10
Man̈xa in gana pitzan in. Ol vacꞌ checlaj in yaelal tic, ol in lolon yedꞌ in cꞌacꞌalcꞌolal.2 Sval dꞌa Dios, man̈ ton̈ejoc tzacꞌoch in mul dꞌa vibꞌan̈, al dꞌayin bꞌaj ix och in mul chiꞌ.
3 Ina a ach in a bꞌonac, ¿tom vachꞌ tzabꞌi tzin a chaccaneli? Chuc tzꞌalji dꞌayin, axo yedꞌ tas sna ebꞌ chuc spensar tzach ochi.
4 ¿Tom lajan ilan icha quilan a on̈ anima on̈ tic?
5 ¿Tom lajan a qꞌuinal icha jabꞌ quic a on̈ chamelbꞌa anima on̈ tic?
6 Yuj chiꞌ ¿tas yuj tza say valecꞌ in mul yedꞌ in paltail?
7 Vachꞌchom ojtac to malaj in mul, malaj junoc mach syal in scolanel dꞌa yol a cꞌabꞌ.
8 A ach val ix in a bꞌoꞌo, axo ticnaic tza nibꞌej tzin a sateli.
9 Nacoti to dꞌa lum luum ix in a bꞌoꞌo, axo ticnaic, tzin acꞌanxicanoch pococal.
10 Ix a bꞌo in nivanil tic icha tzꞌaj sbꞌo nocꞌ queso ayic spajbꞌi nocꞌ lech.
11 A ach ix acꞌ syamlaj sbꞌa in bꞌaquil yedꞌ in chꞌan̈al. Ix acꞌanoch in bꞌacꞌchil yedꞌ in tzꞌumal dꞌa spatic.
12 Ix acꞌ in qꞌuinal, ix in a xajanani. Ix in a tan̈vej, yuj chiꞌ pitzan in.
13 Palta axo ticnaic jun, snachajel vuuj to ay tas cꞌubꞌeltac tza naꞌ dꞌa in patic.
14 Van in ilani tato tzꞌoch in mul, max in acꞌ nivancꞌolal jabꞌoc yuj in mul chiꞌ.
15 Tato ay in mul, obꞌiltac in. Tato malaj in mul, palta max yal voch dꞌa ichan̈ dꞌa juncꞌolal, yujto tzin qꞌuixvi, tzin naancot in yaelal.
16 Tato svicꞌchaan̈ in bꞌa, satubꞌtac am tzutej in a sataneli. Icham syutej nocꞌ choj spechan junoc nocꞌ yic schiꞌa, icha chiꞌ am tzin utej.
17 Tza say juntzan̈ testigo dꞌa in patic. Tzacꞌ val cot oval dꞌayin, icha scot n̈ilnaj ebꞌ soldado yacꞌan oval.
18 ¿Tas yuj in a chanac aljoc? Comonoc ayic manto in aljoc ix in chamcani, yic malaj mach iljinac in.
19 Comonoc ayic valjinac dꞌa in nun, vicꞌchajnacbꞌat dꞌa campusante, ichato malaj mach checlajnac.
20 Yacbꞌan to jabꞌn̈ej in qꞌuinal tic, eloc dꞌa a cꞌol tzacꞌan jabꞌoc in juncꞌolal. Eloc dꞌa a cꞌol tzacꞌan jabꞌoc in tzalajcꞌolal,
21-22 yic manto in bꞌat dꞌa chamubꞌ dꞌa scal qꞌuicꞌalqꞌuinal bꞌaj maxtzac yal in paxta. A dꞌa jun lugar chiꞌ, veventac yilji, qꞌuicꞌalqꞌuinal xon̈ej, man̈xalaj jabꞌoc saquilqꞌuinal, xchi vin̈aj Job chiꞌ.*