Ix icꞌjichaan̈ vin̈aj Mardoqueo
6
A val dꞌa jun acꞌval chiꞌ, maj ochlaj svayan̈ vin̈ rey chiꞌ, yuj chiꞌ ix yal vin̈ to tzꞌicꞌchajcot juntzan̈ bꞌaj tzꞌibꞌabꞌil yabꞌixal tastac ujinac dꞌa yol smacbꞌen vin̈ chiꞌ, ix avtaj yabꞌ vin̈. 2 Ix ilchaj bꞌaj syalaꞌ to a vin̈aj Mardoqueo ix alani tas yalnac vin̈aj Bigtán yedꞌ vin̈aj Teres, stan̈vumal stiꞌ spalacio vin̈ rey chiꞌ. Ix sna ebꞌ vin̈ tas syutej smilancham vin̈aj rey Asuero chiꞌ. 3 Yuj chiꞌ ix scꞌanbꞌej vin̈ rey chiꞌ dꞌa ebꞌ vin̈ ayoch yopisio yuj vin̈:—¿Tas acꞌbꞌil yedꞌ tas utajnac vin̈aj Mardoqueo yuj jun tas scꞌulejnac vin̈ tic? xchi vin̈. Ix tacꞌvi ebꞌ vin̈:
—Malaj val jabꞌoc tas acꞌbꞌil dꞌa vin̈, xchi ebꞌ vin̈.
4 Ix yalan vin̈ rey chiꞌ icha tic:
—¿Mach jun ayecꞌ dꞌa yamaqꞌuil palacio tic? Ixiquec eyilaꞌ, xchi vin̈. A val taꞌ van sjavi vin̈aj Amán yic tzul scꞌanan vin̈ dꞌa vin̈ rey chiꞌ to tzꞌacꞌchajqꞌue locan vin̈aj Mardoqueo dꞌa jun te teꞌ toxo ix schec bꞌojoc vin̈.
5 Yuj chiꞌ ix yal ebꞌ vin̈ schecabꞌ vin̈ rey chiꞌ:
—A vin̈aj Amán ayeqꞌui, xchi ebꞌ vin̈.
—Ix yalan vin̈ rey chiꞌ to tzꞌavtajoch vin̈ bꞌaj ayecꞌ vin̈ chiꞌ.
6 Ix och vin̈aj Amán chiꞌ bꞌian, ix scꞌanbꞌan vin̈ rey chiꞌ dꞌa vin̈ icha tic:
—¿Tas smoj tzꞌutaj junoc vin̈ vinac, tato tzin nibꞌej svicꞌchaan̈ vin̈? xchi vin̈.
Ix snaan vin̈aj Amán chiꞌ dꞌa spensar icha tic: ¿Machto val junoc ol yicꞌchaan̈ vin̈ rey tic? A inn̈ej toni, xchi vin̈. 7 Yuj chiꞌ ix tacꞌvi vin̈ icha tic:
—Mamin rey, a val tas smoj tzꞌutaj junoc vinac chiꞌ, 8 to tzꞌicꞌchajcot junoc a pichul tza cꞌan dꞌa opisio tic yedꞌ nocꞌ a chej tza cꞌantaxoni. Axo dꞌa sjolom nocꞌ tzꞌacꞌchajqꞌue junoc yelvanubꞌ icha corona, a schꞌoxani to ic nocꞌ. 9 Axo jun a pichul chiꞌ yedꞌ nocꞌ chej chiꞌ tzꞌacꞌchaj dꞌa junoc ebꞌ vin̈ yajal to nivan yelcꞌoch yopisio tic, syacꞌanoch a pichul jun vin̈ tza nibꞌej tzicꞌchaan̈ chiꞌ. Tzꞌacꞌchajqꞌue vin̈ dꞌa yibꞌan̈ nocꞌ a chej chiꞌ, slajvi chiꞌ squetzchaj nocꞌ dꞌa yalan̈ vin̈ dꞌa yoltac calle yedꞌ dꞌa parque. Syalan vin̈ quetzjinac nocꞌ chiꞌ icha tic: Ichaton tic tzꞌaj yicꞌjichaan̈ junoc vin̈ vinac snibꞌej vin̈ rey syicꞌchaan̈, xchiocabꞌi, xchi vin̈aj Amán chiꞌ.
10 Ix lajvi chiꞌ, ix yalan vin̈ rey chiꞌ dꞌa vin̈aj Amán chiꞌ icha tic:
—Ixic dꞌa elan̈chamel, icꞌbꞌat cꞌapac in pichul chiꞌ yedꞌ nocꞌ in chej chiꞌ, icha val ix aj alan chiꞌ, icha val chiꞌ tzutej a bꞌoan vin̈aj Mardoqueo vin̈ israel, aton vin̈ cꞌojanem dꞌa stiꞌ in palacio tic. Malajocabꞌ junoc tas ix al chiꞌ to max a cꞌulej, xchi vin̈.
11 Yuj chiꞌ ix yicꞌbꞌat cꞌapac pichul chiꞌ vin̈aj Amán chiꞌ yedꞌ nocꞌ chej chiꞌ, ix yacꞌanoch vin̈ dꞌa vin̈aj Mardoqueo chiꞌ. Ix squetzan nocꞌ chej chiꞌ vin̈ dꞌa yalan̈ vin̈, ix ecꞌ vin̈ dꞌa yoltac calle yedꞌ dꞌa parque, ix yalan vin̈ icha tic: Ichaton tic tzꞌaj yicꞌjichaan̈ junoc mach to snibꞌej vin̈ rey syicꞌchaan̈, xchi vin̈.
12 Ayic ix lajvi yicꞌjiecꞌ vin̈aj Mardoqueo chiꞌ yuj vin̈, ix bꞌat vin̈ yacꞌxican vin̈ dꞌa stiꞌ spalacio vin̈ rey chiꞌ, axo vin̈ elan̈chamel ix paxcan vin̈ dꞌa spat. Te cuscꞌolal ix aj vin̈, ix smacan sat vin̈ yuj qꞌuixvelal. 13 Ix yalan vin̈ dꞌa ix yetbꞌeyum yedꞌ dꞌa ebꞌ yamigo masanil tas ix utaj vin̈ chiꞌ, yuj chiꞌ ix yal ebꞌ icha tic:
—A vin̈aj Mardoqueo chiꞌ, israel vin̈, yuj chiꞌ van slajviem opisio tic dꞌa spatic vin̈. Man̈ ol acꞌlaj ganar vin̈, palta to a vin̈ ol ach acꞌan ganar, xchi ebꞌ.
14 Manto lajvi yalan ebꞌ icha chiꞌ, ix cꞌoch ebꞌ vin̈ schecabꞌ vin̈ rey chiꞌ dꞌa elan̈chamel yic tzꞌicꞌjibꞌat vin̈aj Amán chiꞌ dꞌa jun nivan vael ix schec bꞌojoc ix Ester chiꞌ.