4 Ayic ix vabꞌan juntzan̈ chiꞌ, ix in em cꞌojan, ix in oqꞌui. Ix in te cus val jayeꞌ cꞌual. Ix in och dꞌa tzecꞌojcꞌolal, ix in lesalvi dꞌa sDiosal satchaan̈. 5 Ix valan icha tic: Mamin Jehová sDiosal satchaan̈, te nivan elcꞌochi, te ay a may, tzaqꞌuelcꞌoch a trato yedꞌ ebꞌ tzach xajanani, ebꞌ scꞌanabꞌajan a checnabꞌil. 6 Tzin cꞌan dꞌayach to tza cha abꞌ in lesal a in a checabꞌ in tic. Dꞌa junjun cꞌu yedꞌ dꞌa junjun acꞌval tzin tevi dꞌayach cuuj a on̈ a chon̈abꞌ on̈ tic, a checabꞌ caji. Svalqꞌueta co mul dꞌayach. A on̈ tic yedꞌ ebꞌ co mam quicham, ix och co mul dꞌayach. 7 Te chuc ix cutej co bꞌa dꞌayach. Maj co cꞌanabꞌajej a checnabꞌil, a cꞌaybꞌubꞌal yedꞌ tas a chec yalnaccan vin̈ a checabꞌ aj Moisés dꞌayon̈. 8 Nacot tas alnac dꞌa vin̈ a checabꞌ chiꞌ: Tato man̈ ol e cꞌanabꞌajej tas ix valaꞌ, ol ex in saclemejcanbꞌat dꞌa scaltac juntzan̈xo chꞌoc chon̈abꞌil. 9 Palta tato ol ex meltzajxoc dꞌayin jun, ol e cꞌanabꞌajan in checnabꞌil, tze bꞌeybꞌalani, vachꞌchom sacleminac eyajcanbꞌat bꞌaj slajvicꞌoch yolyibꞌan̈qꞌuinal tic, ol ex in molbꞌejxicot dꞌa jun lugar to sicꞌbꞌilel vuuj, bꞌaj tzꞌoch ejmelal dꞌayin, xa chi.

10 A on̈ a checabꞌ on̈ tic, a chon̈abꞌ on̈ paxi, ix on̈ a col yedꞌ a poder. 11 Mamin, tzin cꞌan dꞌayach to tza cha abꞌ in lesal a in a checabꞌ in tic yedꞌ tas scꞌan juntzan̈xo ebꞌ a checabꞌ to sco nibꞌej tzach quicꞌchaan̈. Tzin cꞌan dꞌayach to tzacꞌ a vachꞌcꞌolal dꞌayin, yic vachꞌ scha yabꞌ vin̈ rey tas ol valaꞌ, xin chi. A dꞌa jun tiempoal chiꞌ ayin och sbꞌachumaloc svino vin̈aj rey Artajerjes chiꞌ.