Smul ebꞌ chon̈abꞌ yedꞌ slesal vin̈aj Esdras
9
Ayic ix lajvi juntzan̈ chiꞌ, ix javi jayvan̈ ebꞌ yajal yaj dꞌa scal ebꞌ quetchon̈abꞌ dꞌayin, ix yalan ebꞌ icha tic: Tzijtum ebꞌ quetisraelal yedꞌ ebꞌ sacerdote yedꞌ pax ebꞌ levita max yiqꞌuel-laj sbꞌa dꞌa scal ebꞌ chꞌoc chon̈abꞌil cajan dꞌa co chon̈abꞌ tic, palta a schuc bꞌeybꞌal ebꞌ cananeo, ebꞌ heteo, ebꞌ ferezeo, ebꞌ jebuseo, ebꞌ amonita, ebꞌ moabita, ebꞌ egipcio yedꞌ ebꞌ amorreo, a chiꞌ sbꞌeybꞌalej ebꞌ. 2 A ebꞌ chiꞌ yedꞌ ebꞌ yuninal ebꞌ, van yicꞌlan sbꞌa ebꞌ yedꞌ ebꞌ ix yisil ebꞌ chꞌoc chon̈abꞌil chiꞌ. Yuj chiꞌ a schon̈abꞌ Dios toxo ix somchaj yedꞌ juntzan̈ anima chiꞌ. A val ebꞌ bꞌabꞌel ix yacꞌoch smul tic, aton ebꞌ yajal yaj dꞌa co cal, xchi ebꞌ dꞌayin.3 Ayic ix vabꞌan jun chiꞌ, ix in n̈icꞌchitanbꞌat in pichul. Ix in tzucanel xil in jolom yedꞌ xil in tiꞌ yuj cuscꞌolal. Ix in em cꞌojan, man̈xo animaoc in aj ix vabꞌi. 4 Masanil ebꞌ xiv yuj yoval scꞌol co Diosal yuj smul ebꞌ quetisraelal, ebꞌ janacxi dꞌa Babilonia, ix smolbꞌej sbꞌa ebꞌ vedꞌoc. Cꞌojan inn̈ej emi, man̈xo in animaoc svabꞌi, masanto dꞌa yorail tzꞌacꞌji silabꞌ dꞌa yemcꞌualil. 5 A val dꞌa jun rato chiꞌ, ix in qꞌue vaan bꞌaj cꞌojaninem chiꞌ, n̈icꞌchimtac in pichul chiꞌ. Ix in em cuman in lesalvi. Ix vicꞌanqꞌue in cꞌabꞌ dꞌa yichan̈ Jehová in Diosal. 6 Ix valan icha tic: Ach in Diosal, tzin te qꞌuixvi dꞌayach. Tzin somchaj chaan̈. Maxtzac nachaj vuuj tas svutej valan in bꞌa dꞌayach, yujto ix te ecꞌ yibꞌan̈ co chucal. A co mul chiꞌ ix qꞌuecꞌoch dꞌa satchaan̈. 7 Atax dꞌa stiempoal ebꞌ co mam quicham, masanto ticnaic, te ayon̈n̈ej och co cꞌulan chucal. Yuj co chucal ix on̈ acꞌjioch yedꞌ ebꞌ co reyal yedꞌ ebꞌ sacerdote dꞌa yol scꞌabꞌ ebꞌ sreyal juntzan̈xo nación. Ix on̈ miljichamoc. Ix on̈ icꞌjibꞌat dꞌa chꞌoc chon̈abꞌil. Ix elcꞌajbꞌat tastac ay dꞌayon̈, te qꞌuixvelal ix on̈ ajcani, icha val caj ticnaic. 8 Palta ticnaic jun, ach Jehová co Diosal, yuj a vachꞌcꞌolal, ix on̈ a col jayvan̈ on̈ ayon̈ecꞌ tic. Yuj chiꞌ syal co cajnajxi dꞌa sat lum luum to ic yaj tic. A ach ix acꞌxi co tzalajcꞌolal, ix acꞌanpax co juncꞌolal bꞌaj checabꞌ caji. 9 Vachꞌchom checabꞌ caji, palta maj on̈ actejcanlaj. Ix a chꞌox a vachꞌcꞌolal dꞌayon̈ dꞌa yichan̈ ebꞌ sreyal Persia. Ix acꞌ co qꞌuinal yic ix co bꞌoanxiqꞌue a cajnubꞌ tic, yujto jubꞌilemi. A ach tzon̈ a tan̈vej dꞌa Judá yedꞌ dꞌa Jerusalén tic.
10 Axo ticnaic, ach co Diosal, ¿tas val vachꞌ calan dꞌayach, yujto toxo ix och co mul? Maj co cꞌanabꞌajej a checnabꞌil, 11 aton a checnac yal ebꞌ a checabꞌ, ebꞌ tzach acꞌan servil. A ach tic alnac dꞌayon̈ to juneln̈ej te chuc sbꞌeybꞌal juntzan̈ anima cajan dꞌa lum luum ol acꞌ quiquej, man̈ jantacoc chucal scꞌulej ebꞌ dꞌa yol smacbꞌen. 12 Alannacpaxi to max yal-laj cacꞌan yicꞌlaj sbꞌa ebꞌ ix quisil yedꞌ ebꞌ yuninal ebꞌ. Max yalpax yicꞌlan sbꞌa ebꞌ cuninal yedꞌ ebꞌ ix yisil ebꞌ, max yalpax co colvaj dꞌa ebꞌ. Alannaccani tato max co cꞌulej juntzan̈ chiꞌ, vachꞌ ol aj yelcꞌoch co chon̈abꞌ tic, ol cacꞌan tzalajbꞌoc co cꞌool yuj a vachꞌcꞌolal, yic vachꞌ scacꞌcan lum luum tic smacbꞌenoc ebꞌ quin̈tilal dꞌa juneln̈ej.
13 A val yuj co chucal ix och dꞌayach, yuj chiꞌ ix javi juntzan̈ yaelal tic dꞌa quibꞌan̈, palta a ach tic, ach co Diosal, maj acꞌoch co yaelal icha tas smoj co chaani, quenn̈ej yaelal chiꞌ ix javi dꞌa quibꞌan̈. Palta ix el val dꞌa a cꞌool to pitzan jayvan̈on̈xo tic. 14 Tato te chuc scutejxi co bꞌa dꞌayach, tato squicꞌlaj co bꞌa yedꞌ juntzan̈ chꞌoc animail te chuc sbꞌeybꞌal chiꞌ, ol am te cot oval dꞌayon̈, ol on̈ a sataneli, masanto man̈xa junoc on̈ ol on̈ canoc.
15 Mamin Jehová, co Diosal ach a on̈ israel on̈ tic, te tojoln̈ej tzutej a bꞌa dꞌayon̈, yuj chiꞌ ix to on̈ can jayvan̈on̈xo tic. Palta ina jantac co mul ix ochxi dꞌayach, yuj chiꞌ maxtzac co tecꞌbꞌej co bꞌa coch dꞌa ichan̈, xin chi dꞌa Jehová.