4 A ebꞌ vin̈ yuninal vin̈ chiꞌ, cꞌajan ebꞌ vin̈ yoch qꞌuin̈ dꞌa spat junjun. Stzolal yecꞌ qꞌuin̈ chiꞌ dꞌa ebꞌ vin̈, syavtan ebꞌ ix oxvan̈ yanabꞌ ebꞌ vin̈ chiꞌ vael yedꞌoc. 5 Ayic slajvi yecꞌchaj qꞌuin̈ chiꞌ dꞌa ebꞌ vin̈ dꞌa stzolal, tzꞌavtajcot ebꞌ vin̈ yuj vin̈aj Job chiꞌ. Acꞌvalto sqꞌue vaan vin̈, sn̈usan silabꞌ vin̈ yuj junjun ebꞌ vin̈, yic sacbꞌitan sbꞌa ebꞌ vin̈ dꞌa sat Dios, talaj tzꞌoch smul ebꞌ vin̈, syalan chuc ebꞌ vin̈ dꞌa Dios dꞌa spensar snaan vin̈. Icha chiꞌ scꞌulej vin̈ dꞌa juntac el.

6 Ay jun cꞌu ix smolbꞌej sbꞌa ebꞌ ángel tzꞌacꞌan servil Jehová dꞌa yichan̈ dꞌa satchaan̈. A dꞌa scal ebꞌ chiꞌ, ix cꞌochpax jun ángel ajcꞌool, aton vin̈ Satanás. 7 Ix scꞌanbꞌan Jehová dꞌa vin̈ Satanás chiꞌ icha tic:

—¿Bꞌajtil ach coti? xchi. Ix yalan vin̈:

—In cot dꞌa yolyibꞌan̈qꞌuinal, yujto tzecꞌ voymitej lum smasanil, xchi vin̈.

8 Ix yalanxi Jehová dꞌa vin̈ icha tic:

—¿Tzam il tas yaj vin̈ in checabꞌ aj Job? Malaj junocxo mach dꞌa yolyibꞌan̈qꞌuinal icha vin̈ chiꞌ, te tojol spensar vin̈, te vachꞌ sbꞌeybꞌal vin̈, ay velcꞌoch dꞌa yol sat vin̈, syaꞌilej val sbꞌa vin̈, max yacꞌoch sbꞌa vin̈ dꞌa scal chucal, xchi Jehová chiꞌ.

9 Ix tacꞌvi vin̈ Satanás chiꞌ icha tic:

—Man̈ nabꞌan̈ejoc vachꞌ syutej sbꞌa vin̈ dꞌa ichan̈. 10 Yujto max yal a cꞌol to ay junoc mach tzꞌicꞌanecꞌ junoc tas dꞌa vin̈, ma tastac ay dꞌa yol spat vin̈ yedꞌ masanil tastac ay dꞌa vin̈. A ach tzacꞌn̈ej a vachꞌcꞌolal dꞌa yibꞌan̈ masanil tastac scꞌulej vin̈, yuj chiꞌ ecꞌbꞌal sbꞌisul nocꞌ smolbꞌetzal nocꞌ vin̈ yedꞌ sbꞌeyumal. 11 Palta qꞌuinaloc a ticnaic tziqꞌuecꞌ masanil tas ay dꞌa vin̈ chiꞌ, ol ilani tato man̈ ol yal chuc vin̈ dꞌayach, xchi vin̈.

12 Ix tacꞌvi Jehová dꞌa vin̈ icha tic:

—Ichocabꞌ taꞌ, ol xo ilaꞌ tas tza cꞌulej yedꞌ masanil tastac ay dꞌa vin̈ chiꞌ, an̈ej to malaj tas tzutej snivanil vin̈, xchi.

Ix lajvi chiꞌ ix el vin̈ Satanás chiꞌ dꞌa yichan̈ Jehová.

13 Ay jun cꞌu, ayic van sva ebꞌ vin̈ yuninal yedꞌ ebꞌ ix yisil vin̈aj Job chiꞌ dꞌa spat vin̈ bꞌabꞌel vinac, 14 ix javi jun vin̈ checabꞌ bꞌaj ayecꞌ vin̈aj Job chiꞌ, ix yalan vin̈ icha tic:

—Van co munlaj yedꞌ nocꞌ vacax, axo nocꞌ bꞌuru van sva nocꞌ dꞌa co lacꞌanil chiꞌ. 15 Axo ix aji, ix javi ebꞌ vin̈ sabeo, ix miljicancham ebꞌ vin̈ munlajvum chiꞌ yuj ebꞌ vin̈. Ix yelcꞌanbꞌat nocꞌ vacax chiꞌ ebꞌ vin̈. A inxon̈ej ix yal vel lemnajoc yic tzul valan abꞌi, xchi vin̈.

16 Manto val lajvilaj yalan jun vin̈ chiꞌ, ix javi junxo vin̈, ix yalan vin̈ icha tic:

—Ix cot cꞌacꞌ dꞌa satchaan̈ yuj Dios, ix cham masanil ebꞌ vin̈ tan̈vum calnel yedꞌ nocꞌ calnel chiꞌ. A inxon̈ej ix yal vel lemnajoc yic tzul valan abꞌi, xchi vin̈.

17 Manto val lajvilaj yalan junxo vin̈ chiꞌ, ix javi junxo vin̈ yoxil, ix yalan vin̈ icha tic:

—A ebꞌ vin̈ caldeo, ox macan̈ val ix aj ebꞌ vin̈ yacꞌan oval dꞌayon̈. Ix smilancham masanil ebꞌ vin̈ stan̈van nocꞌ a camello ebꞌ vin̈, ix yelcꞌanbꞌat nocꞌ ebꞌ vin̈. A inxon̈ej ix yal vel lemnajoc yic tzul valan abꞌi, xchi vin̈.

18 Manto val lajvilaj yalan junxo vin̈ chiꞌ, ix javi junxo vin̈, ix yalan vin̈ icha tic:

—A ebꞌ vin̈ uninal yedꞌ ebꞌ ix isil, van sva ebꞌ, syucꞌan vino ebꞌ dꞌa spat vin̈ bꞌabꞌel uninal, 19 axo ix aji, ix javi jun tzijtumal icꞌ dꞌa stojolal lum taquin̈ luum. Ix em lan̈naj spat ebꞌ uninal chiꞌ dꞌa yibꞌan̈ yuj jun icꞌ chiꞌ, ix cham ebꞌ smasanil. A inxon̈ej ix yal vel lemnajoc yic tzul valan abꞌi, xchi vin̈.

20 Yuj chiꞌ ix qꞌue vaan vin̈aj Job chiꞌ, ix te cus vin̈ sicꞌlabꞌil. Ix sn̈icꞌchitan spichul vin̈, ix stzucanel xil sjolom vin̈, ix em n̈ojan vin̈ ejmelal dꞌa Dios. 21 Ix yalan vin̈ icha tic:

—Malaj jabꞌoc tas vedꞌnac in alji dꞌa yolyibꞌan̈qꞌuinal tic, malaj pax jabꞌoc tas ol vicꞌbꞌati ayic ol in meltzajxoc. A Jehová ix acꞌan masanil tas dꞌayin, an̈ejaꞌ pax tzꞌicꞌanxieqꞌui. Alchajocabꞌ vachꞌ lolonel dꞌay, xchi vin̈.

22 Vachꞌchom nivan yaelal ix ecꞌ dꞌa yibꞌan̈ vin̈aj Job chiꞌ, palta maj ochlaj smul vin̈ yujto maj yal-laj chucal vin̈ dꞌa spatic Dios yuj tas ix utaj chiꞌ.