Ix acꞌji ganar ebꞌ yajcꞌol ebꞌ israel
9
Ayic 13 yoch slajchavil uj scuch Adar, aton jun cꞌu chiꞌ chequel yaji yic tzꞌelcꞌoch tas syal jun ley albꞌilel yuj vin̈ rey chiꞌ, aton dꞌa jun cꞌual chiꞌ satjiel ebꞌ israel yuj ebꞌ ajcꞌol chiꞌ yalani. Axo ix aji, maj elcꞌochlaj icha chiꞌ, palta to a ebꞌ ajcꞌol chiꞌ ix acꞌji ganar yuj ebꞌ israel chiꞌ. 2 A dꞌa masanil yol smacbꞌen vin̈aj rey Asuero chiꞌ, ix smolbꞌej sbꞌa masanil ebꞌ israel dꞌa junjun chon̈abꞌ bꞌajtac ay ebꞌ. Ix syamanoch ebꞌ yacꞌan oval yedꞌ ebꞌ ix snibꞌej satanel ebꞌ chiꞌ. Man̈xa junoc mach ix stecꞌbꞌej sbꞌa dꞌa yichan̈ ebꞌ israel chiꞌ, yujto toxo ix och xivcꞌolal dꞌa scal ebꞌ anima smasanil. 3 Masanil ebꞌ vin̈ nivac yajal ay dꞌa junjun macan̈ smacbꞌen vin̈ rey chiꞌ yedꞌ ebꞌ vin̈ nivac yopisio, ix yacꞌoch sbꞌa ebꞌ vin̈ yedꞌ ebꞌ israel, yujto ix te xiv ebꞌ vin̈ dꞌa vin̈aj Mardoqueo chiꞌ, 4 yujto te nivan yopisio vin̈ dꞌa spalacio vin̈ rey chiꞌ. A sbꞌinajnaquil vin̈ ix te pucax dꞌa masanil chon̈abꞌ, yujto dꞌa junjun cꞌu ste nivanbꞌi yopisio vin̈ chiꞌ. 5 Ix miljicham ebꞌ ajcꞌol chiꞌ dꞌa qꞌuen espada yuj ebꞌ israel chiꞌ. Ix satjiel ebꞌ smasanil, ix scꞌulej ebꞌ israel chiꞌ icha val tas snibꞌej. 6-10 A dꞌa chon̈abꞌ Susa chiꞌ, ay 500 ebꞌ vin̈ vinac ix miljicham yuj ebꞌ israel chiꞌ, palta malaj val jabꞌoc tastac ay dꞌa ebꞌ vin̈ ix cham chiꞌ ix yiqꞌuecꞌ ebꞌ. A dꞌa scal ebꞌ vin̈ ix cham chiꞌ, ix cham ebꞌ vin̈ tic: Vin̈aj Parsandata, vin̈aj Dalfón, vin̈aj Aspata, vin̈aj Porata, vin̈aj Adalías, vin̈aj Aridata, vin̈aj Parmasta, vin̈aj Arisai, vin̈aj Aridai yedꞌ vin̈aj Vaizata. A vin̈aj Amán ajcꞌol dꞌa ebꞌ israel, vin̈ yuninal vin̈aj Hamedata, a vin̈ ay yuninal ebꞌ vin̈ slajun̈van̈il.11 A dꞌa jun cꞌu chiꞌ, ayic ix yabꞌan vin̈ rey jantac sbꞌisul ebꞌ anima ix cham dꞌa chon̈abꞌ Susa chiꞌ, aton bꞌaj cajan vin̈, 12 ix yalan vin̈ dꞌa ix reina Ester icha tic:
—A ebꞌ etchon̈abꞌ toxo ix smilcham 500 ebꞌ vin̈ vinac ebꞌ yedꞌ lajun̈van̈ ebꞌ vin̈ yuninal vin̈aj Amán dꞌa chon̈abꞌ Susa tic. Ocxom pax dꞌa juntzan̈xo chon̈abꞌ dꞌa yol in macbꞌen tic, jantac am tas ix uji. Al dꞌayin tasto tza nibꞌej, ol vacꞌ dꞌayach, xchi vin̈.
13 Ix tacꞌvi ix Ester chiꞌ icha tic:
—Mamin rey, tato syal a cꞌool, tzalaꞌ to a qꞌuicꞌan scꞌulejxi ebꞌ vetchon̈abꞌ dꞌa chon̈abꞌ Susa tic icha tas ix scꞌulej ebꞌ ticnaic icha yalan a ley. Tzalan paxi to sqꞌue locan snivanil lajun̈van̈ ebꞌ vin̈ yuninal vin̈aj Amán chiꞌ dꞌa te teꞌ, xchi ix.
14 Ix yalan vin̈ rey to scꞌulaj icha chiꞌ. Ix alchajel jun ley chiꞌ dꞌa masanil yol chon̈abꞌ Susa chiꞌ. Ix qꞌue locan snivanil lajun̈van̈ ebꞌ yuninal vin̈aj Amán chiꞌ.
15 Masanil ebꞌ israel cajan dꞌa chon̈abꞌ Susa chiꞌ, ix smolbꞌejxi sbꞌa ebꞌ ayic 14 yoch uj scuch Adar, ix smilancham 300 xo ebꞌ vin̈ vinac ebꞌ, palta malaj jabꞌoc tas ay dꞌa ebꞌ anima chiꞌ ix yiqꞌuecꞌ ebꞌ. 16-17 Masanil ebꞌ israel cajan dꞌa juntzan̈xo chon̈abꞌ dꞌa smacbꞌen vin̈ rey chiꞌ, ix smolbꞌejpax sbꞌa ebꞌ ayic 13 yoch uj chiꞌ, yic scolan sbꞌa ebꞌ dꞌa ebꞌ ajcꞌol chiꞌ. 75 mil ebꞌ ajcꞌol chiꞌ ix smilcham ebꞌ, palta malaj jabꞌoc tas ay dꞌa ebꞌ ix yiqꞌuecꞌ ebꞌ. Ayic 14 yoch uj chiꞌ, ix och vaan ebꞌ smilancham ebꞌ anima chiꞌ, ix yacꞌanoch qꞌuin̈ ebꞌ yedꞌ nivac vael dꞌa tzalajcꞌolal.
18 Axo ebꞌ israel cajan dꞌa chon̈abꞌ Susa chiꞌ, ix smolbꞌejpax sbꞌa ebꞌ yic scolan sbꞌa ebꞌ dꞌa 13 yoch uj yedꞌ dꞌa 14, axo dꞌa 15 ix och vaan ebꞌ smilancham ebꞌ anima chiꞌ, ix yacꞌanoch qꞌuin̈ ebꞌ yedꞌ nivac vael dꞌa tzalajcꞌolal. 19 Axo pax ebꞌ israel cajan dꞌa juntzan̈xo chon̈abꞌ yedꞌ dꞌa juntzan̈ aldea malaj smuroal, a dꞌa 14 yoch uj scuch Adar, ataꞌ ix yacꞌoch qꞌuin̈ ebꞌ dꞌa tzalajcꞌolal, ix sian vael ebꞌ dꞌay junjun.
A qꞌuin̈ yic Purim
20 Ix schecan tzꞌibꞌchaj masanil juntzan̈ tas ix uji tic vin̈aj Mardoqueo, ix schecan vin̈ to tzꞌacꞌchajbꞌat dꞌa masanil ebꞌ yetisraelal vin̈ cajan dꞌa masanil yol smacbꞌen vin̈aj rey Asuero chiꞌ, ebꞌ cajan dꞌa slacꞌanil yedꞌ ebꞌ cajan dꞌa najat. 21 Ix yalanbꞌat vin̈ to dꞌa 14 yedꞌ dꞌa 15 yoch uj Adar dꞌa junjun abꞌil, yovalil tzꞌoch qꞌuin̈, 22 yujto a dꞌa juntzan̈ cꞌual chiꞌ a ebꞌ israel ix satanel ebꞌ yajcꞌool. A val dꞌa jun uj chiꞌ, a scuscꞌolal ebꞌ yedꞌ yoqꞌuelcꞌolal, ix meltzajcanoch dꞌa tzalajcꞌolal. Yuj chiꞌ a dꞌa jun cꞌu chiꞌ ix yacꞌoch qꞌuin̈ ebꞌ yedꞌ nivac vael, ix laj sian vael ebꞌ dꞌay junjun, ix yacꞌan scolval ebꞌ dꞌa ebꞌ mebꞌaꞌ. 23 A jun ley ix schec tzꞌibꞌchaj vin̈aj Mardoqueo chiꞌ, ix ochcan sbꞌeybꞌaloc ebꞌ israel chiꞌ. 24 Yujto a vin̈aj Amán ajcꞌol dꞌa ebꞌ israel chiꞌ, ix yacꞌoch suerte vin̈ dꞌa yibꞌan̈ ebꞌ tas cꞌual satjiel ebꞌ smasanil, 25 palta yujto ix bꞌat tevi ix Ester dꞌa vin̈ rey, yuj chiꞌ ix yaqꞌuelta jun ley vin̈ to a masanil chucal ix sna vin̈aj Amán chiꞌ scꞌulej dꞌa ebꞌ israel chiꞌ, a dꞌa yibꞌan̈ vin̈ smeltzajcani. Yuj chiꞌ ix acꞌjiqꞌue locan vin̈ yedꞌ ebꞌ yuninal dꞌa te teꞌ. 26 Yuj chiꞌ a juntzan̈ cꞌual chiꞌ ix scuchcan Purim. A jun lolonel chiꞌ syalelcꞌochi, juntzan̈ tastac scꞌan ebꞌ dꞌa suerteal.
Icha syal tas ix tzꞌibꞌejbꞌat vin̈aj Mardoqueo chiꞌ yedꞌ tas ix scꞌulej ebꞌ, 27 a ix sbꞌeybꞌalej ebꞌ israel chiꞌ yedꞌ yin̈tilal yedꞌ pax masanil ebꞌ syacꞌoch sbꞌa israelal. Yovalil syacꞌoch chabꞌ cꞌual qꞌuin̈ chiꞌ ebꞌ dꞌa junjun abꞌil, icha scꞌual ix aj yalchajcani. 28 Icha chiꞌ ix ajcani yic snachajcot yuj ebꞌ yin̈tilal Israel dꞌa junjun macan̈ smacbꞌen vin̈ rey yedꞌ dꞌa junjun chon̈abꞌ to yovalil snacot ebꞌ, syacꞌanoch qꞌuin̈ ebꞌ yic Purim dꞌa scꞌual ix checlajcan chiꞌ dꞌa masanil tiempo. 29 Axo ix reina Ester yisilcan vin̈aj Abihail yedꞌ vin̈aj Mardoqueo vin̈ israel, a dꞌa sbꞌi yopisio ebꞌ chiꞌ, ix schec ebꞌ tzꞌibꞌchajbꞌat yuj qꞌuin̈ yic Purim chiꞌ, yic svachꞌ acꞌchajoch yip jun ix schec bꞌabꞌlaj tzꞌibꞌchajbꞌat ebꞌ. 30 Ix schecan ebꞌ pucchajbꞌat dꞌa masanil ebꞌ yetisraelal ebꞌ cajan dꞌa 127 macan̈ yaj smacbꞌen vin̈aj rey Asuero chiꞌ. Ix acꞌjibꞌat stzatzil scꞌol ebꞌ yetisraelal ebꞌ chiꞌ yuuj. 31 Ix lajvi chiꞌ, ix alchaji to yovalil tzꞌoch qꞌuin̈ yic Purim dꞌa scꞌual chequelxo ix ajcani, icha val ix yutej vin̈aj Mardoqueo yedꞌ ix reina Ester chiꞌ yalani. Yovalil scꞌanabꞌajej ebꞌ yedꞌ pax yin̈tilal ebꞌ yic snachajcot tzecꞌojcꞌolal yedꞌ cuscꞌolal. 32 A jun checnabꞌil ix yacꞌ ix Ester chiꞌ, a tzꞌalani tas tzꞌaj yoch qꞌuin̈ chiꞌ. A jun tic ix schec ix tzꞌibꞌchajcani.