A sbꞌabꞌel lolonel vin̈aj Zofar
11
Ix yalan vin̈aj Zofar aj Naamat dꞌa vin̈aj Job chiꞌ icha tic:2 A juntzan̈ a comon lolonel tic smoj val spacji dꞌayach. Man̈ yujoc to tzach te loloni, scheclaji to vachꞌ ach.
3 A a naani yujto tzach te loloni man̈xa tas scalaꞌ. A a naani to man̈xalaj mach syal spacan juntzan̈ a bꞌuchval lolonel tic.
4 A ach tic tzalaꞌ to vachꞌ ach dꞌa yichan̈ Dios, tzaloch a bꞌa vachꞌil.
5 Comonoc slolon Dios spacan juntzan̈ tzal chiꞌ,
6 schꞌoxan sjelanil dꞌayach cꞌubꞌeltac yaji, aton juntzan̈ max yal snachajeli. Ichato chiꞌ ol ilani to mantzac yacꞌ a yaelal Dios icha val smoj a chaani.
7 ¿Am a naani to ol ojtaquej val el sjelanil Dios Syal Yuj Smasanil, aton juntzan̈ cꞌubꞌeltac yaji?
8 ¿Tas val ol aj ojtacanel jun jelanil chiꞌ? Yujto ecꞌbꞌal te chaan̈ yajqꞌue icha yajqꞌue satchaan̈ tic. Te ecꞌbꞌal jul yajem dꞌa yichan̈ bꞌaj ay ebꞌ chamnac.
9 Te ecꞌbꞌal dꞌa yichan̈ lum luum tic. Te levan sat dꞌa yichan̈ aꞌ mar.
10 Tato a Dios tzach avtani yic tzach schꞌolbꞌitej, ¿mach junoc syal scachanoch vaan?
11 Yojtac ebꞌ esalvum, an̈ejaꞌ syil jantac chucal, ¿mato tza naꞌ to man̈ yojtacoc Dios chiꞌ?
12 ¿Tocval syal yalji junoc nocꞌ bꞌuru icha spensar junoc anima? Icha chiꞌ junoc mach malaj spensar, ¿tocval ol yal sjavi spensar?
13 Tato tza tojolbꞌitej a pensar, al a yaelal dꞌa Dios.
14 Actejcan a cꞌulan chucal yedꞌ juntzan̈ tas tza cꞌulej dꞌa elcꞌaltac.
15 Tato icha chiꞌ, vachꞌ ilji dꞌa sat Dios, man̈xalaj bꞌaj ol ach qꞌuixvoc. Tzalajcꞌolal ol ach ajoc, man̈xa bꞌaj ol ach xivoc,
16 axo sat a cꞌol dꞌa a yaelal ix ecꞌ tic. Icha tzꞌaj stup a aꞌ sbꞌeyi, icha chiꞌ ol aj sat dꞌa a cꞌool.
17 Vachꞌchom ix ach can dꞌa qꞌuicꞌalqꞌuinal yuj a yaelal tic, palta axo ticnaic ichato ol sacbꞌocpaxel dꞌa ibꞌan̈ icha dꞌa qꞌuin̈ibꞌalil. Tzalajcꞌolal ol ach ajxoc, ichato chimcꞌualil bꞌaj ayach eqꞌui.
18 Juncꞌolal ol ach ajxoc, yujto ay tas ayoch yipoc a cꞌool. A Dios ol ach tan̈vanoc, juncꞌolal ol ach vayoc.
19 Ol icꞌ ip, malaj tas ol ach xibꞌtanoc. Tzijtum mach ol javoc ach sayeqꞌui, vachꞌ ol ach aj yedꞌ ebꞌ.
20 Axo ebꞌ chuc spensar, olto scomon sayej ebꞌ bꞌaj scolchaji, palta nabꞌaxon̈ej. Man̈xo ol ilchaj bꞌaj syal scolan sbꞌa ebꞌ, axon̈ej chamel ol yacꞌoch ebꞌ yipoc scꞌool, xchi vin̈aj Zofar chiꞌ.