Ix yal syaelal ebꞌ mebꞌaꞌ vin̈aj Nehemías
5
A dꞌa jun tiempoal chiꞌ, ix yal val sbꞌa ebꞌ anima, ebꞌ vin̈ vinac yedꞌ ebꞌ ix ix yuj tas tzꞌutaj ebꞌ yuj ebꞌ quetchon̈abꞌ. 2 Ay ebꞌ tzꞌalani to tzijtum yuninal ebꞌ, yuj chiꞌ yovalil sbꞌoquej ixim strigo ebꞌ yic max cham ebꞌ yuj vejel. 3 Ay pax ebꞌ tzꞌalani to syacꞌcanbꞌat yumal sluum ebꞌ, ma yuva ebꞌ avabꞌil, ma spat ebꞌ dꞌa prentail yuj smanan tas sva ebꞌ yuj vejel. 4 Ay pax ebꞌ tzꞌalani to yuj yacꞌan qꞌuen tumin ebꞌ syacꞌ dꞌa vin̈ rey, yuj chiꞌ scꞌan qꞌuen tumin chiꞌ ebꞌ smajnej, syacꞌanbꞌat slum ebꞌ, ma yavbꞌen ebꞌ yuj smajananubꞌal qꞌuen tumin chiꞌ. 5 Ix yalanpax ebꞌ icha tic: A on̈ tic yedꞌ ebꞌ quetchon̈abꞌ tic, junn̈ej quin̈tilal, malaj mach chꞌoc yilji yuninal, lajann̈ej yilji cuninal yedꞌ yuninal ebꞌ, yuj chiꞌ, ¿tas yuj a ebꞌ cuninal ayoch schecabꞌoc ebꞌ? Ayon̈ ayxo och ebꞌ ix quisil schecabꞌoc ebꞌ. Maxtzac yal co colan co bꞌa, yujto yicxo lum co luum ebꞌ yedꞌ cavbꞌen, xchi ebꞌ.6 Ayic ix vabꞌan yalan ebꞌ anima tas tzꞌutaj chiꞌ, ix te cot voval. 7 Ix lajvi chiꞌ, ix in naan val sicꞌlabꞌil, ix in cachan ebꞌ nivac vinac yedꞌ ebꞌ yajal yaji, yic maxtzac scꞌan yuneꞌ stumin ebꞌ chiꞌ dꞌa ebꞌ quetchon̈abꞌ tic. Yuj chiꞌ ix vavtan masanil ebꞌ anima dꞌa jun molchajelal yuj jun lolonel chiꞌ. 8 Ix lajvi chiꞌ ix valan dꞌa ebꞌ icha tic: A on̈ tic ix cacꞌ val quip co colanxielta ebꞌ quetchon̈abꞌ chon̈bꞌilcanbꞌat dꞌa juntzan̈ chꞌoc chon̈abꞌil, ¿tom a exxo tic ol e chon̈xicanbꞌat ebꞌ yic a on̈xo tic ol co manxielta ebꞌ? xin chi dꞌa ebꞌ.
Man̈xalaj ebꞌ ix tacꞌvi, maxtzac nachaj yuj ebꞌ tas syutej ebꞌ spacani. 9 Ix valanpaxi: A jun tas van e cꞌulan tic man̈ vachꞌoclaj. Smoj val to tze chꞌoxeli to nivan yelcꞌoch co Diosal dꞌa e sat, yic maxtzac bꞌuchvaj ebꞌ anima ajcꞌol dꞌayon̈. 10 An̈ejtonaꞌ in yedꞌ ebꞌ ayto vuj in bꞌa yedꞌoc yedꞌ ebꞌ in checabꞌ, ix cacꞌ qꞌuen tumin smajnej ebꞌ. Ix cacꞌanpax ixim trigo sqꞌuex ebꞌ. A ticnaic scacꞌ lajvoc juntzan̈ sbꞌoc ebꞌ chiꞌ. 11 Yuj chiꞌ sval dꞌayex to tzeyacꞌ meltzaj slum ebꞌ chiꞌ ticnaic yedꞌ yavbꞌen ebꞌ, teꞌ yolivo ebꞌ yedꞌ spat ebꞌ, tzeyacꞌan lajvoc sbꞌoc ebꞌ chiꞌ dꞌayex. Tzeyacꞌan meltzaj yuneꞌ qꞌuen tumin ix yacꞌ ebꞌ chiꞌ dꞌayex, ma trigo, ma vino, ma aceite, tas ix e cꞌan dꞌa ebꞌ, xin chi dꞌa ebꞌ. 12 Ix tacꞌvi ebꞌ smasanil icha tic: Ol cacꞌxi meltzaj masanil juntzan̈ chiꞌ dꞌa ebꞌ. Man̈xalaj tas ol cal yuj juntzan̈ chiꞌ. Ol co cꞌanabꞌajej masanil tas ix al chiꞌ, xchi ebꞌ.
Yuj chiꞌ ix vavtan ebꞌ sacerdote. A val dꞌa yichan̈ ebꞌ ix in chec yacꞌ stiꞌ ebꞌ yuj tas ix yal chiꞌ. 13 Ix in tzicubꞌtan̈ej pax in pichul, ix valani: Ichocabꞌ tic ol aj ex stzicanel Dios dꞌa e pat yedꞌ dꞌa e luum, tato man̈ ol e cꞌanabꞌajej bꞌaj tzeyacꞌcan e tiꞌ tic. Icha chiꞌ ol aj yicꞌanecꞌ tastac ay dꞌayex, xin chi dꞌa ebꞌ. Ix tacꞌvi ebꞌ anima chiꞌ smasanil: Ichocabꞌ chiꞌ tzꞌaji, xchi ebꞌ. Ix yalan vachꞌ lolonel ebꞌ dꞌa Jehová. Ix scꞌanabꞌajan ebꞌ bꞌaj ix yacꞌ stiꞌ chiꞌ.
Svachꞌcꞌolal vin̈aj Nehemías
14 Ayic 20 abꞌilxo yoch vin̈aj Artajerjes reyal dꞌa Persia, ix in yacꞌanoch vin̈ yajalil dꞌa Judá, masanto yic 32 abꞌilxo yoch vin̈ dꞌa reyal chiꞌ. A dꞌa lachaveꞌ abꞌil ayin och yajalil chiꞌ, malaj in tojol ix in cꞌan dꞌa ebꞌ anima to smoj in chaani, maj schapaxlaj yic ebꞌ in cꞌabꞌ voc ayoch dꞌa opisio. 15 Palta a ebꞌ yajal ecꞌnac ayic manto in ochi, icha icatz yaj ebꞌ dꞌa ebꞌ anima. Junjun cꞌu scꞌananel 40 siclo qꞌuen plata ebꞌ yuj tas svaꞌa yedꞌ yuj vino syuqꞌuej. An̈ejtonaꞌ tzꞌixtaj ebꞌ chon̈abꞌ yuj ebꞌ schecabꞌ ebꞌ. Palta a inxo tic, man̈ ichoc taꞌ ix vutej in bꞌa, yujto te nivan yelcꞌoch Dios dꞌa in sat. 16 An̈ejtonaꞌ, ix in bꞌoxiqꞌue jun macan̈ smuroal chon̈abꞌ tic yedꞌ ebꞌ in checabꞌ, ix munlajn̈ej ebꞌ vedꞌoc. Malaj junoc lum luum ix viqꞌueqꞌui. 17 Ay pax 150 ebꞌ vin̈ vinac sva vedꞌoc, aton ebꞌ vin̈ vetchon̈abꞌ yedꞌ ebꞌ vin̈ ayoch yajalil vedꞌoc. Chꞌoc pax yaj ebꞌ vin̈ ton̈ej tzul on̈ ilani, ebꞌ vin̈ scot dꞌa juntzan̈ nación ay dꞌa co lacꞌanil. 18 A tas to vic yaj sbꞌo dꞌa junjun cꞌu: Jun nocꞌ vacax schami, vacvan̈ nocꞌ chꞌac calnel, chꞌoc pax yaj nocꞌ caxlan̈. A dꞌa junjun slajun̈il cꞌual, nivan vino tzꞌicꞌchajcoti, palta malaj juneloc ix in cꞌan tas tzin vaꞌa to smoj in chaan yuj vopisio tic, yujto te nivan tas aycot dꞌa yibꞌan̈ jun chon̈abꞌ tic. 19 Yuj chiꞌ in lesalvi icha tic: Ach in Diosal, acꞌ a vachꞌcꞌolal dꞌayin yuj masanil tas ix in cꞌulej yuj jun chon̈abꞌ tic, xin chi.