Jun bꞌabꞌel lolonel ix ochi
(Job 4–14)
4
Ix yalan vin̈aj Elifaz aj Temán dꞌa vin̈aj Job chiꞌ icha tic:2 Ach Job, tecan chuc tzabꞌi tato ay mach stecꞌbꞌej sbꞌa slolon edꞌoc, palta maxtzac techaj vuuj tato ton̈ej svabꞌi.
3 Yujto tzijtum mach bꞌaj ix acꞌ cꞌaybꞌubꞌal, ix acꞌan pax stecꞌanil ebꞌ somchajnaqueli.
4 Ix acꞌ stecꞌanil ebꞌ telvinac. Ix a yamanoch vaan ebꞌ ay schabꞌcꞌolal,
5 axo yic ix ja yaelal dꞌa ibꞌan̈ tic, man̈xa jabꞌoc a tecꞌanil.
6 A ach tic tza cꞌanabꞌajej val Dios, tojol a bꞌeybꞌal alani. ¿Tas yuj somchajel a cꞌol ticnaic?
7 Navalcoti, ¿tocval sjavi yaelal dꞌa yibꞌan̈ ebꞌ malaj smul? ¿Tocval comon scham ebꞌ vachꞌ sbꞌeybꞌal?
8 A svilani, a ebꞌ scꞌulan chucal, a tas scꞌulej ebꞌ chiꞌ sjavi dꞌa yibꞌan̈.
9 Syacꞌcot yoval scꞌol Dios dꞌa yibꞌan̈ ebꞌ, satjiel ebꞌ dꞌa juneln̈ej yuuj, icha tzꞌaj satjiel tastac yuj chacxuxum icꞌ.
10 Tzꞌel yav ebꞌ icha yel yav nocꞌ choj, palta a Dios tzꞌacꞌan em numan ebꞌ, icha yem numan nocꞌ choj smacꞌjiel ye.
11 Maxtzac yal-laj sva nocꞌ, scham nocꞌ yuj vejel, axo nocꞌ yunetac, toxon̈ej saclemcanbꞌat nocꞌ. Icha chiꞌ tzꞌaj ebꞌ chuc chiꞌ yuj Dios.
12 Cꞌunn̈ej ix cꞌoch jun lolonel ix sajjioch dꞌa in chiquin, pural val ix vabꞌi.
13 A dꞌacꞌvalil ayic yoralil svay anima, ix in vayichej jun tas te xivubꞌtac.
14 Ix javi jun nivan xivcꞌolal dꞌayin, ix in ibꞌxiqꞌue yuj xivelal.
15 Ay jun icha spixan anima ix vabꞌ yecꞌ masasoc dꞌa in sat, ix qꞌue chijan xil in jolom yuj xivelal.
16 Ix cꞌoch lin̈an jun pixan chiꞌ dꞌa in tzꞌey ix vabꞌi. Maj vilochlaj. Axo ix vabꞌani ix sajsonqꞌuei, ix yalan icha tic:
17 ¿Tocval ay junoc anima tojol dꞌa yichan̈ Dios? Vachꞌchom ay mach te tecꞌan, ¿tocval malaj jabꞌoc spaltail dꞌa yichan̈ mach ix bꞌoani?
18 Ina max yacꞌ val och Dios ebꞌ schecabꞌ ay dꞌa satchaan̈ yipoc scꞌool. Inatax ebꞌ ángel tzꞌoch spaltail ebꞌ dꞌa yichan̈.
19 Ocxom val ebꞌ anima. Jabꞌn̈ej sqꞌuinal ebꞌ, lajan ebꞌ icha junoc xan pat bꞌobꞌil dꞌa yibꞌan̈ lum pococ, cꞌun yem lan̈najoc. Syal stecꞌchajem ebꞌ icha nocꞌ ij.
20 Vachꞌchom vachꞌ ebꞌ dꞌa qꞌuin̈ibꞌalil, axo tzꞌemcan cꞌu, satxicanem ebꞌ. Satel ebꞌ dꞌa juneln̈ej, malaj mach scus yuj ebꞌ.
21 Icha yic tzꞌem lan̈naj junoc mantiado spolchaj schꞌan̈al, icha chiꞌ yaj sqꞌuinal ebꞌ anima. Tzꞌecꞌbꞌat lemnajoc, malaj jabꞌoc jelanil syicꞌcan ebꞌ, xchi jun pixan chiꞌ dꞌayin.