Ix tzactzaj vin̈aj Job yuj syaelal
3
1-2 Ayic ix lajviecꞌ juntzan̈ chiꞌ, ix scatabꞌan vin̈aj Job chiꞌ jun cꞌu bꞌaj aljinac. Ix yalan vin̈ icha tic:3 Tzin catabꞌej jun acꞌval ayic scuchannac in och ix in nun. Tzin catabꞌej jun cꞌu ayic valjinac.
4 Comonoc a jun cꞌu chiꞌ och dꞌacꞌvalilal. Comonoc cann̈ej icha chiꞌ yuj Dios, maj sacbꞌoc.
5 Comonoc ay val junoc nivan veven ochnac, yic vachꞌ qꞌuicꞌbꞌicaneli. Comonoc ay val junoc nivan qꞌuicꞌ asun musani, ma junoc qꞌuicꞌ och dꞌa sat cꞌu, yic ay xivcꞌolal dꞌa jun cꞌu chiꞌ.
6 Comonoc qꞌuicꞌalqꞌuinal ajcan jun acꞌval chiꞌ, yic vachꞌ maj och jun cꞌu chiꞌ sbꞌisuloc scꞌual yic jun uj chiꞌ yedꞌ jun abꞌil chiꞌ.
7 Comonoc malaj tas uji dꞌa jun acꞌval chiꞌ, yic vachꞌ malaj av yic tzalajcꞌolal ochi.
8 Comonoc scatabꞌaj jun acꞌval chiꞌ yuj ebꞌ ajbꞌaal, aton ebꞌ syal scuchbꞌan nocꞌ leviatán.*
9 Comonoc maj qꞌueul qꞌuen nivac cꞌanal dꞌa jun qꞌuin̈ibꞌalil chiꞌ. Comonoc maj qꞌueul saquilqꞌuinal stan̈vaj sqꞌueuli yedꞌ saquil yich chaan̈.
10 Tzin catabꞌej jun acꞌval chiꞌ, yujto maj syamoch vaan valjubꞌal. Tato maay, tecan max vil jantac yaelal yedꞌ cuscꞌolal tic.
11 Octom cham in dꞌa yol scꞌol ix in nun. Octom cham in ayic van valji.
12 Octom malaj jolom penec chaan in. Octom malaj im in chuꞌu yic tzin qꞌuibꞌi.
13 Octom chamnac in, tzalajcꞌolal am tzin vay ticnaic. Juncꞌolal am svicꞌ vip
14 yedꞌ ebꞌ rey yedꞌ ebꞌ yajal, aton ebꞌ ix bꞌoanxiqꞌue juntzan̈ nivac pat emnac lan̈najoc,
15 ma yedꞌ ebꞌ nivac yajal bꞌudꞌan spalacio yuj qꞌuen oro yedꞌ qꞌuen plata.
16 ¿Tas yuj maj in mucchaj icha junoc unin ton̈ej tzꞌeqꞌui, ma icha junoc unin chamnacxo tzꞌalji?
17 A bꞌaj smucchaj ebꞌ chamnac, ataꞌ slajvican bꞌaj syixtej anima ebꞌ chuc. A pax taꞌ syicꞌ yip ebꞌ tzꞌixtaj yuj ebꞌ chiꞌ.
18 Ataꞌ syicꞌ yip ebꞌ icha preso yaj dꞌa munlajel, man̈xa bꞌaj syabꞌ ebꞌ stumaj yuj ebꞌ tzꞌilan munlajel chiꞌ.
19 Ataꞌ ayecꞌ ebꞌ nivac yelcꞌochi yedꞌ ebꞌ malaj yelcꞌochi yedꞌ ebꞌ elnacxo dꞌa yalan̈ smandar spatrón. Lajanxon̈ej ebꞌ smasanil.
20 ¿Tas yuj syacꞌ Dios saquilqꞌuinal yil ebꞌ tzꞌixtaji? ¿Tas yuj syacꞌ sqꞌuinal ebꞌ ayoch dꞌa syaelal,
21 ebꞌ snibꞌej cham sbꞌa, palta max chamlaj ebꞌ, vachꞌchom snibꞌej chamel chiꞌ ebꞌ dꞌa yichan̈ bꞌeyumal?
22 A jun anima chiꞌ schax stzalajcꞌolal yuuj ayic toxo ix bꞌatcan dꞌa yol bꞌaj smucchaji.
23 ¿Tas yuj an̈ejaꞌ yacꞌan in qꞌuinal Dios, a in to man̈ vojtacoc tas ol in ajoc, a in icha val to macan in yuuj?
24 Maxtzac yal in vaꞌi, maxtzac yal pax vucꞌan aꞌ yuj oqꞌuel yuj in yaelal.
25 A tas bꞌaj svecxiv in bꞌa, aton sjavi dꞌa vibꞌan̈.
26 Maxtzac yal vicꞌan jabꞌoc vip, man̈xalaj svachꞌil vaji. Man̈xa jabꞌoc in juncꞌolal, axon̈ej yaelal tzin icꞌani, xchi vin̈aj Job chiꞌ.