7
A on̈ anima cajan on̈ dꞌa sat lum tic, lajan val cabꞌan syail icha junoc soldado ma icha junoc checabꞌ yaji.2 A junoc checabꞌ, snibꞌej elan̈chamel sqꞌuicꞌbꞌi. A junoc munlajvum, snibꞌej elan̈chamel scha stojol.
3 Icha chiꞌ vaj yedꞌ in yaelal tic, ujal svabꞌ syail. Junjun acꞌval ayn̈ejoch in cuscꞌolal.
4 Ayic tzin ecꞌ jichan, te najat yecꞌ acꞌval svabꞌi. Tzin tzactzaj vecꞌ bꞌalbꞌonoc, max sacbꞌilaj. Svalan icha tic: ¿Janicꞌ ol in qꞌue vaan? xin chi.
5 Majnaquel in nivanil tic yuj nocꞌ aꞌay. Taquin̈ quechinac sat, slaj qꞌue tzililjoc tzꞌelxi spojoval.
6 A in qꞌuinal elan̈chamel tzꞌeqꞌui, icha yecꞌ sjul-labꞌ ebꞌ chꞌalvum sjulecꞌ dꞌa scal schꞌal. Van scꞌoch in qꞌuinal tic dꞌa slajvubꞌ, man̈xa tas ayoch yipoc in cꞌool.
7 Ach in Diosal, nacoti, a jabꞌ in qꞌuinal tic, lajan icha yic squicꞌan juneloc quicꞌ. Man̈xa bꞌaqꞌuin̈ tzalajcꞌolal ol in ajoc.
8 A ebꞌ anima tzin ilan ticnaic, man̈xo ol in yil-laj ebꞌ. Ol in sateloc, man̈xo ol in ilpaxlaj.
9-10 Icha yecꞌ numumoc asun satxicanemi, icha chiꞌ tzꞌaj satxiem junoc anima ayic sbꞌat mucchajcan dꞌa campusante. Man̈xa bꞌaqꞌuin̈ ol jaxoc, man̈xa bꞌaqꞌuin̈ ol yiloch ebꞌ scꞌabꞌyoc.
11 Yuj chiꞌ max yal vem numan, yuj in yaelal yedꞌ in cuscꞌolal tic, ol valn̈ej tas svalaꞌ.
12 Mamin ¿tom lajan in icha nocꞌ nivan nocꞌ dꞌa yol aꞌ mar tzilaꞌ, yuj chiꞌ ayn̈ejoch a sat dꞌayin?
13 Ayic tzin naani, tecan vachꞌ ol in vay jabꞌoc dꞌa in chꞌat, tope tzꞌoch vaan jabꞌoc in yaelal tic yic tzin vay jabꞌoc, xin chi.
14 Axo juntzan̈ vayich xivubꞌtac tzacꞌ vilaꞌ, tzin a te xibꞌtani.
15 Más vachꞌ tzin a bꞌinchamoc, más vachꞌ tzin cham dꞌa yichan̈ to pitzan in.
16 Maxtzac techaj vuj svabꞌi, nabꞌaxon̈ej pitzan in. Man̈xo in ixtej. A in qꞌuinal tic lajan icha yic squicꞌan juneloc quicꞌ.
17 ¿Tas quelcꞌoch a on̈ anima on̈ tic, yuj chiꞌ tzon̈ icꞌchaan̈? ¿Tas yuj tzach och ilcꞌolal cuuj?
18 ¿Tas yuj ayn̈ejoch a chum dꞌayon̈ dꞌa junjun cꞌu, tzon̈ acꞌann̈ej proval?
19 ¿Tas yuj max iqꞌuel jabꞌoc a sat dꞌayin, yic syal in bꞌucꞌanem jabꞌoc yal in tiꞌ?
20 Ach Dios, Yilumal anima aji. Tato tzꞌoch in mul, ¿tom tzabꞌ syail yuuj? ¿Tas yuj a dꞌayin tzacꞌoch ijan a jul-labꞌ? ¿Tom al vajoch dꞌayach icha junoc icatz?
21 ¿Tom maxtzac acꞌ nivancꞌolal in mul? ¿Tom maxtzac acꞌ nivancꞌolal tastac chucal ix in cꞌulej? Toxo val tzin bꞌatcan dꞌa yol luum. Ol in a sayeqꞌui, man̈xo ol in chax uuj, xchi vin̈aj Job chiꞌ.