Ix cꞌoch ix Ester dꞌa yichan̈ vin̈ rey
5
Axo yic ix lajviecꞌ oxeꞌ cꞌual chiꞌ, ix sbꞌoan sbꞌa ix Ester chiꞌ, ix yacꞌanoch spichul ix yic sreinail. Ix lajvi chiꞌ ix cꞌoch ix dꞌa jun amacꞌ ay dꞌa stiꞌ jun yedꞌtal vin̈ rey chiꞌ, bꞌaj cꞌojanem vin̈ dꞌa scꞌojnubꞌ yic sreyal. 2 Ayic ix yilanelta vin̈ to ayecꞌ ix dꞌa stielta chiꞌ, ix schꞌoxan vin̈ to stzalaj vin̈ yedꞌ ix, ix yacꞌanelta scꞌococh vin̈ nabꞌa oro. Ix ochcꞌoch ix, ix och yubꞌyubꞌ ix dꞌa sn̈iꞌ qꞌuen cꞌococh chiꞌ. 3 Ix scꞌanbꞌan vin̈ dꞌa ix icha tic:—¿Tas tzach icꞌan reina Ester? ¿Tas tza nibꞌej? Tato tza nibꞌej tza cꞌan nan̈aloc in macbꞌen tic, syal vacꞌan dꞌayach, xchi vin̈ dꞌa ix. Ix tacꞌvi ix icha tic:
4 —Mamin rey, tato syal a cꞌool, ay jun nivan vael ix vacꞌ bꞌochajoc to tzach cot vael ticnaic yedꞌ vin̈aj Amán, yujto nivan elcꞌoch dꞌa yol in sat, xchi ix. Ix yalan vin̈ icha tic:
5 —Avtejeccot vin̈aj Amán dꞌa elan̈chamel to scꞌanabꞌajaj masanil tas snibꞌej ix reina Ester tic, xchi vin̈.
Yuj chiꞌ ix bꞌat vin̈ rey yedꞌ vin̈aj Amán dꞌa jun nivan vael ix sbꞌo ix Ester chiꞌ. 6 Ayic van yucꞌan vino ebꞌ, ix yalan vin̈ rey chiꞌ dꞌa ix icha tic:
—Cꞌan masanil tas tza nibꞌej dꞌayin, ol vacꞌ dꞌayach, vachꞌchom tza cꞌan nan̈aloc in macbꞌen tic, syal vacꞌan dꞌayach, xchi vin̈.
7 Ix yalan ix dꞌa vin̈ icha tic:
—Mamin rey, a val tas tzin nibꞌej tzin cꞌan dꞌayach aton tic: 8 Tato yel xajan in uuj, tato bꞌecan a cꞌol acꞌan tas tzin cꞌanaꞌ, schaocabꞌ a cꞌol a cotxi vael qꞌuicꞌan yedꞌ vin̈aj Amán tic. Ol in chec bꞌochaj junocxo vael, yujto te nivan elcꞌoch dꞌa yol in sat. Ato qꞌuicꞌan chiꞌ sval dꞌayach tas tzin nibꞌej, xchi ix.
Snibꞌej vin̈aj Amán smilcham vin̈aj Mardoqueo
9 Ix te tzalaj vin̈aj Amán ayic ix elta vin̈ bꞌaj ix och vael chiꞌ, palta ayic ix yilan vin̈ to ayecꞌ vin̈aj Mardoqueo dꞌa stiꞌ spalacio vin̈ rey chiꞌ, ix te cot yoval vin̈ yujto ayic ix ecꞌ vin̈ taꞌ, maj qꞌuelaj lin̈an vin̈aj Mardoqueo chiꞌ, maj empax n̈ojan vin̈. 10 A dꞌa jun rato chiꞌ maj schꞌoxel-laj schichoncꞌolal vin̈ chiꞌ. Axo yic ix cꞌoch vin̈ dꞌa spat, ix yavtancot juntzan̈ ebꞌ yamigo vin̈, ix yavtanpaxcot ix yetbꞌeyum vin̈, aton ix Zeres. 11 Ix och ijan vin̈ yicꞌanchaan̈ sbꞌa, ix yalan jantac sbꞌeyumal vin̈ dꞌa ebꞌ, tzijtum pax yuninal vin̈. Ix yalanpax vin̈ to ix sicꞌchajelta vin̈ yuj vin̈ rey dꞌa scal juntzan̈xo ebꞌ vin̈ ayoch yajalil yedꞌoc, ix acꞌchajoch vin̈ yajaliloc juntzan̈ ebꞌ vin̈ chiꞌ. 12 Ix yalanxi vin̈ icha tic:
—An̈ejtonaꞌ a inn̈ej ix in avtajbꞌat vael yedꞌ vin̈ rey dꞌa jun nivan vael yuj ix reina Ester. Avtabꞌil in pax vael yedꞌ vin̈ rey chiꞌ qꞌuicꞌan dꞌa junxo nivan vael syacꞌ ix dꞌa vin̈ rey chiꞌ. 13 Palta ayic svilanoch jun vin̈ israel scuchan Mardoqueo cꞌojanem dꞌa stiꞌ spalacio vin̈ rey chiꞌ, masanil juntzan̈ tas ay dꞌayin tic, man̈xa jabꞌoc yelcꞌoch dꞌa yol in sat, xchi vin̈.
14 Yuj chiꞌ ix yal ix yetbꞌeyum vin̈ chiꞌ yedꞌ ebꞌ yamigo vin̈ chiꞌ icha tic:
—Acꞌ bꞌochajem junoc te teꞌ jun chꞌan̈il tzꞌajqꞌue steel. Tza cꞌanan dꞌa vin̈ rey chiꞌ, axo qꞌuicꞌan qꞌuin̈ibꞌal sqꞌue dꞌun̈an vin̈aj Mardoqueo chiꞌ dꞌa teꞌ, yic vachꞌ tzalajcꞌolal tzach bꞌat dꞌa jun nivan vael yedꞌ vin̈ rey chiꞌ, man̈xa jabꞌoc tas tza naꞌa, xchi ebꞌ.
A jun pensar chiꞌ ix scha scꞌol vin̈aj Amán chiꞌ, ix schecan vin̈ bꞌojoc jun te teꞌ chiꞌ.