—Cꞌan tas tza nibꞌej dꞌayin, ol vacꞌ dꞌayach, vachꞌchom a nan̈aloc in macbꞌen tic tza cꞌanaꞌ, xchi vin̈.

3 Ix tacꞌvi ix Ester chiꞌ icha tic:

—Mamin rey, tato vachꞌ in dꞌa yol a sat, tato scha a cꞌool tas tzin cꞌan dꞌayach, an̈ej val tas tzin cꞌan dꞌayach to max in a cha miljocchamoc, max champaxlaj ebꞌ vetchon̈abꞌ. 4 Yujto a in tic yedꞌ ebꞌ vetchon̈abꞌ chiꞌ, ix on̈ chon̈chaji yic tzon̈ satjiel dꞌa juneln̈ej. Comonoc val ton̈ej on̈ chon̈chajbꞌat checabꞌoc, tato icha chiꞌ tecan man̈ smojoc to sviqꞌuecꞌ a tiempo, ocxo jun, to ol on̈ satjoquel dꞌa juneln̈ej, xchi ix.

5 Ix scꞌanbꞌan vin̈aj rey Asuero chiꞌ icha tic:

—¿Mach jun chiꞌ? ¿Bꞌajtil ay jun mach snaan jun tzal chiꞌ? xchi vin̈.

6 Ix yalan ix icha tic:

—A vin̈ ajcꞌol chuc spensar chiꞌ, aton vin̈aj Amán tic, xchi ix.

A val yic ix yabꞌan jun lolonel vin̈aj Amán chiꞌ, sacxon̈ej ix aj yilji sat vin̈ yuj xivelal dꞌa yichan̈ vin̈ rey yedꞌ dꞌa yichan̈ ix reina Ester chiꞌ. 7 Ix qꞌue van vin̈ rey chiꞌ, ix te cot yoval vin̈, ix elta vin̈ dꞌa yol pat bꞌaj van sva ebꞌ chiꞌ. Ix el vin̈ bꞌaj ay yamaqꞌuil spalacio. Palta axo vin̈aj Amán chiꞌ, ix yilan vin̈ to van yacꞌjioch chamel dꞌa yibꞌan̈ vin̈, ix cann̈ej vin̈ bꞌaj ix va ebꞌ chiꞌ, ix tevioch vin̈ dꞌa ix reina Ester chiꞌ to tzꞌacꞌji nivancꞌolal vin̈ yuj ix. 8 Ayic ix ochxicꞌoch vin̈ rey bꞌaj ix va chiꞌ, ix yilan vin̈ to cumanem vin̈aj Amán chiꞌ dꞌa stzꞌey bꞌaj cꞌojanem ix reina chiꞌ. Ix yalan vin̈ rey chiꞌ icha tic:

—¿Tom tza nibꞌej tzixtej ix reina dꞌa vichan̈ dꞌa yol in pat tic? xchi vin̈.

Ayic ix yalan juntzan̈ lolonel vin̈ rey chiꞌ, elan̈chamel ix macchaj sat vin̈aj Amán chiꞌ yuj ebꞌ vin̈ schecabꞌ vin̈ rey chiꞌ. 9 Ix yalan jun vin̈ checabꞌ scuchan Harbona icha tic:

—Mamin rey, a dꞌa spat vin̈aj Amán tic, ix yacꞌ bꞌochajem jun te teꞌ vin̈ jun chꞌan̈il ix ajqꞌue steel. Ataꞌ ol qꞌue locan vin̈aj Mardoqueo yuj vin̈ yalani, aton vin̈ scꞌulejnac jun tas vachꞌ dꞌayach, xchi vin̈.

—Aqꞌuecqꞌue locan vin̈aj Amán tic dꞌa jun te teꞌ chiꞌ, xchi vin̈ rey chiꞌ.

10 Yuj chiꞌ ix qꞌue locan vin̈aj Amán chiꞌ dꞌa teꞌ, aton teꞌ ix sbꞌoqꞌue vin̈ yuj vin̈aj Mardoqueo yalani. Icha chiꞌ ix aj sicbꞌi yoval scꞌol vin̈ rey chiꞌ.