A Chꞌan̈ Libro
ESDRAS
A sley vin̈aj Ciro
1
Ayic bꞌabꞌel abꞌil yoch vin̈aj Ciro reyal dꞌa Persia, ix elcꞌoch slolonel Jehová yalnaccanel vin̈aj Jeremías schecabꞌ. A Jehová ix acꞌan sna vin̈aj rey Ciro chiꞌ, yuj chiꞌ ix yaqꞌuelta jun checnabꞌil vin̈. Ix schecan vin̈ alchajel dꞌa masanil yol smacbꞌen, ix schecanpax vin̈ pucchajel abꞌix, syalan icha tic: 2 A in Ciro in tic sreyal in Persia, a in sval icha tic: A Jehová sDiosal satchaan̈, aꞌ ix acꞌanoch masanil nación dꞌa sat lum tic dꞌa yol in cꞌabꞌ. Aꞌ ix alan dꞌayin to tzin bꞌoqꞌue scajnubꞌ dꞌa Jerusalén dꞌa yol yic Judá. 3 Yuj chiꞌ, yaln̈ej mach ex schon̈abꞌ ex Jehová, colvajocabꞌ Jehová e Diosal chiꞌ eyedꞌoc. A ticnaic ixiquec dꞌa Jerusalén dꞌa yol yic Judá, tze bꞌoanxiqꞌue scajnubꞌ Jehová e Diosal chiꞌ taꞌ. 4 Yaln̈ej mach ex ix to ex can dꞌa tic, tato e gana tzex pax dꞌa Jerusalén, colvajocabꞌ ebꞌ cajan dꞌa e lacꞌanil chiꞌ, yacꞌocabꞌ qꞌuen oro ebꞌ, qꞌuen plata yedꞌ pax tastac yedꞌ nocꞌ molbꞌetzal nocꞌ dꞌayex. Yacꞌocabꞌ pax yofrenda ebꞌ yuj scajnubꞌ Dios dꞌa Jerusalén chiꞌ, xchi jun checnabꞌil chiꞌ.5 Yuj chiꞌ ix yacꞌ lista sbꞌa ebꞌ yajalil dꞌa scal ebꞌ yin̈tilal Judá, dꞌa scal ebꞌ yin̈tilal Benjamín yedꞌ masanil ebꞌ sacerdote yedꞌ ebꞌ levita, aton ebꞌ bꞌaj ix lolon Jehová dꞌa spensar to sbꞌat ebꞌ dꞌa Jerusalén yic bꞌat sbꞌoanxiqꞌue scajnubꞌ Jehová ebꞌ. 6 Axo masanil ebꞌ anima cajan dꞌa slacꞌanil ebꞌ, ix yacꞌ qꞌuen oro ebꞌ, qꞌuen plata, nocꞌ molbꞌetzal nocꞌ, tastac te caro stojol yedꞌ pax juntzan̈xo ofrenda to tzꞌel val dꞌa scꞌol ebꞌ yacꞌani. 7 Ay pax juntzan̈ yamcꞌabꞌ yic scajnubꞌ Jehová icꞌbꞌilcot dꞌa Jerusalén yuj vin̈aj Nabucodonosor, aycanoch dꞌa yol stemplo sdiosal vin̈. 8 Axo vin̈aj Ciro chiꞌ ix alan dꞌa vin̈aj Mitrídates, vin̈ sicꞌum tumin to syiqꞌuelta juntzan̈ tastac chiꞌ vin̈, sbꞌisan vin̈, syacꞌan vin̈ dꞌa vin̈aj Sesbasar, vin̈ ol och yajalil dꞌa Judá. 9 Aton sbꞌisul tastac tic: 30 qꞌuen nivac ucꞌabꞌ nabꞌa oro, mil qꞌuen nivac ucꞌabꞌ nabꞌa plata, 29 qꞌuen cuchilubꞌ, 10 30 qꞌuen yunetac ucꞌabꞌ nabꞌa oro, 410 qꞌuen yunetac ucꞌabꞌ nabꞌa plata, axo juntzan̈xo tastac, mil sbꞌisul. 11 A sbꞌisul juntzan̈ tas nabꞌa oro yedꞌ nabꞌa plata dꞌa smasanil, 5 mil 400. Masanil juntzan̈ chiꞌ ix yicꞌ meltzaj vin̈aj Sesbasar yedꞌ juntzan̈xo ebꞌ ayic ix paxta ebꞌ dꞌa Babilonia chiꞌ, ix jaxcan ebꞌ dꞌa Jerusalén.