Esdras 10

Ix icꞌchajel ebꞌ ix ix chꞌoc chon̈abꞌil

Yacbꞌan van slesalvi vin̈aj Esdras chiꞌ, van yocꞌ vin̈ syalanqꞌueta smul ebꞌ yetisraelal vin̈, cumanem vin̈ dꞌa yichan̈ scajnubꞌ Dios. Yacbꞌan chiꞌ, ix och oyan jun n̈ilan̈ ebꞌ yetisraelal vin̈ dꞌa spatic, ebꞌ vin̈ vinac, ebꞌ ix ix yedꞌ ebꞌ unin. Ix te ocꞌ val ebꞌ yedꞌ vin̈. 2 Ix lajvi chiꞌ, axo vin̈aj Secanías yuninal vin̈aj Jehiel dꞌa yin̈tilal vin̈aj Elam, ix alan dꞌa vin̈aj Esdras chiꞌ icha tic: A on̈ tic maj co cꞌanabꞌajej co Diosal, yujto ix quicꞌlaj co bꞌa yedꞌ ebꞌ ix ix chꞌoc chon̈abꞌil, palta jun, ayto val sbꞌonabꞌil jun tic dꞌayon̈. 3 A ticnaic, scacꞌ co tiꞌ, ol co chec pax ebꞌ ix chꞌoc chon̈abꞌil chiꞌ yedꞌ yuneꞌ. Ol co cꞌanabꞌajan tas tzal chiꞌ yedꞌ tas syal ebꞌ scꞌanabꞌajan schecnabꞌil Dios edꞌoc, icha yalan checnabꞌil chiꞌ. 4 Yuj chiꞌ qꞌuean̈ vaan, yujto a ach tic syal a bꞌoan yaj jun tic. Ol on̈ colvaj edꞌoc. Tecꞌbꞌej a bꞌa a bꞌoan jun munlajel tic, xchi vin̈.

5 Yuj chiꞌ ix qꞌue lin̈an vin̈aj Esdras chiꞌ, ix schecan vin̈ yacꞌ stiꞌ ebꞌ yajalil ebꞌ sacerdote, ebꞌ levita yedꞌ juntzan̈xo ebꞌ yetisraelal ebꞌ yic scꞌanabꞌajej ebꞌ icha ix aj yacꞌan stiꞌ chiꞌ. 6 Ix lajvi chiꞌ ix el vin̈aj Esdras chiꞌ dꞌa yichan̈ scajnubꞌ Dios chiꞌ, ix bꞌat vin̈ dꞌa scuarto vin̈aj Johanán yuninal vin̈aj Eliasib. Ataꞌ ix ecꞌ acꞌval yuj vin̈. Malaj jabꞌoc tas ix sva vin̈, malaj pax tas ix yuqꞌuej vin̈, yujto ix te cus scꞌol vin̈ yuj smul ebꞌ ix jax dꞌa Babilonia chiꞌ.

7 Ix lajvi chiꞌ, ix alchaji to a masanil ebꞌ ay dꞌa Jerusalén yedꞌ ebꞌ ay dꞌa juntzan̈xo chon̈abꞌ dꞌa yol yic Judá, aton ebꞌ jaxnac chiꞌ, to smolbꞌej sbꞌa ebꞌ dꞌa Jerusalén chiꞌ. 8 Ix smol alan ebꞌ vin̈ yajal yedꞌ ebꞌ vin̈ ichamtac vinac to dꞌa schabꞌjial scꞌoch ebꞌ anima chiꞌ, ix yalan ebꞌ vin̈ icha tic: Tato ay ebꞌ max javi dꞌa scꞌual chiꞌ, tzꞌicꞌjiecꞌ masanil tastac ay dꞌa ebꞌ, spechjiel ebꞌ dꞌa scal ebꞌ yetchon̈abꞌ chiꞌ, xchi ebꞌ vin̈. 9 Yuj chiꞌ, axo dꞌa jun cꞌu chiꞌ, aton dꞌa 20 yoch sbꞌalun̈il uj, ix smolbꞌan sbꞌa masanil ebꞌ vin̈ ay yopisio yic Judá yedꞌ yic Benjamín dꞌa Jerusalén chiꞌ. Ix em cꞌojan ebꞌ smasanil dꞌa yamaqꞌuil scajnubꞌ Dios. Ste ibꞌxi ebꞌ yuj tas van yalchaj chiꞌ yedꞌ pax yuj jun n̈abꞌ ov yemi. 10 Ix lajvi chiꞌ, ix qꞌue lin̈an vin̈aj sacerdote Esdras chiꞌ, ix yalan vin̈ dꞌa ebꞌ icha tic:

—A ex tic ix och e mul yujto ix eyicꞌlaj e bꞌa yedꞌ ebꞌ ix ix chꞌoc chon̈abꞌil. Icha chiꞌ ix aj svachꞌ och co mul. 11 A ticnaic, alecqꞌueta e mul dꞌa yichan̈ Jehová sDiosal ebꞌ co mam quicham, cꞌanabꞌajejec tas snibꞌej. Iqꞌuequel e bꞌa dꞌa scal ebꞌ anima chꞌoc chon̈abꞌil chiꞌ, tzeyactanpaxcan ebꞌ ix ix, ix eyicꞌlaj e bꞌa yedꞌoc dꞌa scal ebꞌ chiꞌ, xchi vin̈.

12 Ix tacꞌvi ebꞌ anima chiꞌ smasanil, te chaan̈ ix yal ebꞌ icha tic:

—Ol co cꞌanabꞌajej icha tzal chiꞌ. 13 Palta ina max ecꞌlaj n̈abꞌ tic, max yal-laj co can dꞌa calle tic, yujto a jun tic, man̈ jun chabꞌn̈ejoc cꞌual ol yacꞌ sbꞌoi, yujto te nivan on̈ ix och co mul tic. 14 Vachꞌ tato an̈ej ebꞌ yajal scan dꞌa tic yic sbꞌoan yaji, axo masanil ebꞌ cajan dꞌa yoltac co chon̈abꞌ, ebꞌ ix yicꞌlaj sbꞌa yedꞌ ebꞌ ix chꞌoc chon̈abꞌil chiꞌ, syal sjavi ebꞌ dꞌa junoc cꞌu to scan scꞌual. Aocabꞌ ebꞌ juez yedꞌ ebꞌ yichamtac vinaquil chon̈abꞌ tzꞌicꞌancot ebꞌ. Icha chiꞌ ol co cꞌulej co masanil, masanto ol yal stup yoval scꞌol co Diosal dꞌa quibꞌan̈ yuj tas ix co cꞌulej tic, xchi ebꞌ.

15-16 Masanil ebꞌ ix jax dꞌa Babilonia chiꞌ, ix scha scꞌol ebꞌ tas ix alchaj chiꞌ, palta an̈ej vin̈aj Jonatán yuninal vin̈aj Asael yedꞌ vin̈aj Jahazías yuninal vin̈aj Ticva yedꞌ chavan̈ ebꞌ vin̈ levita, aton vin̈aj Mesulam yedꞌ vin̈aj Sabetai maj chaan scꞌool. Yuj chiꞌ a vin̈aj sacerdote Esdras chiꞌ, ix yacꞌoch juntzan̈ ebꞌ vin̈ yajal vin̈, aton ebꞌ vin̈ yajal dꞌa scal ebꞌ yin̈tilal. Ix tzꞌibꞌchajcan sbꞌi ebꞌ vin̈. Axo dꞌa bꞌabꞌel cꞌual yic slajun̈il uj, ix smolbꞌan sbꞌa ebꞌ, yic schꞌolbꞌitan junjun macan̈ ebꞌ. 17 Axo dꞌa bꞌabꞌel cꞌu yic bꞌabꞌel uj, ataꞌ ix lajvi schꞌolbꞌitaj masanil ebꞌ ix yicꞌlaj sbꞌa yedꞌ ebꞌ ix ix chꞌoc chon̈abꞌil chiꞌ.

18 Aton sbꞌi ebꞌ vin̈ ix yicꞌlaj sbꞌa yedꞌ ebꞌ ix chꞌoc chon̈abꞌil chiꞌ:

A dꞌa yin̈tilal ebꞌ sacerdote yedꞌ dꞌa ebꞌ scꞌabꞌyoc vin̈aj Jesúa yuninal vin̈aj Josadac: Aton vin̈aj Maasías, vin̈aj Eliezer, vin̈aj Jarib yedꞌ vin̈aj Gedalías. 19 A ebꞌ vin̈ ix yacꞌ val stiꞌ schecan pax ebꞌ ix ix chiꞌ. Ix yacꞌ junjun nocꞌ chꞌac calnel ebꞌ vin̈ silabꞌil dꞌa Dios yuj smul.

20 A dꞌa ebꞌ yin̈tilal vin̈aj Imer: Aton vin̈aj Hanani yedꞌ vin̈aj Zebadías.

21 Dꞌa ebꞌ yin̈tilal vin̈aj Harim: Aton vin̈aj Maasías, vin̈aj Elías, vin̈aj Semaías, vin̈aj Jehiel yedꞌ vin̈aj Uzías.

22 Dꞌa ebꞌ yin̈tilal vin̈aj Pasur: Aton vin̈aj Elioenai, vin̈aj Maasías, vin̈aj Ismael, vin̈aj Natanael, vin̈aj Jozabad yedꞌ vin̈aj Elasa.

23 Axo dꞌa ebꞌ yin̈tilal ebꞌ levita: Aton vin̈aj Jozabad, vin̈aj Simei, vin̈aj Kelaía, (scuchan pax Kelita) vin̈aj Petaías, vin̈aj Judá yedꞌ vin̈aj Eliezer.

24 Axo dꞌa scal ebꞌ sbꞌitani: Aton vin̈aj Eliasib.

Axo dꞌa scal ebꞌ tan̈vum puerta: Aton vin̈aj Salum, vin̈aj Telem yedꞌ vin̈aj Uri.

25 Axo dꞌa scal juntzan̈xo ebꞌ quetisraelal, dꞌa ebꞌ yin̈tilal vin̈aj Paros: Aton vin̈aj Ramía, vin̈aj Jezías, vin̈aj Malquías, vin̈aj Mijamín, vin̈aj Eleazar, vin̈aj Malquías yedꞌ vin̈aj Benaía.

26 Axo dꞌa ebꞌ yin̈tilal vin̈aj Elam: Aton vin̈aj Matanías, vin̈aj Zacarías, vin̈aj Jehiel, vin̈aj Abdi, vin̈aj Jeremot yedꞌ vin̈aj Elías.

27 Axo dꞌa ebꞌ yin̈tilal vin̈aj Zatu: Aton vin̈aj Elioenai, vin̈aj Eliasib, vin̈aj Matanías, vin̈aj Jeremot, vin̈aj Zabad yedꞌ vin̈aj Aziza.

28 Axo dꞌa ebꞌ yin̈tilal vin̈aj Bebai: Aton vin̈aj Johanán, vin̈aj Hananías, vin̈aj Zabai yedꞌ vin̈aj Atlai.

29 Axo dꞌa ebꞌ yin̈tilal vin̈aj Bani: Aton vin̈aj Mesulam, vin̈aj Maluc, vin̈aj Adaía, vin̈aj Jasub, vin̈aj Seal yedꞌ vin̈aj Ramot.

30 Axo dꞌa ebꞌ yin̈tilal vin̈aj Pahat-moab: Aton vin̈aj Adna, vin̈aj Quelal, vin̈aj Benaía, vin̈aj Maasías, vin̈aj Matanías, vin̈aj Bezaleel, vin̈aj Binúi yedꞌ vin̈aj Manasés.

31 Axo dꞌa ebꞌ yin̈tilal vin̈aj Harim: Aton vin̈aj Eliezer, vin̈aj Isías, vin̈aj Malquías, vin̈aj Semaías, vin̈aj Simeón, 32 vin̈aj Benjamín, vin̈aj Maluc yedꞌ vin̈aj Semarías.

33 Axo dꞌa ebꞌ yin̈tilal vin̈aj Hasum: Aton vin̈aj Matenai, vin̈aj Matata, vin̈aj Zabad, vin̈aj Elifelet, vin̈aj Jeremai, vin̈aj Manasés yedꞌ vin̈aj Simei.

34-37 Axo dꞌa yin̈tilal vin̈aj Bani: Aton vin̈aj Madai, vin̈aj Amram, vin̈aj Uel, vin̈aj Benaía, vin̈aj Bedías, vin̈aj Quelúhi, vin̈aj Vanías, vin̈aj Meremot, vin̈aj Eliasib, vin̈aj Matanías, vin̈aj Matenai, vin̈aj Jaasai.

38-42 Axo dꞌa yin̈tilal vin̈aj Binúi: Aton vin̈aj Simei, vin̈aj Selemías, vin̈aj Natán, vin̈aj Adaía, vin̈aj Macnadebai, vin̈aj Sasai, vin̈aj Sarai, vin̈aj Azareel, vin̈aj Selemías, vin̈aj Semarías, vin̈aj Salum, vin̈aj Amarías yedꞌ vin̈aj José.

43 Axo dꞌa yin̈tilal vin̈aj Nebo: Aton vin̈aj Jeiel, vin̈aj Matatías, vin̈aj Zabad, vin̈aj Zebina, vin̈aj Jadau, vin̈aj Joel yedꞌ vin̈aj Benaía.

44 Masanil juntzan̈ ebꞌ vin̈ tic, ix yicꞌlaj sbꞌa ebꞌ vin̈ yedꞌ ebꞌ ix ix chꞌoc chon̈abꞌil. Ay ebꞌ vin̈ ayxo yuninal yedꞌ ebꞌ ix.