Nehemías sbꞌi jun libro tic, yujto a yabꞌixal vin̈aj Nehemías syal dꞌay. Syalanpax yuj tas aj smeltzajnacxi ebꞌ israel xidꞌnac icha presoal dꞌa Babilonia yedꞌ tas aj sbꞌonacxiqꞌue smuroal Jerusalén. A vin̈aj Nehemías chiꞌ, checbꞌilcot vin̈ yuj vin̈aj rey Artajerjes sreyal Persia. Aton tic syal capítulo 1 yedꞌ 2. Axo dꞌa capítulo 3 masanto dꞌa 7, syalcoti tas ajnac schecjicot vin̈ yic tzul sbꞌoanxi smuroal chon̈abꞌ Jerusalén vin̈. A vin̈ cuchbꞌannac ebꞌ anima dꞌa jun munlajel chiꞌ, yalannac vin̈ dꞌa ebꞌ to syacꞌoch spensar ebꞌ dꞌa scꞌaybꞌubꞌal Dios, yic vachꞌ tzꞌajecꞌ ebꞌ dꞌa snación chiꞌ.

Axo dꞌa capítulo 8 masanto dꞌa 10, syal yuj vin̈aj Esdras, tas yutejnac vin̈ yavtan scꞌaybꞌubꞌal Dios dꞌa yichan̈ masanil anima molanecꞌ dꞌa jun cꞌu. Ayic yabꞌannac masanil ebꞌ anima chiꞌ, yalnacqꞌueta smul ebꞌ dꞌa Dios. Axo dꞌa capítulo 11 masanto dꞌa 13, syalcot yuj ebꞌ smunlaj dꞌa scajnubꞌ Dios, syalanpax tas ajnac yoch smuroal chon̈abꞌ chiꞌ dꞌa yol scꞌabꞌ Dios, syalanpaxcan tastac bꞌonacxicani.