4 Ayic manto uji jun chiꞌ, a vin̈aj sacerdote Eliasib chiꞌ ayoch yajalil yilan juntzan̈ bꞌaj molan tastac tzꞌacꞌji dꞌa scajnubꞌ co Diosal. A vin̈aj Eliasib chiꞌ vachꞌ yacꞌan vin̈ yedꞌ vin̈aj Tobías, yuj chiꞌ ix yacꞌ jun nivan cuarto vin̈ dꞌa vin̈aj Tobías chiꞌ. 5 A jun cuarto chiꞌ, aton bꞌaj smolchajtaxon ofrenda, incienso, yamcꞌabꞌ, sdiezmoal ixim trigo, vino yedꞌ aceite, aton juntzan̈ chiꞌ ix alchaji to tzꞌacꞌji dꞌa ebꞌ levita, dꞌa ebꞌ sbꞌitani yedꞌ dꞌa ebꞌ tan̈vum puerta yedꞌ pax juntzan̈ colval tzꞌacꞌji dꞌa ebꞌ sacerdote. 6 Palta ayic ix uji jun chiꞌ, a in tic man̈ in ayoc ecꞌ dꞌa Jerusalén tic, yujto ayic 32 abꞌilxo yoch vin̈aj Artajerjes reyal dꞌa Babilonia, ataꞌ ix in cꞌochxi dꞌa yichan̈ vin̈ rey chiꞌ. Palta ayic toxo ix ecꞌ jabꞌocxo tiempoal ix in cꞌananxi in permiso dꞌa vin̈ rey chiꞌ, 7 ix in jax dꞌa Jerusalén tic. Ataꞌ ix vabꞌi tastac man̈ vachꞌoc ix scꞌulej vin̈aj Eliasib chiꞌ, to ix yacꞌ jun nivan cuarto vin̈, aton jun ay dꞌa stiꞌ yamaqꞌuil stemplo Dios dꞌa vin̈aj Tobías chiꞌ. 8 Ix cot val voval yuj jun chiꞌ, yuj chiꞌ a tas ayoch yuj vin̈aj Tobías dꞌa yol cuarto chiꞌ, ix in julelta dꞌa stiꞌ. 9 Ix lajvi chiꞌ ix valani to sacbꞌitaj jun cuarto chiꞌ icha yalan ley, tzꞌacꞌchajxioch yamcꞌabꞌ yic stemplo Dios chiꞌ dꞌa yool, ofrenda yedꞌ incienso.

10 Ix vabꞌanpaxi to maxtzac acꞌchaj svael ebꞌ levita yedꞌ ebꞌ sbꞌitani, aton ebꞌ ayoch dꞌa yibꞌan̈ yoch ejmelal, yuj chiꞌ ix yactejcan yopisio ebꞌ, ix pax ebꞌ dꞌa schon̈abꞌ junjun. 11 Yuj chiꞌ ix in tumej ebꞌ yajal yaji, yujto ix yactejcan stemplo Dios ebꞌ, maxtzac yil-laj ebꞌ. Ix lajvi chiꞌ ix in molbꞌan ebꞌ sacerdote yedꞌ ebꞌ levita yic svacꞌanxioch ebꞌ dꞌa yopisio. 12 Axo masanil ebꞌ anima aj Judá tic, ix syamxioch ebꞌ yacꞌan sdiezmoal ixim trigo, vino yedꞌ aceite, ix yacꞌanxi ebꞌ bꞌaj smolchaji. 13 Ix lajvi chiꞌ ix vacꞌanoch vin̈aj sacerdote Selemías yilumaloc bꞌaj smolchaj chiꞌ yedꞌ pax vin̈aj Sadoc vin̈ tzꞌibꞌum yedꞌ pax jun vin̈ levita scuchan Pedaías yedꞌ vin̈aj Hanán yuninal vin̈aj Zacur yixchiquin vin̈aj Matanías yic scolvaj vin̈ yedꞌ ebꞌ vin̈, yujto te vachꞌ spensar ebꞌ vin̈. Aton ebꞌ vin̈ ix ochcan dꞌa yibꞌan̈ spojanecꞌ vael dꞌa masanil ebꞌ yetbꞌeyum chiꞌ.

14 Ix valan icha tic dꞌa in lesal: Ach in Diosal, nacot juntzan̈ tas ix in cꞌulej tic. Mocabꞌ bꞌat satcꞌolal uj masanil tas ix in cꞌulej dꞌa a cajnubꞌ yic tzꞌoch ejmelal dꞌayach, xin chi.

15 A dꞌa juntzan̈ cꞌual chiꞌ, ix vilaꞌ to ay ebꞌ dꞌa yol yic Judá tic stecꞌanel yal uva dꞌa scꞌual icꞌoj ip. Tzꞌecꞌpax ebꞌ cuchoj trigo, tzꞌecꞌpax nocꞌ sbꞌuru ebꞌ cuchoj vino yedꞌ cuchoj sat uva ayto och dꞌa scꞌojlabꞌil, cuchoj higo yedꞌ yaln̈ej tas icatzil. Syicꞌancot juntzan̈ chiꞌ ebꞌ dꞌa Jerusalén tic dꞌa scꞌual icꞌoj ip. Yuj chiꞌ ix in cach ebꞌ to maxtzac schon̈ juntzan̈ chiꞌ ebꞌ dꞌa scꞌual icꞌoj ip. 16 An̈ejtonaꞌ ay pax juntzan̈ ebꞌ aj Tiro cajan dꞌa Jerusalén, syicꞌcot nocꞌ chay ebꞌ yedꞌ juntzan̈xo tastac schon̈ dꞌa Jerusalén tic, schon̈an ebꞌ dꞌa ebꞌ quetisraelal dꞌa scꞌual icꞌoj ip. 17 Yuj chiꞌ ix in cach ebꞌ yajal yaj dꞌa Judá tic, ix valan dꞌa ebꞌ icha tic:

—Man̈ jantacoc chucal tze cꞌulej dꞌa scꞌual icꞌoj ip, icha junoc comon cꞌual tzeyutej. 18 Aton juntzan̈ tic scꞌulejnac ebꞌ co mam quicham, yuj chiꞌ ix yacꞌcot juntzan̈ yaelal tic co Diosal dꞌa quibꞌan̈ yedꞌ dꞌa yibꞌan̈ jun chon̈abꞌ tic. ¿Tom e gana tze tzuntzejcot yoval scꞌol Dios dꞌa quibꞌan̈ a on̈ israel on̈ tic, yuj chiꞌ icha junoc comon cꞌual tzeyutej scꞌual icꞌoj ip tic? xin chi dꞌa ebꞌ.

19 Ix in checan macchaj spuertail Jerusalén tic dꞌa yemcꞌualil ayic van yoch scꞌual icꞌoj ip. Max jacvilaj masanto tzꞌecꞌbꞌat jun cꞌual chiꞌ. Ix vacꞌanpaxoch ebꞌ in checabꞌ stan̈van puerta chiꞌ yic vachꞌ malaj junoc icatz tzꞌoch dꞌa jun cꞌu chiꞌ. 20 A ebꞌ chon̈vajum chiꞌ chabꞌ oxeꞌ acꞌval ix vay ebꞌ dꞌa spatictac chon̈abꞌ Jerusalén tic. 21 Yuj chiꞌ ix in cachan ebꞌ, ix valani: ¿Tas yuj tzex vaycan dꞌa spatictac muro? Tato ol e cꞌulejn̈ej icha tic, ol ex vacꞌoch dꞌa preso, xin chi dꞌa ebꞌ. Yuj chiꞌ ix yactej ebꞌ sjavi dꞌa scꞌual icꞌoj ip chiꞌ. 22 Ix lajvi chiꞌ, ix valan dꞌa ebꞌ levita to sacbꞌitej sbꞌa ebꞌ yic sbꞌat stan̈van puerta chiꞌ ebꞌ, yic vachꞌ max ixtaxel scꞌual icꞌoj ip chiꞌ. Yuj chiꞌ ix val dꞌa in lesal icha tic: Ach in Diosal, na in cot yuj juntzan̈ tas ix in cꞌulej tic, ocꞌocabꞌ a cꞌol dꞌayin icha syal a vachꞌcꞌolal, xin chi. 23 An̈ejaꞌ ix vilanpax dꞌa juntzan̈ cꞌual chiꞌ to ay ebꞌ vin̈ vetisraelal chiꞌ ix yicꞌlaj sbꞌa yedꞌ ebꞌ ix aj Asdod, ebꞌ ix aj Amón yedꞌ ebꞌ ix aj Moab. 24 Nan̈alxo yal yuninal ebꞌ tzaxo alan stiꞌ ebꞌ aj Asdod chiꞌ yedꞌ stiꞌ juntzan̈xo nación. Axo pax co tiꞌ a on̈ israel on̈ tic, maxtzac yal-laj yalan ebꞌ. 25 Yuj chiꞌ ix in tumej ebꞌ, ix in catabꞌan ebꞌ. Ay ebꞌ ix in macꞌaꞌ, ix in tzuquel xil sjolom ebꞌ, ix vacꞌan pural ebꞌ yacꞌan stiꞌ dꞌa Dios to man̈xo ol yicꞌlaj sbꞌa yal yuninal ebꞌ yedꞌ ebꞌ chꞌoc chon̈abꞌil chiꞌ, man̈xo ol ochlaj ebꞌ ix chꞌoc chon̈abꞌil chiꞌ yetbꞌeyumoc ebꞌ. Ix valanpaxi: 26 Icha val tic aj yochnac smul vin̈aj Salomón ochnac reyal dꞌa co chon̈abꞌ tic. Malaj junocxo rey lajan yedꞌ vin̈ dꞌa juntzan̈xo nación, te xajan vin̈ yuj Dios, yuj chiꞌ acꞌjinacoch vin̈ co reyaloc yuuj, palta cuchbꞌajnacbꞌat vin̈ dꞌa chucal yuj ebꞌ ix chꞌoc chon̈abꞌil chiꞌ. 27 Yuj chiꞌ, max yal co cꞌool tzeyacꞌoch e mul te chuc dꞌa yichan̈ co Diosal, tzeyicꞌlan e bꞌa yedꞌ ebꞌ ix chꞌoc chon̈abꞌil tic, xin chi dꞌa ebꞌ vin̈.

28 A junoc ebꞌ yuninal vin̈aj Joiada, yixchiquin vin̈aj Eliasib sat sacerdote, a ix yisil vin̈aj Sanbalat, vin̈ aj Horón, a ix yetbꞌeyum vin̈. Yuj chiꞌ ix in spechel vin̈ dꞌa Jerusalén tic. 29 Yuj chiꞌ ix val dꞌa in lesal icha tic: Ach in Diosal, il val juntzan̈ chucal ix scꞌulej ebꞌ, yuj chiꞌ ix juviel jun opisio yic sacerdoteal yedꞌ trato ix a bꞌo yedꞌ ebꞌ yedꞌ pax ebꞌ yin̈tilal Leví, xin chi.

30 Icha chiꞌ ix aj in bꞌoan tastac ix juvibꞌat yuj ebꞌ chꞌoc chon̈abꞌil chiꞌ, ix vacꞌanxioch ebꞌ sacerdote yedꞌ ebꞌ levita dꞌa yopisio dꞌa stzolal. 31 Ix valani tas cꞌual tzꞌicꞌchajcot teꞌ cꞌatzitz. Ix valanpax yuj sbꞌabꞌel sat avbꞌen yovalil syicꞌcot ebꞌ dꞌa scajnubꞌ Dios. Yuj chiꞌ ix val dꞌa in lesal icha tic: Ach in Diosal, na in coti, ocꞌocabꞌ a cꞌol dꞌayin, xin chi.