A sbꞌi ebꞌ meltzajnac yedꞌ vin̈aj Esdras
8
A ebꞌ vin̈ yajal ix cot vedꞌ dꞌa Babilonia ayic ayoch vin̈aj Artajerjes reyal, aton sbꞌi ebꞌ vin̈ tic icha tas yaj stzꞌibꞌchaj ebꞌ vin̈ dꞌa junjun yin̈tilal:2-14 Aton vin̈aj Gersón, dꞌa yin̈tilal vin̈aj Finees. Vin̈aj Daniel, dꞌa yin̈tilal vin̈aj Itamar. Vin̈aj Hatús, dꞌa yin̈tilal vin̈aj Secanías, dꞌa yin̈tilal vin̈aj David. Vin̈aj Zacarías, dꞌa yin̈tilal vin̈aj Paros, 150 ebꞌ vin̈ vinac ajun yedꞌ vin̈. Vin̈aj Elioenai yuninal vin̈aj Zeraías, dꞌa yin̈tilal vin̈aj Pahat-moab, 200 ebꞌ vin̈ vinac ajun yedꞌ vin̈. Vin̈aj Secanías yuninal vin̈aj Jahaziel, dꞌa yin̈tilal vin̈aj Zatu, 300 ebꞌ vin̈ vinac ajun yedꞌ vin̈. Vin̈aj Ebed yuninal vin̈aj Jonatán, dꞌa yin̈tilal vin̈aj Adín, 50 ebꞌ vin̈ vinac ajun yedꞌ vin̈. Vin̈aj Jesaías yuninal vin̈aj Atalías, dꞌa yin̈tilal vin̈aj Elam, 70 ebꞌ vin̈ vinac ajun yedꞌ vin̈. Vin̈aj Zebadías yuninal vin̈aj Micael, dꞌa yin̈tilal vin̈aj Sefatías, 80 ebꞌ vin̈ vinac ajun yedꞌ vin̈. Vin̈aj Obadías yuninal vin̈aj Jehiel, dꞌa yin̈tilal vin̈aj Joab, 218 ebꞌ vin̈ vinac ajun yedꞌ vin̈. Vin̈aj Selomit yuninal vin̈aj Josifías, dꞌa yin̈tilal vin̈aj Bani, 160 ebꞌ vin̈ vinac ajun yedꞌ vin̈. Vin̈aj Zacarías yuninal vin̈aj Bebai, dꞌa yin̈tilal vin̈aj Bebai, 28 ebꞌ vin̈ vinac ajun yedꞌ vin̈. Vin̈aj Johanán yuninal vin̈aj Hacatán, dꞌa yin̈tilal vin̈aj Azgad, 110 ebꞌ vin̈ vinac ajun yedꞌ vin̈. A vin̈aj Elifelet, vin̈aj Jeiel yedꞌ vin̈aj Semaías dꞌa scal yin̈tilal vin̈aj Adonicam, tzacꞌanxo ix meltzaj ebꞌ vin̈ yedꞌ 60 ebꞌ vin̈ vinac. Vin̈aj Utai yedꞌ vin̈aj Zabud, dꞌa yin̈tilal vin̈aj Bigvai, 70 ebꞌ vin̈ vinac ajun yedꞌ vin̈.
A ebꞌ vin̈ ix munlaj dꞌa templo
15 A in Esdras in tic, ix in molbꞌej ebꞌ vetchon̈abꞌ tic dꞌa stiꞌ jun a aꞌ scuchan Ahava, oxeꞌ cꞌual on̈ ecꞌ taꞌ. Ix in sayanecꞌ ebꞌ levita dꞌa scal ebꞌ anima chiꞌ yedꞌ dꞌa scal ebꞌ sacerdote, malaj junoc ebꞌ ix ilchaj vuuj. 16 Ix in checanbꞌat vin̈aj Eliezer, vin̈aj Ariel, vin̈aj Semaías, vin̈aj Elnatán, vin̈aj Jarib, vin̈aj Elnatán, vin̈aj Natán, vin̈aj Zacarías yedꞌ vin̈aj Mesulam. A ebꞌ vin̈ tic nivac yelcꞌoch ebꞌ vin̈ yedꞌ pax ebꞌ vin̈ cꞌaybꞌum, aton vin̈aj Joiarib yedꞌ vin̈aj Elnatán. 17 Ix in checbꞌat ebꞌ vin̈ yal dꞌa vin̈aj Iddo, yajal dꞌa jun lugar scuch Casifia yedꞌ dꞌa masanil ebꞌ ayecꞌ yedꞌ vin̈ taꞌ, aton ebꞌ yin̈tilal ebꞌ munlajnac dꞌa stemplo Dios to scheccot ebꞌ anima ebꞌ yic scolvaj ebꞌ quedꞌoc dꞌa scajnubꞌ co Diosal. 18 Yuj scolval Dios ix icꞌchajcot vin̈aj Serebías yuj ebꞌ vin̈, yujto a vin̈ chiꞌ te jelan vin̈, yin̈tilal vin̈ jun vin̈ levita scuchan Mahli. A vin̈aj Serebías chiꞌ, ix cot vin̈ yedꞌ ebꞌ yuninal yedꞌ ebꞌ yucꞌtac, 18 ebꞌ dꞌa smasanil. 19 Ix yicꞌanpaxcot vin̈aj Hasabías ebꞌ vin̈ yedꞌ vin̈aj Jesaías yedꞌ pax yuninal ebꞌ vin̈ yedꞌ ebꞌ scꞌabꞌyoc ebꞌ vin̈, 20 ebꞌ dꞌa smasanil, yin̈tilal ebꞌ vin̈aj Merari.
20 Ix javipax 220 ebꞌ yin̈tilal ebꞌ munlajnac dꞌa templo, ebꞌ acꞌbꞌilcanoch yuj vin̈aj rey David yedꞌ ebꞌ scuchbꞌan ebꞌ levita dꞌa yopisio. Masanil juntzan̈ ebꞌ tic, tzꞌibꞌabꞌil sbꞌi ebꞌ.
21 Ix lajvi chiꞌ, ix valani to tzon̈ och dꞌa tzecꞌojcꞌolal dꞌa stiꞌ aꞌ nivan Ahava chiꞌ, yic vachꞌ sco cha co mulej co chucal dꞌa yichan̈ co Diosal, sco cꞌananpax dꞌay to tzon̈ yicꞌbꞌat dꞌa vachꞌil yedꞌ ebꞌ cuninal yedꞌ masanil tas ay dꞌayon̈. 22 Ix in qꞌuixvi in cꞌanan ebꞌ soldado dꞌa vin̈ rey, aton ebꞌ sbꞌey dꞌa yoc yedꞌ ebꞌ ayqꞌue dꞌa yibꞌan̈ chej, yic tzon̈ stan̈van ebꞌ dꞌa ebꞌ ajcꞌol dꞌa yoltac bꞌe, yujto toxo ix cal dꞌa vin̈ rey chiꞌ to a co Diosal stan̈van masanil mach tzꞌacꞌanoch yipoc scꞌool, palta scot yoval, syacꞌancot yaelal dꞌa yibꞌan̈ mach max cꞌanabꞌajani. 23 Yuj val chiꞌ, ix on̈ och dꞌa tzecꞌojcꞌolal, ix co cꞌanan dꞌa Dios to tzon̈ stan̈vej. Ix yabꞌ val tas ix cal chiꞌ.
24 Ix lajvi chiꞌ, ix in sicꞌanel lajchavan̈ ebꞌ vin̈ sat yaj dꞌa ebꞌ vin̈ sacerdote: Aton vin̈aj Serabías, vin̈aj Hasabías yedꞌ lajun̈van̈xo ebꞌ vin̈. 25-27 Ix lajvi chiꞌ, ix vechtan juntzan̈ silabꞌ ix acꞌchaj yuj sbꞌochajxi stemplo co Diosal, ix in pucanbꞌat dꞌa lajchavan̈ ebꞌ vin̈ sacerdote ix in siqꞌuel chiꞌ. A juntzan̈ silabꞌ chiꞌ, ay qꞌuen plata, qꞌuen oro yedꞌ juntzan̈ yamcꞌabꞌ ix yacꞌ vin̈ rey yedꞌ ebꞌ tzꞌacꞌan srazón vin̈ yedꞌ ebꞌ ay yopisio yedꞌ vin̈ yedꞌ pax tastac ix yacꞌ ebꞌ quetisraelal ayecꞌ taꞌ. A dꞌa smasanil, ay 500 quintal qꞌuen plata. Yedꞌ juntzan̈xo yamcꞌabꞌ nabꞌa plata, 75 quintal yalil yedꞌ 75 quintal qꞌuen oro yedꞌ pax 20 ucꞌabꞌ oro, 17 libra yalil yedꞌ chabꞌxo yamcꞌabꞌ bronce te vachꞌ yaj sbꞌoi, lajan stojol icha yamcꞌabꞌ oro.
28 Ix lajvi chiꞌ, ix valan dꞌa ebꞌ vin̈ icha tic: A ex tic sicꞌbꞌil exxo el yicoc Jehová yedꞌ juntzan̈ qꞌuen oro, qꞌuen plata yedꞌ masanil yamcꞌabꞌ ix siaj dꞌa Jehová co Diosal yedꞌ ebꞌ co mam quicham. 29 Tze tan̈vej val qꞌueen masanto ol echtaj qꞌuen dꞌa yoltac scuartoal templo dꞌa Jerusalén dꞌa yichan̈ ebꞌ yajalil ebꞌ sacerdote yedꞌ ebꞌ levita yedꞌ ebꞌ yajal yaj dꞌa scal ebꞌ quetisraelal, xin chi dꞌa ebꞌ vin̈. 30 Yuj chiꞌ a ebꞌ vin̈ sacerdote yedꞌ ebꞌ vin̈ levita chiꞌ, ix schaan masanil qꞌuen silabꞌ ebꞌ vin̈ yedꞌ juntzan̈ yamcꞌabꞌ ix echtaj chiꞌ dꞌa yol scꞌabꞌ ebꞌ vin̈ yic syicꞌanbꞌat ebꞌ vin̈ dꞌa scajnubꞌ co Diosal dꞌa Jerusalén.
31 Ayic slajchavil cꞌual dꞌa bꞌabꞌel uj, ix on̈ el dꞌa stiꞌ aꞌ Ahava chiꞌ, ix on̈ cot dꞌa Jerusalén tic. A co Diosal ix on̈ colan dꞌa ebꞌ ajcꞌool yedꞌ dꞌa ebꞌ elcꞌum dꞌa yoltac bꞌe. 32 Ayic ix on̈ javi dꞌa Jerusalén tic, oxeꞌ cꞌual ix quicꞌ quip. 33 Axo dꞌa schan̈il cꞌual jun, ix on̈ bꞌat dꞌa scajnubꞌ co Diosal yic tzꞌechtaj qꞌuen plata yedꞌ qꞌuen oro yedꞌ jantac yamcꞌabꞌ yic scajnubꞌ co Diosal chiꞌ. Ix lajvi chiꞌ, ix acꞌchaj dꞌa vin̈ sacerdote scuchan Meremot yuninal vin̈aj Urías. Aypaxecꞌ vin̈aj Eleazar yuninal vin̈aj Finees yedꞌ vin̈ yedꞌ juntzan̈xo ebꞌ vin̈ levita, aton vin̈aj Jozabad yuninal vin̈aj Jesúa yedꞌ vin̈aj Noadías yuninal vin̈aj Binúi. 34 A dꞌa jun cꞌu chiꞌ, ix echtaj qꞌueen, ix bꞌischajpax qꞌuen smasanil, tzꞌacan yaj qꞌueen. Icha chiꞌ ix aj stzꞌibꞌchajcan qꞌueen smasanil.
35 Ix lajvi chiꞌ, masanil ebꞌ ix jax dꞌa Babilonia, ix yacꞌan nocꞌ silabꞌ ebꞌ stzꞌa smasanil dꞌa co Diosal a on̈ israel on̈ tic. Ix acꞌchaj lajchavan̈ nocꞌ quelemtac vacax cuuj co masanil, 96 nocꞌ chꞌac calnel yedꞌ 77 nocꞌ quelemtac calnel. Ix acꞌchaj pax lajchavan̈ nocꞌ mam chiva silabꞌil yic tzꞌacꞌji tup mul. Masanil juntzan̈ chiꞌ ix n̈usjitzꞌa dꞌa yichan̈ Jehová. 36 Ix lajvi chiꞌ, ix acꞌchaj bꞌaj tzꞌibꞌabꞌil schecnabꞌil vin̈ rey dꞌa ebꞌ ayoch yajalil dꞌa stojolal bꞌaj tzꞌem cꞌu dꞌa aꞌ Éufrates, yuj chiꞌ a ebꞌ ix colvaj quedꞌoc dꞌa munlajel dꞌa stemplo co Diosal.