—¿Bꞌajtil ach coti? xchi.

Ix yalan vin̈ icha tic:

—Ix in cot dꞌa yolyibꞌan̈qꞌuinal, yujto tzecꞌ voymitej lum smasanil, xchi vin̈.

3 Yuj chiꞌ ix yalan Jehová chiꞌ dꞌa vin̈:

—¿Tzam il tas yaj vin̈ in checabꞌ aj Job? Malaj val junocxo mach dꞌa yolyibꞌan̈qꞌuinal chiꞌ lajan yedꞌ vin̈. Te tojol spensar vin̈, te vachꞌ sbꞌeybꞌal vin̈. Ay val velcꞌoch dꞌa yol sat vin̈, syaꞌilej val sbꞌa vin̈, max yacꞌoch sbꞌa vin̈ dꞌa scal chucal. Uuj val ix in satel masanil tastac ay dꞌa vin̈, palta tocval yuj chiꞌ ix juviel spensar vin̈, xchi.

4 Ix tacꞌvi vin̈ Satanás chiꞌ icha tic:

—Tato malaj tzꞌicꞌan snivanil junoc mach, ¿toc ay tas snaꞌa? Bꞌecan scꞌol slajviel masanil tastac ay dꞌay yic scolan sqꞌuinal. 5 Palta tato a ticnaic a dꞌa snivanil vin̈ chiꞌ tzacꞌoch junoc yaelal, ol ilani tato man̈ ol yal chuc vin̈ dꞌayach, xchi vin̈.

6 Ix tacꞌvi Jehová chiꞌ dꞌa vin̈:

—Ichocabꞌ taꞌ. Olxo ilaꞌ tas tza cꞌulej yedꞌ snivanil vin̈ chiꞌ, an̈ej bꞌian to malaj alan ic icꞌanel sqꞌuinal vin̈, xchi.

7 Ix el vin̈ Satanás chiꞌ dꞌa yichan̈ Jehová. Ix bꞌat yacꞌanqꞌue juntzan̈ yabꞌil vin̈ te nivan dꞌa snivanil vin̈aj Job chiꞌ, schacot dꞌa yoc vin̈ masanto dꞌa sjolom vin̈. 8 Yuj chiꞌ ix bꞌat em cꞌojan vin̈aj Job chiꞌ dꞌa scal qꞌuen ticꞌaqꞌuil taan̈. Ix yicꞌancot jabꞌ stiꞌ lum chen vin̈, sjotzꞌanecꞌ lum vin̈ dꞌay. 9 Palta axo ix yetbꞌeyum vin̈ ix alan dꞌay icha tic:

—¿Tom an̈ejaꞌ vachꞌn̈ej tzutej a pensar? Al chuc dꞌa Dios, tzach cham bꞌian, xchi ix.

10 Ix tacꞌvi vin̈ icha tic:

—Ach ix, lajan val a lolon icha ebꞌ ix ix malaj jabꞌoc spensar. Toxo ix co cha svachꞌcꞌolal Dios, ¿tom man̈ ol co chapax co yaelal syacꞌaꞌ? xchi vin̈aj Job chiꞌ.

Yuj chiꞌ, vachꞌchom ayoch syaelal vin̈, palta maj ochlaj smul vin̈ yujto malaj chuc ix yal vin̈ dꞌa spatic Dios.

11 Ay oxvan̈ ebꞌ vin̈ yamigo vin̈aj Job chiꞌ: Aton vin̈aj Elifaz aj Temán, vin̈aj Bildad aj Súa yedꞌ vin̈aj Zofar aj Naamat. Ayic ix yabꞌan specal masanil juntzan̈ yaelal ix javi dꞌa yibꞌan̈ vin̈aj Job chiꞌ ebꞌ vin̈, ix yacꞌanoch ebꞌ vin̈ dꞌa scꞌol scot yacꞌ snivanil scꞌol vin̈, yic tzul mol cus pax ebꞌ vin̈ yuj syaelal vin̈ chiꞌ. 12 Najatto van scot ebꞌ vin̈, ix yilancot vin̈aj Job chiꞌ ebꞌ vin̈. Pural ix och sat ebꞌ vin̈ dꞌa vin̈, yuj chiꞌ ix syamanoch ebꞌ vin̈ yocꞌ yuj vin̈. Ix te cus ebꞌ vin̈, ix sn̈icꞌchitanbꞌat spichul ebꞌ vin̈. Ix stzipanchaan̈ pococ ebꞌ vin̈ dꞌa chaan̈, axo dꞌa sjolom ebꞌ vin̈ tzꞌem luum. 13 Ix em cꞌojan ebꞌ vin̈ dꞌa sat lum yedꞌ vin̈, uqueꞌ cꞌual, uqueꞌ acꞌval ix ecꞌ ebꞌ vin̈ yedꞌ vin̈ taꞌ, malaj junoc bꞌelan̈ lolonel ix yal ebꞌ vin̈, yujto te ov yacꞌan syaelal vin̈aj Job chiꞌ ix yil ebꞌ vin̈.