—Yovalil saychajcot ebꞌ ix cobꞌestac dꞌa vin̈ rey tic, aton ebꞌ ix te vachꞌ yilji. 3 Sicꞌocabꞌ vin̈ rey tic junjunoc schecabꞌ dꞌa junjun macan̈ dꞌa yol smacbꞌen tic, yic vachꞌ a ebꞌ vin̈ tzꞌicꞌancot masanil ebꞌ ix cobꞌestac te vachꞌ yilji. Sjavi ebꞌ ix dꞌa spalacio vin̈ dꞌa chon̈abꞌ Susa tic, tzꞌochcan ebꞌ ix dꞌa yol scꞌabꞌ vin̈aj Hegai, vin̈ stan̈van ebꞌ ix yetbꞌeyum vin̈ rey tic. A vin̈ tzꞌacꞌan servil ebꞌ ix yic ste bꞌo yilji ebꞌ ix. 4 A junoc ix cobꞌes ol scha scꞌol vin̈ rey tic, aton ix ol ochcan reinail sqꞌuexuloc ix Vasti chiꞌ, xchi ebꞌ vin̈.

A jun pensar chiꞌ, ix scha val scꞌol vin̈ rey chiꞌ, yuj chiꞌ ix schec vin̈ cꞌulaj icha chiꞌ.

5 A dꞌa chon̈abꞌ Susa chiꞌ, ataꞌ cajan jun vin̈ israel scuchan Mardoqueo yuninal vin̈aj Jair yin̈tilal vin̈aj Simei. A vin̈aj Simei chiꞌ, a vin̈aj Cis ay yin̈tilal vin̈ dꞌa yin̈tilal Benjamín. 6 A ebꞌ smam yicham vin̈, icꞌbꞌilcot ebꞌ yuj vin̈aj rey Nabucodonosor dꞌa Jerusalén, javinaccan ebꞌ dꞌa Babilonia. Junn̈ej janaccan ebꞌ yedꞌ vin̈aj Jeconías sreyal Judá. 7 A vin̈aj Mardoqueo chiꞌ, ay jun ix yisil jun vin̈ scꞌabꞌyoc vin̈ ayecꞌ yedꞌoc, aton ix Hadasa, syalelcꞌochi Ester, mebꞌaꞌ ix, yujto chamnac smam snun ix. Axo vin̈aj Mardoqueo chiꞌ ix ilan qꞌuibꞌ ix, icha val yisil vin̈ yaj ix. Te vachꞌ yilji sat ix yedꞌ snivanil. 8 Axo yic ix elta jun ley yuj vin̈ rey chiꞌ, tzijtum ebꞌ ix cobꞌestac ix molchaj dꞌa chon̈abꞌ Susa dꞌa spalacio vin̈. A vin̈aj Hegai ix acꞌchajoch stan̈vumaloc ebꞌ ix, aton vin̈ stan̈vantaxon ebꞌ ix yetbꞌeyum vin̈ rey chiꞌ. Ayoch ix Ester chiꞌ dꞌa scal ebꞌ ix. 9 Te vachꞌ spensar ix ix yiloch vin̈aj Hegai chiꞌ, yuj chiꞌ te vachꞌ ix yutej spensar vin̈ dꞌa ix. Elan̈chamel ix te acꞌchaj juntzan̈ remeyo yic tzꞌacꞌchajoch dꞌa snivanil ix yic ste bꞌo yilji ix, tzꞌacꞌchaj pax vael te vachꞌ dꞌa ix. Ix acꞌchajoch ucvan̈ ebꞌ ix schecabꞌ vin̈ rey te vachꞌ yic tzꞌacꞌji servil ix. Ix acꞌchajbꞌat ebꞌ ix yedꞌ ix Ester chiꞌ dꞌa jun cuarto te vachꞌ bꞌaj ay ebꞌ ix yetbꞌeyum vin̈ rey chiꞌ.

10 A ix Ester chiꞌ malaj jabꞌoc tas ix yal ix tas in̈tilal, ma tas chon̈abꞌil ix, yujto ix cham val yalan vin̈aj Mardoqueo chiꞌ dꞌa ix to max yal-laj ix. 11 Junjun cꞌu tzꞌecꞌ vin̈aj Mardoqueo dꞌa sat bꞌaj ayecꞌ ebꞌ ix ix chiꞌ, yic syabꞌan vin̈ tato vachꞌ scꞌol ix Ester chiꞌ yedꞌ tas tzꞌaj yacꞌji servil ix.

12 Masanil juntzan̈ ebꞌ ix cobꞌestac chiꞌ, jun abꞌil ix bꞌochaj yilji ebꞌ ix. Dꞌa sbꞌabꞌelal vaqueꞌ ujal succhajecꞌ aceite yic mirra dꞌa snivanil ebꞌ ix. Axo dꞌa junxo vaqueꞌ ujal, succhajecꞌ perfume yedꞌ crema dꞌa ebꞌ ix ichataxon juntzan̈ scꞌan ebꞌ ix ix. Axo yic ix el yabꞌilal sbꞌochaj yilji ebꞌ ix chiꞌ, junjunal ix icꞌjibꞌat ebꞌ ix yic svay ebꞌ ix yedꞌ vin̈ rey chiꞌ. 13 Icha chiꞌ ix aj scꞌoch junjun ebꞌ ix dꞌa vin̈ rey chiꞌ. Ayic tzꞌelta ebꞌ ix bꞌaj ayecꞌ ebꞌ ix cobꞌestac chiꞌ, syaln̈ej scꞌanan ebꞌ ix tastac snibꞌej yic sbꞌoan sbꞌa ebꞌ ix. 14 Sbꞌat ebꞌ ix dꞌa spalacio vin̈ rey chiꞌ dꞌa yemcꞌualil, axo dꞌa junxo qꞌuin̈ibꞌalil, scꞌochcan ebꞌ ix dꞌa junxo pat bꞌaj ay ebꞌ ix schabꞌil yetbꞌeyum vin̈ rey chiꞌ, bꞌaj ayoch vin̈aj Saasgaz yilumaloc ebꞌ ix yuj vin̈ rey chiꞌ. Majxo cꞌochlaj ebꞌ ix dꞌa vin̈ rey chiꞌ, an̈ej tato ay junoc ebꞌ ix te vachꞌ, scha scꞌol vin̈, a jun ix chiꞌ tzꞌavtaj sbꞌi, sbꞌat ix bꞌian.

15 Axo ix aji, ayic ix cꞌoch stzolal dꞌa yibꞌan̈ ix Ester yisilcan vin̈aj Abihail, scꞌabꞌyoc vin̈aj Mardoqueo chiꞌ, yic bꞌat vay ix yedꞌ vin̈ rey chiꞌ, an̈ej tas ix yal vin̈aj Hegai stan̈vumal ebꞌ ix, an̈ej ix yicꞌbꞌat ix. Te vachꞌ ix Ester chiꞌ dꞌa yol sat masanil ebꞌ tzꞌilan ix. 16 Ayic slajun̈il uj, dꞌa jun uj scuchan Tebet, ayic yuquil abꞌil yoch vin̈aj Asuero reyal, ataꞌ ix icꞌchajbꞌat ix dꞌa spalacio vin̈ yic svay ix yedꞌ vin̈. 17 Yelxo val te xajan ix Ester chiꞌ yuj vin̈ rey chiꞌ. Malaj junocxo ix te xajan yuj vin̈. Te nivan svachꞌcꞌolal vin̈ ix schꞌox dꞌa ix dꞌa yichan̈ juntzan̈xo ebꞌ ix cobꞌestac chiꞌ. Yuj chiꞌ ix schec vin̈ acꞌchajqꞌue jun corona dꞌa sjolom ix. Ix lajvi chiꞌ ix yacꞌancanoch ix vin̈ reinail sqꞌuexuloc ix Vasti. 18 Ix schecan bꞌojoc jun nivan vael vin̈ yic tzꞌicꞌjichaan̈ ix Ester chiꞌ. Ix yavtan masanil ebꞌ yajal ayoch dꞌa yopisio yedꞌ vin̈ dꞌa yol smacbꞌen chiꞌ. Ix yicꞌanemta sbꞌisul qꞌuen tumin vin̈ ayoch dꞌa yibꞌan̈ ebꞌ anima yacꞌani. Te tzijtum pax tas ix yacꞌ vin̈ dꞌa juntzan̈ nación ay dꞌa yol smacbꞌen chiꞌ. Icha chiꞌ ix aj schꞌoxanel svachꞌcꞌolal vin̈ rey chiꞌ.

19 Ayic toxo ix qꞌuexchaj bꞌaj cajan ebꞌ ix cobꞌestac chiꞌ, ayic ayxo och vin̈aj Mardoqueo dꞌa yopisio dꞌa spalacio vin̈ rey, 20 a ix Ester chiꞌ an̈ejaꞌ max yal-laj ix tas chon̈abꞌil ix, tas yin̈tilal ix. An̈ejaꞌ scꞌanabꞌajan ix tas syal vin̈aj Mardoqueo chiꞌ, icha ix scꞌanabꞌajej ix ayic ayecꞌ ix dꞌa spat vin̈.

21 A junel, ayic ix cꞌoch stzolal dꞌa yibꞌan̈ vin̈aj Mardoqueo dꞌa yopisio dꞌa palacio vin̈ rey chiꞌ, ay chavan̈ ebꞌ vin̈ stan̈van bꞌaj ay vin̈ rey chiꞌ, aton vin̈aj Bigtán yedꞌ vin̈aj Teres. Te aycot yoval ebꞌ vin̈ dꞌa vin̈ rey chiꞌ, van yalan ebꞌ vin̈ tas syutej ebꞌ vin̈ smilancham vin̈ rey chiꞌ. 22 Ix yabꞌan vin̈aj Mardoqueo tas van yalan ebꞌ vin̈ chiꞌ, axo vin̈ ix checan aljoc dꞌa ix reina Ester chiꞌ. Axo ix ix alan dꞌa vin̈ rey chiꞌ to a vin̈aj Mardoqueo ix abꞌan tas van yalchaj dꞌa spatic vin̈. 23 Axo ix scꞌanbꞌan vin̈ yabꞌi, ix checlaji to yel jun lolonel ix yal vin̈aj Mardoqueo chiꞌ. Yuj chiꞌ a chavan̈ ebꞌ vin̈ stan̈vumal vin̈ rey chiꞌ, ix qꞌue locan ebꞌ vin̈ dꞌa te teꞌ. A jun ix uji chiꞌ ix stzꞌibꞌchajcan bꞌaj aycan yabꞌixal vin̈aj rey Asuero ayic ix yacꞌan reyal vin̈.