Jun ley ix alchaj yuj svachꞌiloc ebꞌ israel
8
A dꞌa jun cꞌu chiꞌ, masanil tas ay dꞌa vin̈aj Amán, vin̈ ajcꞌol yajoch dꞌa ebꞌ israel, ix yacꞌ vin̈ rey chiꞌ dꞌa ix Ester. Axo vin̈aj Mardoqueo chiꞌ, nivan yopisio vin̈ ix acꞌji yuj vin̈ rey chiꞌ, yujto toxo ix yal ix Ester chiꞌ to te ayto yuj sbꞌa ix yedꞌ vin̈. 2 Ix lajvi chiꞌ, ix yicꞌanel qꞌuen scolcꞌabꞌ vin̈ rey chiꞌ, qꞌuen ix icꞌchajecꞌ dꞌa vin̈aj Amán, ix yacꞌanoch qꞌuen vin̈ dꞌa vin̈aj Mardoqueo chiꞌ. Axo masanil tas ay dꞌa vin̈aj Amán acꞌbꞌil dꞌa ix Ester chiꞌ, ix acꞌjioch dꞌa yol scꞌabꞌ vin̈aj Mardoqueo chiꞌ. 3 Ix lajvi chiꞌ ix cꞌochxi ix Ester dꞌa yichan̈ vin̈ rey chiꞌ. Ix em cuman ix, ix och ijan ix yoqꞌui. Ix tevi ix to tzꞌicꞌjiel yopisio jun ley te chuc ix sbꞌo vin̈aj Amán chiꞌ. Ix yalan ix to max elcꞌoch tas syal jun ley chiꞌ dꞌa ebꞌ israel. 4 Ix yacꞌanelta scꞌococh vin̈ rey chiꞌ nabꞌa oro dꞌa ix, ix qꞌue lin̈an ix dꞌa yichan̈ vin̈. 5 Ix yalan ix icha tic:—Mamin rey, tato vachꞌ in dꞌa yol a sat, tato vachꞌ tas tzin cꞌan tic tzabꞌi, tato dꞌa val yel xajan in uuj, comonoc tzacꞌ tzꞌibꞌchajbꞌat junocxo ley yic tzꞌel yopisio tas syal jun ley ix yacꞌbꞌat vin̈aj Amán yuninal vin̈aj Hamedata yin̈tilal vin̈aj Agag dꞌa masanil yol a macbꞌen bꞌaj syalaꞌ to satjiel masanil ebꞌ vetchon̈abꞌ. 6 Man̈ ol techaj vuj vilan tas ol javoc dꞌa yibꞌan̈ masanil ebꞌ vetchon̈abꞌ yuj tas ol aj co satjieli, xchi ix.
7 Ix yalan vin̈aj rey Asuero chiꞌ dꞌa ix yedꞌ dꞌa vin̈aj Mardoqueo chiꞌ icha tic:
—A vin̈aj Amán chiꞌ locanxoqꞌue vin̈ dꞌa te teꞌ, yujto chuc tas ix snachaan̈ vin̈ dꞌa spatic ebꞌ eyetchon̈abꞌ. Masanil tas ay dꞌa vin̈, toxo ix vacꞌ dꞌayach. 8 A ticnaic tzꞌibꞌejbꞌat icha tas tze na yuj svachꞌiloc masanil ebꞌ eyetchon̈abꞌ chiꞌ. Tzeyacꞌanoch in bꞌi yedꞌ in sello dꞌay.
Yujto a junoc ley bꞌaj ayoch in bꞌi yedꞌ in sello dꞌay, maxtzac yal-laj yeqꞌui, xchi vin̈.
9 Elan̈chamel ix avtaj ebꞌ vin̈ stzꞌibꞌum vin̈ rey chiꞌ, ayic 23 yoch yoxil uj scuch Siván. Masanil tas ix yal vin̈aj Mardoqueo chiꞌ ix tzꞌibꞌchajbꞌat dꞌa masanil ebꞌ israel, dꞌa ebꞌ vin̈ yajal, dꞌa ebꞌ vin̈ yajalil ebꞌ soldado, dꞌa masanil ebꞌ vin̈ yajal yaj dꞌa 127 macan̈il yaj smacbꞌen vin̈ rey chiꞌ, scotto dꞌa India masanto scꞌoch dꞌa Etiopía. Ix tzꞌibꞌchajbꞌat dꞌa stiꞌ yedꞌ dꞌa sletra junjun chon̈abꞌ yedꞌ dꞌa stiꞌ ebꞌ israel. 10 Ix ochpax sello vin̈aj rey Asuero dꞌay yic scheclaji to a vin̈ tzꞌalani. A ebꞌ ix bꞌat spuc jun ley chiꞌ, a dꞌa yibꞌan̈ nocꞌ chej jelan sbꞌeyi, aton nocꞌ schej vin̈ rey ayecꞌ dꞌa yedꞌtal, ataꞌ ix qꞌue ebꞌ. 11 A dꞌa jun ley ix yalbꞌat vin̈ rey chiꞌ, yaln̈ej tas chon̈abꞌil bꞌaj ayecꞌ ebꞌ israel chiꞌ, syal smolbꞌan sbꞌa ebꞌ yic scolan sbꞌa ebꞌ. Tato ay ebꞌ ajcꞌol yaln̈ej tas chon̈abꞌil scꞌoch dꞌa ebꞌ yedꞌ syamcꞌabꞌ yic oval, syal satanel ebꞌ ajcꞌol chiꞌ ebꞌ. Yedꞌ pax yetbꞌeyum yedꞌ yalyuninal ebꞌ ajcꞌol chiꞌ syal satanel ebꞌ. Syicꞌancanecꞌ ebꞌ tas ay dꞌa ebꞌ ajcꞌol chiꞌ. 12 A juntzan̈ tic, junn̈ej cꞌual tzꞌaj sbꞌo dꞌa masanil yol smacbꞌen vin̈aj rey Asuero chiꞌ, aton dꞌa jun cꞌu chequel yajcan dꞌa 13 yoch slajchavil uj scuch Adar. 13 A scopiail jun ley chiꞌ, yovalil spucax dꞌa junjun macan̈il yaj smacbꞌen vin̈ rey chiꞌ, yovalil tzꞌalchajel dꞌa scal masanil chon̈abꞌ yujto ley yaji, yic vachꞌ a dꞌa jun cꞌu chiꞌ, masanil ebꞌ israel chiꞌ syacꞌ lista sbꞌa ebꞌ yic spacan sbꞌa ebꞌ dꞌa ebꞌ ajcꞌol chiꞌ. 14 A ebꞌ vin̈ ix bꞌat yal jun ley chiꞌ, elan̈chamel ix checjibꞌat ebꞌ vin̈ yuj vin̈ rey chiꞌ, ix qꞌue ebꞌ vin̈ dꞌa yibꞌan̈ nocꞌ schej vin̈. Ix alchajpaxel jun ley chiꞌ dꞌa chon̈abꞌ Susa chiꞌ, bꞌabꞌel chon̈abꞌ yaj dꞌa yol smacbꞌen vin̈ rey chiꞌ.
15 Ayic ix elta vin̈aj Mardoqueo dꞌa sdespacho vin̈ rey chiꞌ, ayoch spichul vin̈ yic yopisio yuuj, qꞌuicꞌmutzꞌinac yedꞌ sacsac yilji. Ayqꞌue jun nivan corona nabꞌa oro dꞌa sjolom vin̈, ayoch jun xotil vin̈ nabꞌa lino qꞌuicꞌmutzꞌinac yilji. Masanil ebꞌ anima ay dꞌa chon̈abꞌ Susa chiꞌ, ix avajqꞌue ebꞌ yuj tzalajcꞌolal. 16 Yuj chiꞌ a ebꞌ israel ix el lenaj ix yil ebꞌ, ix te tzalaj ebꞌ, yujto ix icꞌjichaan̈ ebꞌ ix yabꞌi. 17 Ayic ix cꞌoch jun ley chiꞌ dꞌa masanil lugar yedꞌ dꞌa junjun chon̈abꞌ, masanil ebꞌ israel ix te tzalaji. Ix yacꞌanoch jun qꞌuin̈ ebꞌ, ix va ebꞌ. Tzijtum ebꞌ anima dꞌa junjun chon̈abꞌ ix yacꞌoch sbꞌa israelal yedꞌ ebꞌ, yujto xiv ebꞌ dꞌa ebꞌ israel chiꞌ.