—¿Tas yuj cuseltac yilji a sat? Ina man̈ ach penaocay svilaꞌ. Ichato ilcꞌolal aji, xchi vin̈ rey chiꞌ.

A val dꞌa jun rato chiꞌ, ix in xivqꞌuei, 3 ix valan dꞌa vin̈ icha tic:

—Mamin rey, ayocabꞌ achn̈ej eqꞌui. ¿Tas yuj man̈ cuseltacoc yilji in sat a naani, ina to a in chon̈abꞌ bꞌaj mucan ebꞌ in mam vicham, emnac lan̈najoc, tzꞌanacpaxbꞌat spuertail? xin chi dꞌa vin̈.

4 —¿Tas svutej in colvaj dꞌayach ticnaic jun? xchi vin̈ rey chiꞌ.

Yuj chiꞌ ix in lesalvi dꞌa sDiosal satchaan̈. 5 Ix valan dꞌa vin̈ rey chiꞌ icha tic:

—Tato scha a cꞌol mamin rey, tato vachꞌ in dꞌa yol a sat, tzin cꞌan dꞌayach to tzin a chabꞌat dꞌa Judá chiꞌ, bꞌaj mucan ebꞌ in mam vicham, yic sbꞌat in bꞌoanxiqꞌuei, xin chi dꞌa vin̈.

6 Cꞌojanem vin̈ rey chiꞌ, cꞌojanpaxem ix reina dꞌa stzꞌey vin̈. Ix yalan vin̈ dꞌayin icha tic:

—¿Jantac tiempo tzach bꞌat jun? ¿Bꞌaqꞌuin̈ tzach jaxi? xchi vin̈.

Ix valani jantac tiempo, ix schaan scꞌol vin̈ tas ix val chiꞌ. 7 Ix valanpax dꞌa vin̈ icha tic: Tato vachꞌ tzꞌaj tza naꞌ mamin rey, acꞌbꞌat junoc carta dꞌa ebꞌ vin̈ gobernador ay dꞌa stojolal bꞌaj tzꞌem cꞌu dꞌa aꞌ Éufrates, yic vachꞌ tzin schaecꞌ ebꞌ vin̈ taꞌ masanto tzin cꞌoch dꞌa Judá. 8 Sbꞌat junocxo carta chiꞌ dꞌa vin̈aj Asaf yilumal teꞌ nivac teꞌ ay taꞌ, yic syacꞌ teꞌ vin̈ dꞌayin, yic tzꞌoch teꞌ dꞌa spuertail bꞌaj ay ebꞌ stan̈van templo, dꞌa smuroal chon̈abꞌ chiꞌ yedꞌ dꞌa teꞌ pat bꞌaj ol in ajoc, xin chi dꞌa vin̈. Yuj svachꞌcꞌolal in Diosal, ix yacꞌ masanil juntzan̈ tic vin̈ rey chiꞌ dꞌayin.

9 Ayic ix in javi dꞌa ebꞌ vin̈ ayoch yajalil dꞌa stojolal bꞌaj tzꞌem cꞌu dꞌa aꞌ Éufrates chiꞌ, ix vacꞌan jun carta ix yacꞌcot vin̈ rey chiꞌ dꞌa ebꞌ vin̈. Ajun pax juntzan̈ ebꞌ vin̈ yajal ebꞌ soldado yedꞌ ebꞌ ayqꞌue dꞌa yibꞌan̈ chej ix yacꞌcot vin̈ rey chiꞌ vedꞌoc. 10 Palta axo ix yabꞌan vin̈aj Sanbalat aj Horón yedꞌ vin̈aj Tobías yajal yaj dꞌa Amón to ix in javi yic tzin colvaj yedꞌ ebꞌ vetisraelal, ix cot yoval ebꞌ vin̈.

11 Ayic yoxilxo cꞌual in javi dꞌa Jerusalén, 12 in qꞌue vaan dꞌacꞌvalil yedꞌ jayvan̈ ebꞌ vin̈ vinac ajun vedꞌoc, palta malaj junoc mach bꞌaj ix valaꞌ tas ix yal Dios dꞌa in pensar yuj tas ol in cꞌulej dꞌa Jerusalén chiꞌ. Malaj nocꞌ chej ix quicꞌbꞌati, a inn̈ej ix vicꞌ nocꞌ in cuchumal. 13 A dꞌa jun acꞌval chiꞌ, on̈ elta dꞌa jun puerta dꞌa pan̈an, dꞌa stojolal sjaj aꞌ Dragón, on̈ ecꞌ dꞌa spuertail bꞌaj sbꞌatcan cꞌalem. Ix vilan smuroal Jerusalén chiꞌ, macꞌbꞌilem lan̈najoc, tzꞌanacpaxbꞌat spuertail. 14 Ix ecꞌ vilanpax jun puerta dꞌa sjaj a aꞌ yedꞌ pax stanque vin̈ rey. Majxo yal-laj vecꞌ yedꞌ nocꞌ in chej chiꞌ taꞌ. 15 An̈ejaꞌ qꞌuicꞌto in qꞌuecꞌoch dꞌa stiꞌ aꞌ Cedrón. Ayic ix lajvi vilan muro chiꞌ, in meltzajxi bꞌaj in bꞌat chiꞌ, in ochxi dꞌa jun puerta dꞌa pan̈an chiꞌ.

16 A ebꞌ yajal yaj dꞌa chon̈abꞌ chiꞌ, man̈ yojtacoc ebꞌ bꞌajtil ayinbꞌati, man̈ yojtacoc pax ebꞌ tas tzin cꞌulej. Malaj pax tas sval dꞌa ebꞌ vetisraelal, dꞌa ebꞌ sacerdote, dꞌa ebꞌ yajal yaji yedꞌ dꞌa ebꞌ ol munlajoc. 17 Ix lajvi chiꞌ ix valan dꞌa ebꞌ icha tic:

—A ex tic eyojtac sicꞌlabꞌil to a jun tiempoal bꞌaj ayon̈ ecꞌ tic te chuclaj, ina ix macꞌchajem lan̈naj chon̈abꞌ Jerusalén tic, tzꞌanacxopaxbꞌat spuertail. Yuj chiꞌ co molbꞌejec co bꞌa sco bꞌoanecxiqꞌue smuroal tic, yic vachꞌ maxtzac on̈ bꞌuchji, xin chi dꞌa ebꞌ.

18 Ayic ix valan dꞌa ebꞌ jantac svachꞌcꞌolal Dios ix schꞌox dꞌayin yedꞌ tas ix yal vin̈ rey dꞌayin, ix yalan ebꞌ:

—Co yamecoch co munlaji, xchi ebꞌ. Icha chiꞌ ix aj scuchbꞌan sbꞌa ebꞌ dꞌa jun munlajel chiꞌ. 19 Ayic ix yabꞌan vin̈aj Sanbalat aj Horón yedꞌ vin̈aj Tobías yajal yaj dꞌa Amón yedꞌ pax vin̈aj Gesem árabe, ix te bꞌuchvaj ebꞌ vin̈ dꞌayon̈, ix yalan ebꞌ vin̈:

—¿Tas ol e cꞌulej? ¿Tom tze nibꞌej tzeyiqꞌuel e bꞌa dꞌa yol scꞌabꞌ vin̈ rey? xchi ebꞌ vin̈.

20 Ix in tacꞌvi dꞌa ebꞌ vin̈ icha tic:

—Yuj scolval sDiosal satchaan̈, ol yal cuuj. A on̈ schecabꞌ on̈ tic ol co yamoch co bꞌoani, palta a ex tic, malaj eyalan eyic dꞌayon̈, malaj eyopisio, yujto man̈ ex quetchon̈abꞌoc, xin chi.