Ix bꞌuchvaj ebꞌ ajcꞌool
4
Ayic ix yabꞌan vin̈aj Sanbalat to van co bꞌoanxiqꞌue muro chiꞌ, ix te cot yoval vin̈, ix syamanoch vin̈ sbꞌuchvaj dꞌayon̈. 2 Ix och ijan vin̈ yalan bꞌuchval lolonel dꞌayon̈ dꞌa yichan̈ ebꞌ vin̈ ajun yedꞌoc yedꞌ dꞌa yichan̈ ebꞌ vin̈ soldado aj Samaria. Ix yalan vin̈ icha tic: Obꞌiltac juntzan̈ ebꞌ judío tic, ¿tom ay jabꞌoc tas syal sbꞌoan ebꞌ? ¿Tom ol yacꞌxi silabꞌ ebꞌ snaani? ¿Tom junn̈ej cꞌual ol sbꞌo jun munlajel tic ebꞌ snaani? ¿Am snaan ebꞌ to a dꞌa scal juntzan̈ tzꞌaeltac qꞌuen juyanecꞌ tic ol yiqꞌuelta qꞌuen acꞌ qꞌueen ebꞌ? xchi vin̈.3 Ayecꞌ pax vin̈aj Tobías amonita dꞌa stzꞌey ebꞌ vin̈. Ix yalanpax vin̈ icha tic: A juntzan̈ qꞌueen sbꞌoqꞌue ebꞌ muroal tic, qꞌuinaloc a junoc nocꞌ vaax tzꞌecꞌ dꞌa yibꞌan̈ qꞌueen, tzꞌel n̈ilnaj qꞌueen stecꞌan nocꞌ, xchi vin̈.
Slesal vin̈aj Nehemías
4 Yuj chiꞌ ix in lesalvi icha tic: Mamin, ach co Diosal, tzabꞌ val on̈ sbꞌuchan ebꞌ. Cotocabꞌcan sbꞌuchval lolonel ebꞌ chiꞌ dꞌa yibꞌan̈. Aocabꞌ ebꞌ yajcꞌol ebꞌ tzꞌicꞌanecꞌ tastac ay dꞌay. Icꞌjocabꞌbꞌat ebꞌ dꞌa junocxo nación. 5 Man̈ acꞌ nivancꞌolal smul ebꞌ tic, mocabꞌ bꞌat tas ix scꞌulej ebꞌ tic satcꞌolal uuj, yujto tzon̈ sbꞌuchval ebꞌ a on̈ sco bꞌoxiqꞌue muro tic, xin chi.
Ix ecꞌ val ebꞌ ajcꞌol dꞌa yibꞌan̈
6 Ix on̈ munlajn̈ej, elan̈chamel ix nan̈albꞌi cuuj yujto te ay val stzalajcꞌolal ebꞌ chon̈abꞌ smunlaji. 7 A vin̈aj Sanbalat, vin̈aj Tobías, ebꞌ árabe, ebꞌ amonita yedꞌ ebꞌ aj Asdod, ix te cot yoval ebꞌ ayic ix yabꞌan ebꞌ to yelcꞌolal tzon̈ munlaji yic sco bꞌoanxiqꞌue smuroal Jerusalén. Toxo pax ix macchaj bꞌaj nivac ix aj spojemi. 8 Smol alan ebꞌ to syacꞌ oval ebꞌ quedꞌoc, yic syacꞌan chucal ebꞌ dꞌa Jerusalén tic yalani. 9 Yuj chiꞌ ix on̈ lesalvi dꞌa co Diosal, ix cacꞌanoch co tan̈vumal dꞌa junjun cꞌu yedꞌ dꞌa junjun acꞌval yic sco colan co bꞌa dꞌa ebꞌ ajcꞌol chiꞌ. 10 Ix yalanpax ebꞌ smunlaj chiꞌ icha tic: Toxo ix te el yip ebꞌ cuchum qꞌueen yic syicꞌanel jantac qꞌuen qꞌueen ebꞌ yedꞌ spojelal jun muro telvinac tic, yuj chiꞌ man̈ ol techajlaj cuuj co bꞌoanxiqꞌuei, xchi ebꞌ.
11 A snaan ebꞌ ajcꞌol chiꞌ to man̈ ol nachajel cuuj, mato man̈ ol quil yoch ebꞌ dꞌa co cal yic tzon̈ smilancham ebꞌ yic tzꞌoch vaan munlajel tic. 12 Palta axo ebꞌ quetchon̈abꞌ cajan dꞌa slacꞌanil ebꞌ chiꞌ, xican sjavi ebꞌ ul yal dꞌayon̈: A juntzan̈ anima chiꞌ yaln̈ej bꞌaj ol javoc ebꞌ yacꞌ oval quedꞌoc, xchi ebꞌ. 13 Yuj chiꞌ ix valaꞌ to junjun patil ebꞌ stan̈vej ebꞌ dꞌa spatiquel muro chiꞌ, bꞌaj chꞌolquixtac luum yedꞌ bꞌaj pojnaquel muro chiꞌ, yedꞌnac yespada ebꞌ, lanza yedꞌ sjul-labꞌ ebꞌ. 14 Ayic ix vilani to xiv ebꞌ, ix in tecꞌbꞌan in bꞌa valan dꞌa ebꞌ yichamtac vinaquil chon̈abꞌ yedꞌ dꞌa ebꞌ ayoch yajalil dꞌa co chon̈abꞌ tic yedꞌ dꞌa masanil anima: Man̈ on̈ xiveclaj. Co naeccoti to a co Diosal te nivan yelcꞌochi, te ay smay, yuj chiꞌ co colec co chon̈abꞌ tic yedꞌ cal cuninal, ebꞌ ix quetbꞌeyum yedꞌ co pat, xin chi dꞌa ebꞌ.
15 Ayic ix yabꞌan ebꞌ ajcꞌol chiꞌ to lista caji, ix nachajel yuj ebꞌ to a Dios ix juanbꞌat tas ix smol alej ebꞌ chiꞌ. Icha chiꞌ ix aj co munlajxi junjun on̈. 16 Atax dꞌa jun cꞌu chiꞌ, nan̈aln̈ej ebꞌ vin̈ in munlajvum chiꞌ smunlaji, axo nan̈alxo ebꞌ vin̈ yedꞌnac syamcꞌabꞌ ebꞌ vin̈ yic oval, aton qꞌuen lanza, maclabꞌ jul-labꞌ yedꞌ jul-labꞌ chiꞌ. Aypaxoch qꞌuen qꞌueen dꞌa sn̈iꞌ scꞌol ebꞌ vin̈. Axo ebꞌ yajalil ebꞌ tzꞌacꞌan stecꞌanil ebꞌ smunlaj chiꞌ. 17 A ebꞌ cuchum icatz, cuchbꞌil yicatz ebꞌ chiꞌ yuuj, jun scꞌabꞌ ebꞌ chiꞌ yamjinac yicatz chiꞌ, axo dꞌa junxo scꞌabꞌ ebꞌ yedꞌnac syamcꞌabꞌ yic oval. 18 Yedꞌ ebꞌ smunlaji yic sbꞌoanxiqꞌue muro chiꞌ, ayoch jachan qꞌuen yespada ebꞌ dꞌa snan̈al. Axo dꞌa in tzꞌey ayecꞌ vin̈ spuꞌan nocꞌ chꞌaac. 19 Ix valan dꞌa ebꞌ yajal yaji, dꞌa ebꞌ cuchbꞌum yedꞌ dꞌa masanil ebꞌ anima: A jun munlajel tic te nivan yaji, yuj chiꞌ ix on̈ pucaxbꞌat dꞌa spatictac muro tic, chꞌocchꞌoc bꞌaj ayon̈canbꞌat junjun on̈. 20 Yuj chiꞌ ayic tzeyabꞌan yocꞌ nocꞌ chꞌaac, tzex cot dꞌa co tzꞌey, axo co Diosal ol colvaj quedꞌ dꞌa oval chiꞌ, xin chi.
21 Yuj chiꞌ nan̈al on̈ tzon̈ munlaji, tzon̈ ochi ayic sacbꞌi masanto sqꞌuicꞌbꞌi, axo nan̈alxo jun, yedꞌnac syamcꞌabꞌ yic oval. 22 Ix valanpax dꞌa ebꞌ vetchon̈abꞌ chiꞌ to svaycanem ebꞌ yedꞌ ebꞌ schecabꞌ dꞌa yol chon̈abꞌ chiꞌ yic stan̈van chon̈abꞌ chiꞌ ebꞌ quedꞌoc dꞌacꞌvalil. Axo dꞌa cꞌualil tzon̈ munlaji. 23 An̈ejtonaꞌ in pax tic yedꞌ ebꞌ ayto vuj in bꞌa yedꞌoc, ebꞌ in checabꞌ yedꞌ ebꞌ tzin tan̈vani, max quiqꞌuel-laj co pichul dꞌacꞌvalil, junjun on̈ ayecꞌ qꞌuen co lanza dꞌa co tzꞌey.