Ix pojchajecꞌ munlajel
3
A vin̈aj sat sacerdote Eliasib yedꞌ ebꞌ yetsacerdoteal, a ebꞌ ix bꞌoanxi bꞌaj tzꞌoch nocꞌ calnel, ix yacꞌanoch spuertail ebꞌ. Ix sbꞌoanxiqꞌue muro ebꞌ, ix bꞌatn̈ej dꞌa torre scuch Hamea masanto dꞌa torre scuch Hananeel, ix yacꞌancanoch ebꞌ dꞌa yol scꞌabꞌ Dios. 2 Axo junxo macan̈ muro chiꞌ, a ebꞌ vin̈ aj Jericó ix bꞌoanxiqꞌuei. Axo junxo macan̈, a vin̈aj Zacur yuninal vin̈aj Imri ix bꞌoanxiqꞌuei. 3 Axo ebꞌ yin̈tilal vin̈aj Senaa ix bꞌoanxiqꞌue bꞌaj ay spuertail yic nocꞌ chay. Ix yacꞌanoch sjolom spuertail chiꞌ ebꞌ, ix ochcan spuertail chiꞌ, ix ecꞌcan cꞌatan qꞌuen hierro syamnubꞌoc. 4 Ix bꞌon̈ejbꞌat jun muro chiꞌ, a vin̈aj Meremot yuninal vin̈aj Urías yixchiquin vin̈aj Cos ix bꞌoanxiqꞌue junxo macan̈. Axo vin̈aj Mesulam yuninal vin̈aj Berequías, yixchiquin vin̈aj Mesezabeel ix bꞌoanxiqꞌue junxo macan̈. Axo vin̈aj Sadoc yuninal vin̈aj Baana ix bꞌoanxi junxo macan̈. 5 Axo junxo macan̈ a ebꞌ aj Tecoa ix bꞌoanxiqꞌuei, palta a ebꞌ nivac vinac yaj dꞌa scal ebꞌ, maj yal scꞌol ebꞌ ix colvaj yedꞌ ebꞌ scuchbꞌan jun munlajel chiꞌ. 6 A vin̈aj Joiada yuninal vin̈aj Paseah yedꞌ vin̈aj Mesulam yuninal vin̈aj Besodías, a ebꞌ vin̈ ix bꞌoanxiqꞌue bꞌaj ay jun puerta scuchan Jesana. Ix yacꞌanoch sjolom spuertail chiꞌ ebꞌ vin̈, ix ochpaxcan spuertail chiꞌ, ix ecꞌcan cꞌatan qꞌuen hierro syamnubꞌoc. 7 Axo junxo macan̈, a vin̈aj Melatías aj Gabaón ix bꞌoanxiqꞌue yedꞌ vin̈aj Jadón aj Meronot yedꞌ ebꞌ aj Gabaón yedꞌ ebꞌ aj Mizpa, aton ebꞌ ay dꞌa yalan̈ smandar vin̈ yajal yaj dꞌa stojolal bꞌaj tzꞌem cꞌu dꞌa aꞌ Éufrates. 8 Axo junxo macan̈, a vin̈aj Uziel yuninal vin̈aj Harhaía, vin̈ smunlaj yedꞌ qꞌuen qꞌueen vachꞌ yilji, a vin̈ ix bꞌoanxiqꞌuei. Axo junxo macan̈, a vin̈aj Hananías yuninal jun vin̈ bꞌoum perfume ix bꞌoanxiqꞌuei. A ebꞌ vin̈ chavan̈ chiꞌ ix bꞌoanxiqꞌue muro chiꞌ masanto ix cꞌoch dꞌa stiꞌ jun muro levan sat. 9 Axo junxo macan̈ a vin̈aj Refaías yuninal vin̈aj Hur ix bꞌoanxiqꞌuei. A vin̈ chiꞌ yajal yaj vin̈ dꞌa nan̈al lugar dꞌa yol smacbꞌen Jerusalén. 10 A vin̈aj Jedaías yuninal vin̈aj Harumaf ix bꞌoanxiqꞌue junxo macan̈ dꞌa yichan̈ spat. Axo junxo macan̈, a vin̈aj Hatús yuninal vin̈aj Hasabnías ix bꞌoanxiqꞌuei.11 A junxo macan̈, a vin̈aj Malquías yuninal vin̈aj Harim yedꞌ vin̈aj Hasub yuninal vin̈aj Pahat-moab, a ebꞌ vin̈ ix bꞌoanxiqꞌue yedꞌ jun torre scuch Hornos. 12 Axo junxo macan̈, a vin̈aj Salum yuninal vin̈aj Halohes ix bꞌoanxiqꞌuei. A vin̈ chiꞌ yajal yaj vin̈ dꞌa nan̈alxo lugar ayoch dꞌa yol smacbꞌen Jerusalén. Ix colvajpax ebꞌ ix yisil vin̈ yedꞌoc. 13 A vin̈aj Hanún yedꞌ ebꞌ cajan dꞌa Zanoa ix bꞌoanxiqꞌue bꞌaj ix can stiꞌ dꞌa chꞌolan. Ix yacꞌanoch spuertail ebꞌ, ix ecꞌcan cꞌatan qꞌuen hierro syamnubꞌoc. Ix sbꞌoanxiqꞌue 450 metro muro chiꞌ ebꞌ, masanto dꞌa spuertail bꞌaj sbꞌatcan cꞌalem. 14 Axo vin̈aj Malquías yuninal vin̈aj Recab yajal dꞌa yol smacbꞌen chon̈abꞌ Bet-haquerem, a vin̈ ix bꞌoanxiqꞌue bꞌaj ix can stiꞌ bꞌaj sbꞌatcan cꞌalem chiꞌ. Ix yacꞌanoch spuertail vin̈, ix ecꞌcan cꞌatan qꞌuen hierro syamnubꞌoc.
15 A vin̈aj Salum yuninal vin̈aj Colhoze, yajal dꞌa yol smacbꞌen chon̈abꞌ Mizpa, a vin̈ ix bꞌoanxiqꞌue bꞌaj ix can stiꞌ dꞌa sjaj a aꞌ. Ix yacꞌqꞌue spatil vin̈, ix yacꞌanoch spuertail chiꞌ vin̈, ix ecꞌpaxcan cꞌatan qꞌuen hierro syamnubꞌoc. Ix sbꞌoanxiqꞌue muro chiꞌ vin̈ bꞌaj ay tanque scuch Siloé dꞌa slacꞌanil yavbꞌen teꞌ ebꞌ rey, masanto bꞌaj bꞌachquiltac yem sbꞌeal schon̈abꞌ vin̈aj David. 16 A vin̈aj Nehemías yuninal vin̈aj Azbuc, yajal dꞌa nan̈al yol smacbꞌen chon̈abꞌ Bet-sur, a vin̈ ix bꞌoanxiqꞌue junxo macan̈ muro chiꞌ. Ix cotn̈ej dꞌa yichan̈ bꞌaj mucbꞌil vin̈aj rey David masanto ix cꞌoch bꞌaj ay stanqueal a aꞌ, ix cꞌoch bꞌaj ay scuartel ebꞌ soldado.
17 Axo ebꞌ levita scuchbꞌej vin̈aj Rehum yuninal vin̈aj Bani, a ebꞌ ix bꞌoanxiqꞌue junxo macan̈. Axo dꞌa yichan̈bꞌati, a vin̈aj Hasabías yajal dꞌa nan̈al smacbꞌen chon̈abꞌ Keila, a vin̈ ix bꞌoanxiqꞌue junxo macan̈ sqꞌuexuloc ebꞌ yetchon̈abꞌ. 18 Axo bꞌaj ix cꞌoch yic ebꞌ chiꞌ, ataꞌ ix sbꞌoxiqꞌue juntzan̈xo ebꞌ scꞌabꞌyoc ebꞌ. A vin̈aj Bavai yuninal vin̈aj Henadad, yajal dꞌa nan̈alxo smacbꞌen Keila chiꞌ, a vin̈ scuchbꞌan ebꞌ. 19 Axo vin̈aj Ezer yuninal vin̈aj Jesúa, yajal dꞌa Mizpa, a vin̈ ix bꞌoanxiqꞌue jun macan̈xo dꞌa yichan̈ bꞌaj smolchaj yamcꞌabꞌ yic oval bꞌaj scumlaj muro chiꞌ. 20 Axo vin̈aj Baruc yuninal vin̈aj Zabai, dꞌa smasanil scꞌool vin̈ ix sbꞌoxiqꞌue junxo macan̈ bꞌaj scumlaj chiꞌ masanto ix cꞌoch dꞌa spuertail spat vin̈aj Eliasib, vin̈ sat sacerdote. 21 A vin̈aj Meremot yuninal vin̈aj Urías, yixchiquin vin̈aj Cos, a vin̈ ix bꞌoanxiqꞌue junxo macan̈ sbꞌat dꞌa spuertail spat vin̈aj Eliasib chiꞌ masanto bꞌaj slajvicꞌoch spat vin̈ chiꞌ.
22 Axo junxo macan̈, a ebꞌ sacerdote cajan dꞌa schꞌolanil aꞌ Jordán ix bꞌoanxiqꞌuei. 23 Axo vin̈aj Benjamín yedꞌ vin̈aj Hasub, a ebꞌ vin̈ ix bꞌoanxibꞌat dꞌa yichan̈ spat. Axo dꞌa sn̈iꞌ yic ebꞌ vin̈ chiꞌ, axo vin̈aj Azarías yuninal vin̈aj Maasías yixchiquin vin̈aj Ananías, a vin̈ ix bꞌoanxiqꞌue dꞌa slacꞌanil spat. 24 Axo junxo macan̈, a vin̈aj Binúi yuninal vin̈aj Henadad, a vin̈ ix bꞌoanxiqꞌuei, ix bꞌat dꞌa spat vin̈aj Azarías masanto ix cꞌoch bꞌaj scumlaj dꞌa jun schiquin. 25 Axo vin̈aj Palal yuninal vin̈aj Uzai, a vin̈ ix bꞌoanxiqꞌue bꞌaj scumlaj chiꞌ yedꞌ jun torre ayel dꞌa spatic muro chiꞌ dꞌa spalacio vin̈ rey, aton dꞌa yamaqꞌuil spat ebꞌ soldado stan̈van vin̈ rey chiꞌ. Axo junxo macan̈, a vin̈aj Pedaías yuninal vin̈aj Faros ix bꞌoanxiqꞌuei, 26 masanto ix cꞌoch dꞌa spuertail bꞌaj tzꞌel ebꞌ ix ix icꞌoj aꞌ, jun sbꞌatcan dꞌa stojolal bꞌaj sqꞌueul cꞌu, dꞌa slacꞌanil jun torre ayel dꞌa spatic muro chiꞌ. Axo junxo macan̈, a ebꞌ smunlaj dꞌa templo cajan dꞌa Ofel, a ebꞌ ix bꞌoanxiqꞌuei. 27 Axo ebꞌ aj Tecoa ix bꞌoanxiqꞌue junxo macan̈, sbꞌatn̈ej dꞌa yichan̈ jun torre chiꞌ masanto dꞌa smuroal dꞌa Ofel chiꞌ.
28 Axo ebꞌ sacerdote ix bꞌoanxiqꞌue dꞌa yichan̈ spat junjun, sbꞌatn̈ej dꞌa spuertail bꞌaj tzꞌoch nocꞌ chej. 29 Axo vin̈aj Sadoc yuninal vin̈aj Imer ix bꞌoanxiqꞌue junxo macan̈ dꞌa yichan̈ spat. Axo vin̈aj Semaías yuninal vin̈aj Secanías ix bꞌoanxiqꞌue junxo macan̈ bꞌaj ay ebꞌ stan̈van puerta dꞌa stojolal bꞌaj sjavi cꞌu. 30 Axo vin̈aj Hananías yuninal vin̈aj Selemías yedꞌ vin̈aj Hanún svaquil yuninal vin̈aj Salaf, a ebꞌ vin̈ ix bꞌoanxiqꞌue junxo macan̈. Axo vin̈aj Mesulam yuninal vin̈aj Berequías ix bꞌoanxiqꞌue jun macan̈ dꞌa yichan̈ spat. 31 Axo vin̈aj Malquías, vin̈ bꞌoum qꞌueen vachꞌ yilji, a vin̈ ix bꞌoanxiqꞌue junxo macan̈ dꞌa spat ebꞌ smunlaj dꞌa templo yedꞌ dꞌa yic ebꞌ chon̈vajum yedꞌ dꞌa yichan̈ spuertail bꞌaj ay ebꞌ stan̈van chon̈abꞌ chiꞌ, masanto bꞌaj ay ebꞌ stan̈van dꞌa schiquin muro chiꞌ. 32 Axo juntzan̈xo ebꞌ vin̈ bꞌoum qꞌuen vachꞌ yilji yedꞌ ebꞌ vin̈ chon̈vajum, a ebꞌ vin̈ ix bꞌoanxiqꞌue junxo macan̈, sbꞌatn̈ej bꞌaj ay ebꞌ stan̈van dꞌa schiquin chiꞌ, masanto ix cꞌoch bꞌaj ay spuertail yic nocꞌ calnel.