A ebꞌ ajcꞌol dꞌa vin̈aj Nehemías
6
Ayic ix yabꞌan vin̈aj Sanbalat, vin̈aj Tobías, vin̈aj Gesem vin̈ árabe yedꞌ juntzan̈xo ebꞌ ayoch ajcꞌolal dꞌayon̈ to toxo ix bꞌoqꞌue muro chiꞌ, man̈xalaj bꞌaj jacan, (vachꞌchom manto och spuertail), 2 ix schecancot jun schecabꞌ ebꞌ vin̈ dꞌayin yic tzul yalani to sco molbꞌej co bꞌa yedꞌ ebꞌ vin̈ dꞌa junoc aldea dꞌa acꞌlic yic Ono. Sna jun chiꞌ ebꞌ vin̈ yic syacꞌan chucal ebꞌ vin̈ dꞌayin. 3 Yuj chiꞌ ix in checbꞌat jun in checabꞌ yal dꞌa ebꞌ vin̈, malaj in colanil, te vitzꞌan vaj dꞌa in munlajel nivan yelcꞌochi, max yal-laj in bꞌati. Tato tzin bꞌati, tzam ochcan vaan jun munlajel tic, xin chibꞌati. 4 Chan̈el ix schec ebꞌ vin̈ ul alchaj jun lolonel chiꞌ dꞌayin, palta an̈ejaꞌ ichn̈ej taꞌ ix vutej in pacan dꞌa ebꞌ vin̈.5 Axo dꞌa yoelal, a val jun schecabꞌ vin̈aj Sanbalat chiꞌ ix scheccot ul yacꞌ jun carta to jacan,* 6 bꞌaj syal vin̈ icha tic: Sbꞌey specal dꞌa scal anima, icha pax chiꞌ yalan vin̈aj Gesem to van e naan eyicꞌanel e bꞌa dꞌa yol scꞌabꞌ vin̈ sreyal Persia, yuj chiꞌ van e bꞌoanxiqꞌue muro chiꞌ. Scabꞌ specal, tobꞌ a ach ol ach och reyal. 7 Toxo abꞌ ix acꞌoch ebꞌ schecabꞌ Dios yic syalanel ebꞌ dꞌa Jerusalén to rey achxo dꞌa Judá chiꞌ. Ol yabꞌ jun tic vin̈aj rey Artajerjes chiꞌ, yuj chiꞌ cotan̈, ol on̈ lolon edꞌoc, xchi vin̈ dꞌa jun scarta chiꞌ.
8 Ix lajvi chiꞌ, ix in pacan dꞌa vin̈ icha tic: A juntzan̈ lolonel tzal chiꞌ man̈ yeloclaj, a ach tza naqꞌuei, xin chibꞌati. 9 A ebꞌ chiꞌ syal ebꞌ icha chiꞌ yic tzon̈ xibꞌtan ebꞌ. Am snaan ebꞌ to ol chabꞌaxqꞌue co cꞌool yic maxtzac yicꞌlaj sbꞌa jun munlajel tic. Palta in lesalvi icha tic: Mamin acꞌ in tecꞌanil, xin chi.
10 Ix lajvi chiꞌ ix in bꞌat dꞌa spat vin̈aj Semaías yuninal vin̈aj Delaía, yixchiquin vin̈aj Mehetabel. A vin̈ chiꞌ toxo ix smacoch sbꞌa vin̈ dꞌa yol spat. Ix yalan vin̈ dꞌayin icha tic: Co cꞌubꞌej co bꞌa dꞌa yol stemplo Dios, sco macan spuertail, yujto a dꞌa jun acꞌval tic sna ebꞌ vin̈ sjavi ul ach smilchamoc, xchi vin̈ dꞌayin. 11 Palta ix in tacꞌvi dꞌa vin̈ icha tic: ¿Tom smoj tzin cꞌubꞌejel in bꞌa, tzin macanoch in bꞌa dꞌa yol templo chiꞌ yic tzin col in bꞌa? Man̈ ol in ochlaj dꞌa yol templo chiꞌ, xin chi dꞌa vin̈.
12 Ix nachajel vuuj to man̈oc Dios tzꞌacꞌan yal vin̈ icha chiꞌ. Ix yal juntzan̈ chiꞌ vin̈ yic tzin xibꞌtan vin̈ yic tzꞌoch in mul dꞌa Dios, yujto a vin̈aj Sanbalat chiꞌ yedꞌ vin̈aj Tobías toxo ix yacꞌ qꞌuen tumin ebꞌ vin̈ dꞌa vin̈. 13 Ix tupji vin̈ yuj ebꞌ vin̈ yic tzin xibꞌtej vin̈, yic tzꞌoch in mul yalan ebꞌ vin̈, yic vachꞌ te chuc in bꞌinaji, tzꞌel in qꞌuixvelal. 14 Yuj chiꞌ ix in lesalvi icha tic: Ach in Diosal, tza nacoti yic tzacꞌanoch yaelal dꞌa yibꞌan̈ vin̈aj Sanbalat yedꞌ vin̈aj Tobías chiꞌ yuj tas ix scꞌulej. An̈ejtonaꞌ tza nacot ix Noadías syaloch sbꞌa a checabꞌoc yedꞌ juntzan̈xo ebꞌ syaloch sbꞌa a checabꞌoc snibꞌej tzin xibꞌtej, xin chi dꞌa in lesal chiꞌ.
Ix bꞌoelcꞌoch smuroal Jerusalén
15 Ix bꞌoelcꞌoch muro chiꞌ, 52 cꞌual ix yacꞌ sbꞌoi. Ix bꞌoelcꞌochi ayic 25 yoch uj Elul. 16 Ayic ix yabꞌan masanil ebꞌ ayoch ajcꞌolal dꞌayon̈ yedꞌ masanil juntzan̈xo nación ay dꞌa co lacꞌanil to ix bꞌo muro chiꞌ, ix xivqꞌue ebꞌ. Ix qꞌuixvipax ebꞌ, yujto ix nachajel yuj ebꞌ to a jun munlajel chiꞌ ix yicꞌ sbꞌa yuj scolval co Diosal.
17 A dꞌa juntzan̈ cꞌual chiꞌ tzijtum carta ix stzꞌibꞌejbꞌat ebꞌ vin̈ vinac nivac yopisio aj Judá dꞌa vin̈aj Tobías chiꞌ, ix spacn̈ejxi vin̈. 18 Yujto tzijtum juntzan̈ ebꞌ vin̈ vinac nivac yopisio vachꞌ yacꞌan yedꞌ vin̈, yujto n̈iabꞌil yaj vin̈ dꞌa vin̈aj Secanías yuninal vin̈aj Ara. Axo pax vin̈aj Johanán yuninal vin̈aj Tobías chiꞌ, ix yicꞌlaj sbꞌa vin̈ yedꞌ ix yisil vin̈aj Mesulam yuninal vin̈aj Berequías. 19 Yuj chiꞌ vachꞌ yacꞌan ebꞌ vin̈ nivac yopisio chiꞌ yedꞌ vin̈aj Tobías chiꞌ. Syalan ebꞌ vin̈ dꞌayin to te vachꞌ vin̈, syalanxibꞌat ebꞌ vin̈ dꞌa vin̈ masanil tas sval dꞌa ebꞌ vin̈. Tzijtum carta ix stzꞌibꞌejcot vin̈ yic tzin xibꞌtani.