Ix spac vin̈aj Job dꞌa vin̈aj Elifaz
6
Ix tacꞌvi vin̈aj Job chiꞌ icha tic:2 Tato smasanil in yaelal yedꞌ in cuscꞌolal tic, tzꞌechtaj dꞌa yol junoc echlabꞌ,
3 tecan ecꞌto yalil dꞌa yichan̈ yarenail stiꞌ aꞌ mar, yuj chiꞌ ix in comon alej icha tic.
4 A Dios Syal Yuj Smasanil, ichato ix och chꞌapnaj sjul-labꞌ dꞌayin, axo svenenoal spucax dꞌa in nivanil. Toxo ix oymaj tas ay smay dꞌayin yuuj.
5 ¿Tocval tzꞌocꞌ nocꞌ caltacteꞌal bꞌuru tato ay yan̈ nocꞌ? ¿Tocval tzꞌocꞌ nocꞌ mam vacax tato ay tas scꞌux nocꞌ?
6 ¿Mach schiꞌan junoc chibꞌil vail tato malaj yatzꞌamil? ¿Tocval vachꞌ sloji saquil nocꞌ n̈olobꞌ tato malaj yatzꞌamil?
7 Icha chibꞌil vail malaj yatzꞌamil, icha chiꞌ tas tzin chi ticnaic svabꞌi. Man̈xalaj in gana in vaꞌi.
8 Comonoc tzꞌel dꞌa scꞌol Dios yacꞌan tas tzin cꞌan dꞌay. Comonoc syacꞌ tas tzin nibꞌej.
9 Comonoc tzꞌel dꞌa scꞌol Dios chiꞌ in sataneli, yic tzin lajviel dꞌa juneln̈ej.
10 Vachꞌchom svabꞌ syail yuj in yaelal yedꞌ in cuscꞌolal tic, palta tzin te tzalaji, yujto svacꞌn̈ej och sley Dios yipoc in cꞌool, aton Dios Axon̈ej Ochi.
11 Man̈xalaj vip svabꞌi yic svacꞌan techaj in yaelal tic, ¿tasxom yuj comon pitzan into?
12 ¿Tocval lajan stzatzil in nivanil tic icha qꞌuen qꞌueen? ¿Tocval icha stzatzil qꞌuen bronce stzatzil in bꞌacꞌchil?
13 Maxtzac yal in colan in bꞌa dꞌa yol vicoꞌ. Man̈xa junoc mach scolvaj vedꞌoc.
14 A junoc mach ayoch dꞌa syaelal, vachꞌchom man̈xa yelcꞌoch Dios Syal Yuj Smasanil dꞌay, palta smoj val tzꞌacꞌji snivanil scꞌol yuj ebꞌ svachꞌcꞌool.
15 Palta a ex tic ex vamigo, ton̈ej ix in e vachꞌ juejeli. Lajan ex icha junoc aꞌ elumaꞌ stup dꞌa smelemal.
16 Ayic syacꞌan n̈abꞌ tat tzꞌaj sat aꞌ sbꞌeyi calan aꞌ yedꞌ qꞌuen cheev, ma yedꞌ qꞌuen sacbꞌacom.
17 Ayic tzꞌulax qꞌuen cheev chiꞌ, stupem aꞌ elumaꞌ chiꞌ, axo yic tzovaj cꞌacꞌ stacjiem aꞌ.
18 A ebꞌ anima bꞌeyum, sbꞌat ebꞌ dꞌa titac bꞌe yic sayan aꞌ ebꞌ yuqꞌuej, axo tzꞌaji, satcanbꞌat ebꞌ dꞌa lum taquin̈ luum chiꞌ, ataꞌ schamcan ebꞌ.
19 A ebꞌ bꞌeyum anima aj chon̈abꞌ Temán yedꞌ ebꞌ aj Sabá, say a aꞌ ebꞌ yojtactaxon bꞌaj scani,
20 axo yic scꞌoch ebꞌ bꞌaj aytaxon aꞌ chiꞌ, taquin̈xo yedꞌtal aꞌ, toxon̈ej staccanqꞌue scꞌol ebꞌ.
21 Icha chiꞌ eyaj dꞌayin a ex tic, yujto ayic tzeyilanoch jantac in yaelal tic, ton̈ej tzex xivqꞌuei.
22 Palta a in tic, malaj tas tzin cꞌan dꞌayex. Malaj tumin tzin cꞌan dꞌayex yic tzin colchaji.
23 ¿Tocval tzin cꞌan e colval yic tzin colchaj dꞌa yol scꞌabꞌ jun ajcꞌol dꞌayin, ma dꞌa juntzan̈ ebꞌ elcꞌum?
24 Aqꞌuec in cꞌaybꞌubꞌal, ol in cha vabꞌ dꞌayex. Chꞌoxec och in mul chiꞌ dꞌa in sat.
25 Malaj junoc mach spaticanel junoc pensar to vachꞌ, palta a ex tic, man̈xa stzolal tas tzeyacꞌoch dꞌa vibꞌan̈.
26 A ex tic nabꞌan̈ej tzin e tumej, palta eyojtac to a slolonel junoc mach ayoch dꞌa syaelal, ay bꞌaj malaj jabꞌoc yelcꞌochi.
27 A ex tic, syal eyacꞌan e suerte dꞌa yibꞌan̈ ebꞌ mebꞌaꞌ obꞌiltac. Syalpax e chon̈anel junoc eyamigo.
28 Ochan̈ec qꞌuelan dꞌa in sat, tato ton̈ej svesej.
29 Actejec eyalan juntzan̈ chiꞌ dꞌa in patic. Comonoc tzeyojtaquejeli to yel juntzan̈ sval tic.
30 A e naani to esalvum in. A e naani to man̈ vojtacoc tas yel yedꞌ tas man̈ yeloc.