Esdras sbꞌi jun libro tic, yujto syalcot yabꞌixal vin̈aj Esdras dꞌay yedꞌ vin̈aj Nehemías. Junn̈ej syutej ebꞌ vin̈ yalancot yabꞌixal ebꞌ aj Judá. Junn̈ej pax syutej ebꞌ vin̈ yalancot yabꞌixal juntzan̈ tas ujinac. Palta chꞌocchꞌoc ix yutej ebꞌ scꞌaybꞌan dꞌa yibꞌan̈ junjun macan̈. A vin̈aj Esdras, a vin̈ scꞌaybꞌan ebꞌ yetisraelal dꞌa scꞌaybꞌubꞌal Dios, yic vachꞌ syutej ebꞌ yoch ejmelal dꞌa Dios. Axo pax vin̈aj Nehemías vin̈ gobernador. A tas nabꞌil yuj vin̈aj Nehemías chiꞌ to sbꞌochajxiqꞌue smuroal chon̈abꞌ Jerusalén. Snaanpax vin̈ tas syutej smunlaj yedꞌ ebꞌ anima, tas pax syutej ebꞌ stan̈van sbꞌa dꞌa yol schon̈abꞌ.

A vin̈aj Esdras chiꞌ, a vin̈ tzꞌibꞌjinacpax yabꞌixal jayvan̈ ebꞌ aj Judá xidꞌnac icha presoal, ayic spaxnacxicot ebꞌ yedꞌ vin̈aj Zorobabel, aycan sbꞌi ebꞌ dꞌa capítulo 1 yedꞌ 2. Axo dꞌa capítulo 3 masanto dꞌa 6, ataꞌ syalcot tas ajnac sbꞌochajxiqꞌue stemplo Dios. Syalanpax vin̈aj Esdras chiꞌ tas aj smeltzajnacxi vin̈ yedꞌ ebꞌ aybꞌat icha presoal yedꞌoc, tas pax yutejnac vin̈ yalan dꞌa ebꞌ anima to syacꞌxioch spensar ebꞌ dꞌa Dios. Aton syalcan dꞌa capítulo 7 masanto dꞌa 10.