A sbꞌabꞌel lolonel vin̈aj Bildad
8
Ix yalan vin̈aj Bildad aj Súa icha tic:2 ¿Bꞌaqꞌuin̈ ol actej a lolon icha tic? Lajan a lolonel tic icha junoc oval chacxuxum icꞌ.
3 A Dios Syal Yuj Smasanil, malaj bꞌaqꞌuin̈ syixtejbꞌat tojolal, max yiqꞌuecꞌ smacbꞌen junoc anima.
4 Tecan ix och smul ebꞌ uninal chiꞌ dꞌa Dios, yuj chiꞌ ix acꞌji syaelal ebꞌ yuuj dꞌa smojalil.
5 Acꞌ val och a bꞌa dꞌa yol scꞌabꞌ Dios Syal Yuj Smasanil, tza cꞌanan dꞌay to tzꞌocꞌ scꞌol dꞌayach.
6 Tato vachꞌ a pensar, tojoln̈ej tzutej a bꞌa. Ol ach scol Dios chiꞌ, ol yacꞌanxi masanil tastac ictaxon yaji.
7 A a bꞌeyumal dꞌa yalan̈taxo, man̈xo ol yal slajbꞌan sbꞌa yedꞌ jantac tas ol ajxoc dꞌayach.
8 Cꞌanbꞌejecꞌ abꞌi tas ecꞌnac ebꞌ anima dꞌa pecaꞌ, tza cꞌaybꞌan sjelanil ebꞌ chiꞌ.
9 A on̈ tic ichato evi on̈ alji, malaj jabꞌoc tas cojtac. A co qꞌuinal dꞌa sat lum tic lajan icha yecꞌ junoc en̈ul.
10 A ebꞌ anima dꞌa pecaꞌ, jantac tas bꞌaj syal ach scꞌaybꞌancan ebꞌ.
11 A teꞌ junco yedꞌ teꞌ papiro, an̈ej bꞌaj ay a aꞌ sqꞌuibꞌ teꞌ.
12 Te yaax teꞌ, palta tato stup aꞌ, bꞌabꞌel stacjixiel teꞌ dꞌa yichan̈ juntzan̈xo te teꞌ.
13 Icha val chiꞌ ol aj ebꞌ scꞌulan chucal, aton ebꞌ sbꞌatcan Dios satcꞌolal yuuj, maxtzac elcꞌoch tas ayoch yipoc scꞌol ebꞌ.
14 A tas comon ayoch yipoc scꞌol ebꞌ chiꞌ, lajan val icha chꞌalxim.
15 Qꞌuinaloc ay mach tzꞌoch yubꞌnaj dꞌa chꞌalxim chiꞌ, malaj jabꞌoc yip. Qꞌuinaloc tzon̈ can dꞌun̈naj dꞌay, max techajlaj yuuj.
16 A ebꞌ scꞌulan chucal, lajan val ebꞌ icha sat an̈ an̈cꞌultac tzꞌel tzicnaj yuj yoc cꞌu, spucaxcanbꞌat dꞌa scaltac avbꞌen,
17 sbꞌatcan dꞌa slodꞌiltac qꞌuen qꞌueen, slaj qꞌuibꞌ an̈, sbꞌat an̈ dꞌa yibꞌan̈tac qꞌueen.
18 Palta tato ay mach stocꞌanqꞌueta an̈, man̈xa mach ojtannac tato ecꞌnac an̈ taꞌ.
19 Icha chiꞌ tzꞌaj slajviel an̈, chꞌocxo junocxo an̈cꞌultac sqꞌuibꞌ bꞌaj tocꞌbꞌilqꞌueta an̈ chiꞌ.
20 A Dios, max actajcan junoc mach vachꞌ spensar yuuj. Max colvajlaj dꞌa ebꞌ scꞌulan chucal.
21 Tato tza na a bꞌa, aꞌ ol ach acꞌanxi tzevajoc, ol yacꞌanxi a tzalajcꞌolal.
22 Axo pax ebꞌ ajcꞌool, ol qꞌuixvoccan ebꞌ. A spat ebꞌ chuc spensar chiꞌ, ol lajvoqueloc, xchi vin̈aj Bildad chiꞌ.