Ochnac ebꞌ israel cuscꞌolal yuj jun ley
4
Ayic ix yabꞌan vin̈aj Mardoqueo masanil tas ix alchaj chiꞌ, ix snicꞌchitanbꞌat spichul vin̈ yuj schꞌoxanel scuscꞌolal, ix yacꞌanoch pichul yic cuscꞌolal vin̈, ix yacꞌanqꞌue qꞌuen ticꞌaqꞌuil taan̈ vin̈ dꞌa sjolom, ix och ijan vin̈ yecꞌ dꞌa cal chon̈abꞌ. Tzꞌel yav vin̈ yuj cuscꞌolal. 2 Axo yic ix cꞌoch vin̈ dꞌa stiꞌ spalacio vin̈ rey, maj ochlaj vin̈ dꞌa yool, yujto max chajiochlaj junoc mach yuj vin̈ rey chiꞌ tato ayoch pichul yic cuscꞌolal yuuj. 3 An̈ejtonaꞌ dꞌa masanil chon̈abꞌ bꞌajtac ix tzꞌibꞌchajbꞌat jun ley chiꞌ, masanil ebꞌ israel ix och dꞌa cuscꞌolal. Ayic ix schꞌoxanel scuscꞌolal ebꞌ chiꞌ, ix och ebꞌ dꞌa tzecꞌojcꞌolal. Tzꞌocꞌ ebꞌ, tzꞌel yav ebꞌ, tzijtum ebꞌ ix sjulecꞌ jichan sbꞌa dꞌa scal qꞌuen ticꞌaqꞌuil taan̈, ix yacꞌanoch pichul ebꞌ yic cuscꞌolal.Ix tevi ix Ester yuj ebꞌ yetchon̈abꞌ
4 A ebꞌ ix ix tzꞌacꞌan servil ix reina Ester yedꞌ ebꞌ vin̈ vinac stan̈van ix, ix yal ebꞌ yabꞌ ix tas yaj vin̈aj Mardoqueo chiꞌ, yuj chiꞌ ix te cus scꞌol ix, ix yacꞌanbꞌat pichul ix dꞌa vin̈ yic syicꞌanel pichul yic cuscꞌolal ayoch chiꞌ yuj vin̈, palta maj yal-laj scꞌol vin̈ ix schaꞌa. 5 Axo ix Ester chiꞌ ix avtancot jun vin̈ schecabꞌ vin̈ rey scuch Hatac, schecabꞌ pax vin̈ ix. Ix schecanbꞌat vin̈ ix dꞌa vin̈aj Mardoqueo yic bꞌat scꞌanbꞌej vin̈ tas van yuji, tas pax yuj icha chiꞌ syutej sbꞌa vin̈. 6 Yuj chiꞌ ix cꞌoch vin̈aj Hatac chiꞌ bꞌaj ayecꞌ vin̈aj Mardoqueo chiꞌ dꞌa jun parque dꞌa yichan̈ stiꞌ spalacio vin̈ rey chiꞌ, ix lolon vin̈ yedꞌ vin̈. 7 Ix yalan vin̈aj Mardoqueo masanil tastac tzꞌalchaj chiꞌ dꞌay yedꞌ pax jantac sbꞌisul qꞌuen plata syaltej vin̈aj Amán yic tzꞌoch bꞌaj smolchaj qꞌuen stumin vin̈ rey yic vachꞌ satjiel masanil ebꞌ israel yalan vin̈. 8 Ix yacꞌanpax jun scopiail jun ley chiꞌ vin̈ dꞌa vin̈aj Hatac chiꞌ, yic schꞌox vin̈ dꞌa ix Ester chiꞌ yic syojtaquejel ix yuj tas van yuji dꞌa chon̈abꞌ Susa chiꞌ. Ix yalanpaxbꞌat vin̈aj Mardoqueo chiꞌ to stevi ix dꞌa vin̈ rey, tope val syal yecꞌbꞌat jun ley chiꞌ dꞌa yibꞌan̈ ebꞌ yetchon̈abꞌ ix chiꞌ.
9 Ix lajvi chiꞌ, ix paxta vin̈aj Hatac chiꞌ, ix ul yalan vin̈ dꞌa ix Ester chiꞌ masanil tas ix yalcot vin̈aj Mardoqueo chiꞌ. 10 Ix schecanxibꞌat vin̈aj Hatac chiꞌ ix yic bꞌat yalxi vin̈ dꞌa vin̈aj Mardoqueo chiꞌ icha tic: 11 Masanil mach ayoch schecabꞌoc vin̈ rey yedꞌ masanil chon̈abꞌ ayoch dꞌa yol smacbꞌen vin̈, yojtac ebꞌ to ay jun ley tzꞌalani tato ay mach tzꞌoch dꞌa yol stiꞌ bꞌaj ay vin̈ rey dꞌa spalacio, tato man̈ avtabꞌiloc yuj vin̈ rey chiꞌ, bꞌen̈ej schami, taxon̈ej vinac ma ix. An̈ej bꞌian tato syicꞌqꞌue scꞌococh vin̈ rey chiꞌ, aton jun nabꞌa oro, schꞌoxanelta vin̈ dꞌay, a jun chiꞌ max chamlaj. A in tic, ayxo jun ujal max in avtaj yuj vin̈ rey chiꞌ, xchibꞌat ix.
12 Ix yalan vin̈aj Hatac dꞌa vin̈aj Mardoqueo chiꞌ masanil tas ix yal ix Ester chiꞌ. 13 Yuj chiꞌ ix spacanxi vin̈ tas ix yal ix chiꞌ: Man̈ a nalaj to yujn̈ej to ayach ecꞌ dꞌa spalacio vin̈ rey chiꞌ ol ach colchajoc yacbꞌan masanil ebꞌ quetchon̈abꞌ ol cham ebꞌ. 14 Tope yuj jun sjavi dꞌa quibꞌan̈ tic jun, yuj chiꞌ ix ach sicꞌchajoch reinail, yic tzon̈ a colani. Palta tato malaj tas ol al ticnaic, bꞌajam ol cot junoc mach ol on̈ colanoc, palta a ach tic ol ach satel yedꞌ masanil ebꞌ a cꞌabꞌoc, xchibꞌat vin̈.
15 Ix yalanxibꞌat ix Ester chiꞌ dꞌa vin̈ icha tic: 16 Ixic, molbꞌej masanil ebꞌ quetchon̈abꞌ cajan dꞌa chon̈abꞌ Susa tic, tzex och dꞌa tzecꞌojcꞌolal vuuj, malaj jabꞌoc tas tze vaꞌa, malaj pax tas tzeyuqꞌuej oxeoc cꞌual oxeoc acꞌval. Ol och pax ebꞌ ix tzin acꞌan servil dꞌa tzecꞌojcꞌolal vedꞌoc. Ol lajvoc chiꞌ, ol in bꞌat vil vin̈ rey chiꞌ, vachꞌchom man̈ ichoctaꞌ yalan ley. Taxon̈ej tzin cham jun, chamoc in ocabꞌi, xchibꞌat ix.
17 Ix scꞌanabꞌajej vin̈aj Mardoqueo chiꞌ masanil tas ix yal ix chiꞌ.