞌa vin̈, yic syojtaquejel vin̈ to te ay spoder Dios, te jelan, tojol syutej schꞌolbꞌitan yaln̈ej tastac. Ataꞌ ix nachajel yuj vin̈ to ay juntzan̈ tas ya ix yal vin̈ dꞌa Dios. A dꞌa capítulo 38 versículo 1 masanto dꞌa capítulo 42 versículo 6 tzꞌilchaj juntzan̈ tic.

Axo dꞌa capítulo 42 versículo 7 masanto dꞌa versículo 17, ataꞌ syalcoti to ix sna sbꞌa vin̈aj Job chiꞌ yuj tas ix yalaꞌ, ix bꞌoxi pax scꞌol vin̈. Man̈xo jantacoc tastac ix ajxi dꞌa vin̈, ecꞌbꞌalto pax ix ajxi dꞌa yichan̈ juntzan̈ satnaquel dꞌa vin̈ chiꞌ. Ix tumaj juntzan̈ ebꞌ vin̈ yamigo vin̈ chiꞌ yuj Dios, yujto maj nachajel yuj ebꞌ vin̈ tas yuj sjavi juntzan̈ nivac yaelal dꞌa yibꞌan̈ vin̈. Palta a vin̈aj Job chiꞌ yojtac vin̈ sicꞌlabꞌil to te nivan yelcꞌoch Dios dꞌa yibꞌan̈ masanil scꞌaybꞌubꞌal ebꞌ anima scꞌaybꞌej dꞌa yol yicoꞌ.