9
Ix tacꞌvixi vin̈aj Job chiꞌ icha tic:2 Vojtac val sicꞌlabꞌil to icha chiꞌ yaji. Palta, ¿toc ay junoc on̈ syal calanoch co bꞌa vachꞌil dꞌa yichan̈ Dios?
3 Qꞌuinaloc sco telaj co bꞌa yedꞌoc, malaj am junoc tas syal co pacan dꞌay dꞌa miloc tas scꞌanbꞌej dꞌayon̈.
4 A Dios te nivan sjelanil yedꞌ spoder. Qꞌuinaloc sco tecꞌbꞌej co bꞌa dꞌa yichan̈, ¿tocval stechaj cuuj?
5 A yuj yoval scꞌol Dios tzꞌibꞌxiqꞌue lum nivac vitz, tzꞌel lum cꞌacap, malaj mach ojtannac tato tzuji juntzan̈ chiꞌ.
6 Ayic stzicubꞌtan̈an lum luum tic dꞌa yedꞌtal, tzꞌibꞌxi sbꞌachnubꞌal luum.
7 A Dios chiꞌ syal yalan dꞌa cꞌu to max javilaj, syalanpax dꞌa qꞌuen cꞌanal to max yacꞌlaj yoc qꞌueen.
8 Malaj junoc mach ix colvaj yedꞌoc ayic ix yacꞌanbꞌat jen̈an satchaan̈. An̈ejaꞌ pax stecꞌanem sat aꞌ mar yic sqꞌue chulnaj aꞌ.
9 Aꞌ ix bꞌoan juntzan̈ qꞌuen cꞌanal scuch nivan Osa, qꞌuen Oxdꞌilan̈, qꞌuen Mootz yedꞌ juntzan̈xo qꞌuen yaman yaji scheclaj dꞌa stojolal sur.
10 Man̈xo bꞌischajbꞌenoc tastac satubꞌtac scꞌulej. A juntzan̈ chiꞌ malaj junoc mach syal snachajel yuuj.
11 Tato tzꞌecꞌ Dios dꞌa co tzꞌey, max yal-laj quilani. Tato tzꞌecꞌ dꞌa chiꞌ ¿toc snachajel vuuj?
12 Tato ay tas syiqꞌuecꞌ dꞌa junoc mach, ¿mach syal scachanoch vaan? ¿mach syal scꞌanbꞌan dꞌay tas scꞌulej?
13 Tato scot yoval scꞌol Dios chiꞌ, max yal yoch vaan dꞌa ichn̈ej taꞌ. A ebꞌ ayoch yedꞌ Rahab* ol can ebꞌ dꞌa yalan̈ yuuj.
14 Yuj chiꞌ, ¿tas lolonel syal valani yic tzin pacan dꞌa Dios?
15 Vachꞌchom malaj in mul, palta max yal-laj in tacꞌvi dꞌay. In juezal yaji, tzin cꞌanan yoqꞌuelcꞌolal dꞌayin.
16 Qꞌuinaloc svavtej Dios chiꞌ bꞌaj tzin chꞌolbꞌitaji, vachꞌchom scꞌochi, palta ¿tocval ol scha yabꞌ tas svalaꞌ?
17 Axo tzꞌaji, tzam in yacꞌ lajvoc yedꞌ junoc icꞌn̈abꞌ te ov, svachꞌ nivtaj in yaelal tic dꞌa ichn̈ej taꞌ.
18 Maxtzac xom yal vicꞌan vip junoc rato. Tzam te vachꞌ nivtaj in yaelal tic yuuj.
19 Qꞌuinaloc svacꞌ pural Dios chiꞌ yic sbꞌoan icha tzin nibꞌej, max yal-laj yujto aton Dios Syal Yuj Smasanil. Qꞌuinaloc svavtej dꞌa yichan̈ ebꞌ juez, ¿mach syal yacꞌan pural scꞌochi?
20 Qꞌuinaloc svalaꞌ te vachꞌ in, axo in lolonel schꞌoxaneli to ay in paltail. Qꞌuinaloc svalaꞌ to malaj jabꞌoc in paltail chiꞌ, axom Dios tzꞌalani to man̈ yeloc.
21 Vachꞌchom a in tic malaj in mul, palta malaj velcꞌoch dꞌa yol in sat, maxtzac yal in cꞌol pitzan in.
22 A in naani, lajanxon̈ej smasanil. A Dios chiꞌ satanel ebꞌ ay smul yedꞌ ebꞌ malaj smul.
23 Qꞌuinaloc sjavi chamel dꞌa yibꞌan̈ masanil anima, malaj tas sna Dios chiꞌ ayic slajviel anima malaj smul.
24 Scan jun yolyibꞌan̈qꞌuinal tic dꞌa yol scꞌabꞌ ebꞌ chuc yuuj, smacchaj sat ebꞌ juez yuuj. Tato man̈oc Dios scꞌulani, ¿mach scꞌulan jun?
25 Elan̈chamel tzꞌecꞌbꞌat in qꞌuinal, malaj jabꞌoc tzalajcꞌolal svilaꞌ.
26 Lajan val sbꞌey in qꞌuinal tic icha sbꞌey junoc teꞌ balso dꞌa sat a aꞌ, aton teꞌ bꞌobꞌil yedꞌ teꞌ papiro. Lajan pax icha sbꞌat xumumoc nocꞌ chꞌacbꞌa yic syaman schibꞌej nocꞌ.
27 Qꞌuinaloc sbꞌatcan in yaelal tic satcꞌolal vuuj, tzalajcꞌolal am tzin ajcani.
28 Palta masanil in yaelal tic ton̈ej tzin somchajel yuuj, yujto vojtac to max in yal Dios vachꞌil.
29 Tato ay in mul yalani, nabꞌan̈ej svacꞌ vip valani to vachꞌ in.
30 Vachꞌchom tzin bꞌic in cꞌabꞌ yedꞌ nocꞌ xapon, ma yedꞌ yal taan̈,
31 palta a Dios tzin yacꞌn̈ejem dꞌa scal a aꞌ socꞌomtac, axo in pichul sqꞌuixvi vuuj.
32 Max yal in pacan in bꞌa dꞌa Dios icha dꞌa junoc comon anima. Max yal valani to syal in bꞌat yedꞌoc dꞌa yichan̈ ebꞌ juez.
33 Comonoc ay junoc mach syal yacꞌan vil-laj in bꞌa yedꞌoc, syalan tas tzon̈ aj co chavan̈il.
34 Octom ay junoc mach syal yalan dꞌay yic tzꞌoch vaan yacꞌanoch in yaelal, tzꞌoch vaan in xibꞌtani.
35 Tato icha chiꞌ, maxtzac am in xiv in loloni, yujto malaj in mul icha eyalan tic.