Vin̈aj Mardoqueo yedꞌ vin̈aj Amán
3
Ix lajvi yecꞌ juntzan̈ chiꞌ, ix yacꞌanoch yopisio vin̈aj Amán yuninal vin̈aj Hamedata yin̈tilal vin̈aj Agag vin̈ rey chiꞌ. Ix acꞌjioch vin̈ sat yajalil dꞌa juntzan̈xo ebꞌ vin̈ yajal dꞌa yol smacbꞌen vin̈ rey chiꞌ. 2 Masanil ebꞌ vin̈ tzꞌacꞌan servil vin̈ rey chiꞌ, yovalil tzꞌem cuman ebꞌ vin̈, tzꞌempax n̈ojan ebꞌ vin̈ dꞌa yichan̈ vin̈aj Amán chiꞌ, yujto icha chiꞌ ix aj yalan vin̈ rey chiꞌ. Axo pax vin̈aj Mardoqueo chiꞌ, max scꞌanabꞌajejlaj jun checnabꞌil chiꞌ vin̈.3 Axo juntzan̈xo ebꞌ vin̈ yajal chiꞌ, ix scꞌanbꞌan ebꞌ vin̈ dꞌa vin̈aj Mardoqueo chiꞌ tas yuj max scꞌanabꞌajej jun checnabꞌil chiꞌ vin̈. 4 Junjun cꞌu syalan ebꞌ vin̈ dꞌa vin̈, palta max schalaj yabꞌ vin̈ tas syal ebꞌ vin̈ chiꞌ, yujto toxo ix yal vin̈ dꞌa ebꞌ vin̈ to israel vin̈. Yuj chiꞌ ix bꞌat yalan ebꞌ vin̈ dꞌa vin̈aj Amán chiꞌ yic syilan ebꞌ vin̈ tato ton̈ej ol yiloch vin̈ vin̈aj Amán chiꞌ. 5 Ayic ix yilan vin̈aj Amán to yel max emlaj cuman vin̈aj Mardoqueo chiꞌ, max empax n̈ojan vin̈ dꞌa yichan̈ vin̈ ayic tzꞌecꞌ vin̈, ix te cot yoval vin̈. 6 Toxo ix yabꞌ vin̈ to israel vin̈aj Mardoqueo chiꞌ, yuj chiꞌ ix snaan vin̈ to man̈ocn̈ej vin̈ smiljichamoc, palta ix sna vin̈ tas tzꞌaj satjiel masanil ebꞌ israel ayecꞌ dꞌa yol smacbꞌen vin̈aj rey Asuero chiꞌ.
Jun ley yic satjiel masanil ebꞌ israel
7 A dꞌa bꞌabꞌel uj scuch Nisán, yic slajchavil abꞌil yoch vin̈aj Asuero reyal, ix och suerte dꞌa yichan̈ vin̈aj Amán yic syil vin̈ tas cꞌual, ma tas tiempoal ol elcꞌoch jun tas sna vin̈ chiꞌ. Axo ix aji, a dꞌa 13 yoch slajchavil uj scuch Adar, ix checlaj scꞌual. 8 Yuj chiꞌ ix yal vin̈ dꞌa vin̈ rey chiꞌ icha tic:
—Mamin rey, a dꞌa masanil chon̈abꞌ ay dꞌa yol a macbꞌen, ay jun macan̈ anima chꞌoc yeli. Chꞌoc yel sley ebꞌ dꞌa yichan̈ juntzan̈xo chon̈abꞌ, max scꞌanabꞌajej a ley ebꞌ. Man̈ smojoc scajnaj ebꞌ dꞌa yol a macbꞌen tic. 9 Yuj chiꞌ mamin rey, tato scha a cꞌool, aqꞌuelta junoc ley yic syabꞌ masanil chon̈abꞌ to satel juntzan̈ anima chiꞌ. Tato icha chiꞌ ol vacꞌ junoc 7,500 quintal qꞌuen plata bꞌaj smolchaj qꞌuen tzꞌacꞌji dꞌayach, xchi vin̈.
10 Ix scha scꞌol vin̈ rey tas ix yal vin̈ chiꞌ, yuj chiꞌ ix yiqꞌuel scolcꞌabꞌ vin̈ bꞌaj ayoch sello, ix yacꞌan vin̈ dꞌa vin̈aj Amán chiꞌ, aton vin̈ ajcꞌol dꞌa ebꞌ israel. 11 Ix yalan vin̈ rey chiꞌ icha tic:
—A qꞌuen plata ix al chiꞌ, canocabꞌ qꞌuen dꞌayach, axo ebꞌ anima tzal chiꞌ, ic yaj ebꞌ, syal tza cꞌulej tas nabꞌil uj dꞌa yibꞌan̈ ebꞌ, xchi vin̈ dꞌa vin̈.
12 Ayic 13 yoch bꞌabꞌel uj dꞌa yol abꞌil chiꞌ, ix avtaj masanil ebꞌ vin̈ stzꞌibꞌum vin̈ rey chiꞌ yic stzꞌibꞌan jun ley chiꞌ ebꞌ vin̈ ix yaqꞌuelta vin̈aj Amán chiꞌ, yic sbꞌat dꞌa masanil ebꞌ yajal dꞌa junjun chon̈abꞌ dꞌa yol smacbꞌen vin̈ rey chiꞌ. A jun ley chiꞌ ix tzꞌibꞌchaj dꞌa stiꞌ yedꞌ dꞌa sletrail junjun chon̈abꞌ. Ix och sbꞌi vin̈ rey chiꞌ dꞌay yedꞌ sello vin̈. 13 Elan̈chamel ix checjibꞌat ebꞌ vin̈ checabꞌ dꞌa masanil yol smacbꞌen vin̈ rey chiꞌ. Syalan jun ley chiꞌ to junn̈ej cꞌual ol satjiel masanil ebꞌ israel yedꞌ masanil ebꞌ yuninal ebꞌ. Axo tastac ay dꞌa ebꞌ, ol icꞌchajcanecꞌ smasanil. A jun cꞌu ix checlaj chiꞌ, aton dꞌa 13 yoch slajchavil uj scuch Adar. 14 Ix pucax jun ley chiꞌ dꞌa masanil smacbꞌen vin̈ rey chiꞌ. Ix alchajel dꞌa scal masanil anima yic vachꞌ listaxo yaj ebꞌ anima dꞌa jun cꞌu chiꞌ. 15 Elan̈chamel ix pucaxbꞌat jun ley chiꞌ icha ix aj yalan vin̈ rey chiꞌ. Bꞌabꞌel ix alchajel dꞌa yol chon̈abꞌ Susa. Yacbꞌan van yucꞌan an̈ vin̈ rey yedꞌ vin̈aj Amán chiꞌ, axo ebꞌ anima dꞌa chon̈abꞌ Susa chiꞌ, ix te somchajchaan̈ ebꞌ yuj jun ley chiꞌ.