5
A ticnaic ach Job elocabꞌ av, ol quilaꞌ mach junoc ol tacꞌvoc dꞌayach. ¿Mach junoc ángel ol ach colanoc?2 A junoc anima chuc spensar, schichon scꞌool, snibꞌanoch tastac. A schichoncꞌolal chiꞌ ol icꞌanel sqꞌuinal.
3 Vilnac ebꞌ chuc spensar, slaj qꞌuechaan̈ tastac ay dꞌa ebꞌ, palta elan̈chamel satxiem juntzan̈ chiꞌ.
4 A yalyuninal ebꞌ, man̈xa mach scolvaj dꞌa ebꞌ. Ayic scꞌoch ebꞌ dꞌa yichan̈ ebꞌ yajal, man̈xalaj tzꞌaj yelcꞌoch ebꞌ, man̈xa mach scolan ebꞌ.
5 Ayic tzꞌelul sat yavbꞌen ebꞌ, axo ebꞌ anima van scham yuj vejel slajaneli, sayanelta ebꞌ dꞌa caltac qꞌuiix. Axo ebꞌ malaj jabꞌoc tas ay dꞌay, syiloch scꞌool ebꞌ dꞌa sbꞌeyumal ebꞌ.
6 A yaelal man̈ bꞌajocto scoti, man̈octo dꞌa yol luum sqꞌueta.
7 Toxonton yic yaelal caji, icha te namix cꞌacꞌ tzꞌeln̈ejta dꞌa cal cꞌacꞌ.
8 Tato a in tic icha aj tic vaji, elan̈chamel am svacꞌoch in bꞌa dꞌa yol scꞌabꞌ Dios.
9 A Dios satubꞌtac tastac scꞌulej, man̈xo bꞌischajbꞌenoc tas cꞌulej chiꞌ. Malaj mach snachajel yuuj tastac scꞌulej chiꞌ.
10 A Dios chiꞌ tzꞌacꞌancot n̈abꞌ dꞌa yibꞌan̈ lum luum tic. Icha chiꞌ tzꞌaj yoch yalil masanil tas ay dꞌa sat luum.
11 A tzꞌicꞌanchaan̈ ebꞌ anima emnaquil syutej sbꞌa, an̈ejaꞌ pax tzꞌacꞌan snivanil scꞌol ebꞌ ayoch dꞌa syaelal.
12 A Dios chiꞌ sjuanbꞌat tas nabꞌil yuj ebꞌ jelan, yic max elcꞌochi.
13 Aꞌ syamanoch vaan ebꞌ jelan dꞌa chucal, yic max elcꞌoch tas snibꞌej ebꞌ dꞌa chucal chiꞌ.
14 A val dꞌa chimcꞌualil stelvi ebꞌ, qꞌuicꞌqꞌuinal dꞌa ebꞌ. Icha val to dꞌacꞌvalil sbꞌeyecꞌ ebꞌ, toxon̈ej tzꞌecꞌ machmon ebꞌ.
15 A Dios scolan ebꞌ tzꞌixtaj yuj ebꞌ chuc spensar, an̈ejaꞌ scolan ebꞌ dꞌa yol scꞌabꞌ ebꞌ ixtum anima.
16 Aꞌ ayoch yipoc scꞌol ebꞌ malaj stecꞌanil, aꞌ smacan stiꞌ ebꞌ man̈ tojoloc syutej sbꞌa.
17 Vachꞌ yic ebꞌ scachji yuj Dios. Man̈ a patiquejel a cachnabꞌil syacꞌ Dios Syal Yuj Smasanil chiꞌ.
18 Tato a Dios chiꞌ tzꞌacꞌan echnaj junoc mach, aꞌ tzꞌan̈tanpaxi. Tato aꞌ tzꞌacꞌanoch syaelal junoc mach, a tzꞌacꞌanpax bꞌoxoc scꞌool.
19 Tzijtum el ol ach colchaj yuj Dios dꞌa tas ay smay. Man̈ ol ach scha acꞌjoc ganar yuj junoc tas sjavi dꞌa ibꞌan̈.
20 Dꞌa stiempoal vejel ol ach colchaj yuj dꞌa yol scꞌabꞌ chamel. Ayic ay oval, an̈ejaꞌ ol ach colanpaxoc.
21 A Dios ol ach colan dꞌa tas syal ebꞌ alum pecal. Man̈ ol ach xivoc ayic sjavi yaln̈ej tas dꞌa ibꞌan̈.
22 Ayic ol javoc vejel, ma oval, ton̈ej ol ach tzevajoc. Man̈ ol ach xivoc ayic ol javoc nocꞌ chium nocꞌ.
23 A bꞌaj ol ach munlajoc, malaj qꞌuen qꞌueen ol ach ixtanoc. A nocꞌ chium nocꞌ, malaj tas ol ach yutej nocꞌ.
24 Ol ajxoc jantac tastac dꞌa a pat. Ayic ol a bꞌisan nocꞌ a molbꞌetzal nocꞌ tzꞌacann̈ej yajecꞌ nocꞌ.
25 Tzijtum ol aj sbꞌisul in̈tilal icha an̈ an̈cꞌultac sqꞌuibꞌ dꞌa sat lum luum.
26 Icham vinac achxo ol ach chamoc, icha junoc tobꞌan̈ ixim trigo cꞌanxo sjochchaji.
27 Ach Job, a tas cojtac a tzon̈ cꞌaybꞌani. Cojtac to icha chiꞌ yaji, yuj chiꞌ scham val a bꞌeycꞌolan juntzan̈ tic, xchi vin̈aj Elifaz chiꞌ.