Ester sbꞌi jun libro tic, yujto syalcot yabꞌixal ix Ester. A vin̈aj Esdras yedꞌ vin̈aj Nehemías, syalcot ebꞌ vin̈ tas aj smeltzajnacxi ebꞌ israel icꞌbꞌilbꞌat dꞌa Babilonia. Palta a jun libro tic tzꞌalancot yabꞌixal jun macan̈to ebꞌ israel chiꞌ cannac dꞌa yol smacbꞌen Persia. Syalancot yuj jun ix Ester chiꞌ, israel ix, syaln̈ejcot tastac scꞌulejnac ix ayic ayecꞌ ix dꞌa spalacio dꞌa yol smacbꞌen Persia chiꞌ.

A dꞌa capítulo 1 yedꞌ 2, syalcoti tas ajnac yoch ix Ester chiꞌ reinail. Axo dꞌa capítulo 3 masanto dꞌa 6, syalcoti to a vin̈aj Amán ay chucal snanac vin̈ scꞌulej dꞌa spatic ebꞌ israel, snibꞌejnac vin̈ satel ebꞌ israel, yujto sat yajal yaj vin̈ yuj vin̈ rey chiꞌ. Palta a ix reina Ester chiꞌ yabꞌelta ix tastac van snaanchaan̈ vin̈aj Amán chiꞌ, yuj chiꞌ xidꞌ yal ix dꞌa vin̈ rey chiꞌ. Yuj chiꞌ a vin̈ rey chiꞌ alani to a vin̈aj Amán chiꞌ sqꞌue dꞌun̈an vin̈ dꞌa jun te teꞌ sbꞌo vin̈ yuj vin̈aj Mardoqueo, vin̈ scꞌabꞌyoc ix Ester chiꞌ. Yalanpax vin̈ rey chiꞌ tas syutej scolan sbꞌa ebꞌ israel chiꞌ dꞌa ebꞌ ajcꞌol chiꞌ. Axo dꞌa capítulo 7 masanto dꞌa 10, ataꞌ syalcoti to a ebꞌ israel chiꞌ yacꞌnacoch jun qꞌuin̈ ebꞌ yic qꞌuen Purim, syalanpaxcot yuj tastac ujinac dꞌa yol stiempoal ix Ester chiꞌ.