3 Ayic yoxil abꞌil yoch vin̈aj Asuero chiꞌ reyal, ix yacꞌan jun nivan vael vin̈ dꞌa ebꞌ nivac vinac ayoch yajalil yedꞌoc, aton ebꞌ yajalil ebꞌ soldado yic Persia, ebꞌ yic Media, ebꞌ nivac yelcꞌochi yedꞌ ebꞌ ayoch yajalil dꞌa junjun macan̈ smacbꞌen vin̈ chiꞌ. 4 Nan̈al abꞌil val ix yacꞌ jun qꞌuin̈ chiꞌ vin̈, yic schꞌoxanel jantac sbꞌeyumal vin̈ yedꞌ snivanil yelcꞌoch yopisio vin̈ dꞌa ebꞌ avtabꞌil chiꞌ. 5 Ix lajvi chiꞌ, ix yacꞌanoch uquexo cꞌual qꞌuin̈ vin̈ dꞌa yamaqꞌuil spalacio. Masanil ebꞌ ayecꞌ dꞌa chon̈abꞌ Susa chiꞌ, ebꞌ nivac yelcꞌochi yedꞌ ebꞌ malaj yelcꞌochi, ix avtaj ebꞌ smasanil. 6 Te vachꞌ ix aj sbꞌo bꞌaj ix och qꞌuin̈ chiꞌ. A cꞌapac sacsac cꞌapac yedꞌ cꞌapac yaax ix och scortinailoc. An̈ejtonaꞌ pax cꞌapac lino sacsac yedꞌ cꞌapac qꞌuicꞌ mutzꞌinac ayoch schꞌan̈aloc pax cꞌapac cortina chiꞌ. Yambꞌil cꞌapac yuj qꞌuen argolla nabꞌa plata ayoch dꞌa juntzan̈ qꞌuen oy nabꞌa mármol. Axo xila, a qꞌuen oro yedꞌ qꞌuen plata ayoch dꞌay. Axo dꞌa sat luum, a qꞌuen mármol ayem dꞌay, ay qꞌuen sacsac, ay qꞌuen qꞌuiqꞌuicꞌ. 7 Axo juntzan̈ vaso nabꞌa oro syucꞌlabꞌej ebꞌ. Chꞌocchꞌoc yilji junjun vaso chiꞌ. Te nivan vino ix el dꞌa scꞌol vin̈ rey chiꞌ yacꞌani. 8 Ix yalan vin̈ rey chiꞌ dꞌa ebꞌ yajal yaj dꞌa ebꞌ tzꞌacꞌan servil vin̈ to malaj junoc mach tzꞌacꞌchaj pural yucꞌan vino chiꞌ, junjun ebꞌ syal yucꞌan ebꞌ jantac snibꞌej. 9 An̈ejtonaꞌ pax ix reina Vasti, ix schec pax bꞌochaj jun nivan vael ix dꞌa spalacio vin̈ rey chiꞌ yic vachꞌ sva ebꞌ ix ix avtabꞌil.

10 A val dꞌa yuquil cꞌual qꞌuin̈ chiꞌ, ix te tzalaj scꞌol vin̈ rey chiꞌ yuj vino. Yuj chiꞌ ix schecbꞌat ucvan̈ ebꞌ vin̈ yacꞌumal servil vin̈, ebꞌ vin̈ ayoch yipoc scꞌol vin̈, aton vin̈aj Mehumán, vin̈aj Bizta, vin̈aj Harbona, vin̈aj Bigta, vin̈aj Abagta, vin̈aj Zetar yedꞌ vin̈aj Carcas. 11 Ix checjibꞌat ebꞌ vin̈ yic bꞌat yicꞌancot ix reina Vasti chiꞌ ebꞌ vin̈ dꞌa yichan̈ vin̈ rey chiꞌ, yujto snibꞌej vin̈ sjavi ix yedꞌ scorona copopi yilji, yic schꞌoxanpaxel svachꞌil yilji ix dꞌa yichan̈ masanil ebꞌ anima yedꞌ dꞌa yichan̈ ebꞌ nivac yajal, yujto te vachꞌ yilji ix. 12 Palta maj stacꞌcotlaj sbꞌa ix. Ix stenecꞌ ix tas ix bꞌat yal ebꞌ vin̈ schecabꞌ vin̈ rey chiꞌ. Yuj chiꞌ ix te cot yoval vin̈ rey chiꞌ. 13-14 Ix yavtancot ucvan̈ ebꞌ vin̈ nivac yopisio dꞌa Media yedꞌ dꞌa Persia chiꞌ vin̈, ebꞌ vin̈ yipcꞌolal yaj yuj vin̈: Aton vin̈aj Carsena, vin̈aj Setar, vin̈aj Admata, vin̈aj Tarsis, vin̈aj Meres, vin̈aj Marsena yedꞌ vin̈aj Memucán. A ebꞌ vin̈ chiꞌ, yojtac ley ebꞌ vin̈ sicꞌlabꞌil, yuj chiꞌ dꞌa ebꞌ vin̈ ix scꞌanbꞌej vin̈ rey chiꞌ tas tzꞌaj jun chiꞌ sbꞌoi. 15 Ix scꞌanbꞌan vin̈ dꞌa ebꞌ vin̈ icha tic:

—Icha syal co ley, naec vedꞌoc ¿tas yovalil tzꞌaj ix reina Vasti chiꞌ, yujto maj scꞌanabꞌajej in checnabꞌil ix, ix bꞌat yal ebꞌ vin̈ in checabꞌ? xchi vin̈.

16 A val dꞌa yichan̈ masanil ebꞌ molan chiꞌ, ix yalan vin̈aj Memucán dꞌa vin̈ rey chiꞌ icha tic:

—Mamin rey, a ix reina Vasti chiꞌ, man̈ocn̈ej dꞌayach ix och smul ix, palta ix ochpax smul ix dꞌayon̈ a on̈ nivac yajal on̈ tic yedꞌ dꞌa masanil ebꞌ vin̈ vinac ay dꞌa yol a macbꞌen tic. 17 A tas ix scꞌulej ix chiꞌ ol yabꞌ masanil ebꞌ ix ix, ol scꞌaybꞌan ebꞌ ix, man̈xa ol aj yelcꞌoch ebꞌ vin̈ yetbꞌeyum ebꞌ ix dꞌa yol sat, ol am yalan ebꞌ ix icha tic: A vin̈aj rey Asuero ix avtan ix reina Vasti, palta maj scꞌanabꞌajejlaj ix sbꞌati, xcham ebꞌ ix. 18 A ebꞌ ix yetbꞌeyum ebꞌ vin̈ nivac yajal dꞌa Persia yedꞌ dꞌa Media tic, ayic ol yabꞌan ebꞌ ix tas ix yutej sbꞌa ix reina chiꞌ, ol laj yalan ebꞌ ix dꞌa ebꞌ vin̈ yetbꞌeyum. Yuj chiꞌ a yuj jun tic ol spatiquejel ebꞌ vin̈ yetbꞌeyum ebꞌ ix, axo scot yoval ebꞌ vin̈ chiꞌ dꞌa ebꞌ ix. 19 Yuj chiꞌ jun mamin rey, tato vachꞌ scan jun tic dꞌayach, acꞌ tzꞌibꞌchaj junoc ley yic scan leyal dꞌa Persia yedꞌ dꞌa Media tic, to maxtzac yal yecꞌbꞌati: Man̈xa bꞌaqꞌuin̈ sjavi ix reina Vasti dꞌa yichan̈ vin̈ rey, xchiocabꞌ jun ley chiꞌ. Axo junocxo ix ecꞌto svachꞌil dꞌa yichan̈ ix chiꞌ, a ix tzꞌochcan reinail sqꞌuexuloc ix. 20 A jun ley chiꞌ yovalil tzꞌacꞌchaj ojtacajel dꞌa masanil yol a macbꞌen tic yic vachꞌ masanil ebꞌ ix ix ol scꞌanabꞌajej val ebꞌ vin̈ yetbꞌeyum ebꞌ ix, yaln̈ej tas animail, xchi vin̈.

21 A jun ix yal vin̈aj Memucán chiꞌ, ix scha val scꞌol vin̈ rey chiꞌ yedꞌ masanil ebꞌ ayecꞌ yedꞌ vin̈, ix och dꞌa yopisio yuj vin̈. 22 Yuj chiꞌ ix schecan vin̈ tzꞌibꞌchajbꞌat dꞌa junjun macan̈ dꞌa yol smacbꞌen chiꞌ, dꞌa stiꞌ junjun chon̈abꞌ. Ix yalanbꞌat vin̈ to ayocabꞌ yelcꞌoch ebꞌ vin̈ vinac dꞌa yol spat, aocabꞌ ebꞌ vin̈ tzꞌalani tastac sbꞌoi.