12
Ix spacanxi vin̈aj Job chiꞌ icha tic:2 A val svabꞌani to a exxon̈ej eyojtac masanil tas dꞌa scal masanil anima. Ayic ol ex chamoc, tecan ol satcanel jelanil.
3 Palta a in pax tic ay pax in pensar, mato yelxo val malaj jabꞌoc tas vojtac dꞌa eyichan̈ e naani, ¿mach val junoc man̈ ojtannacoc juntzan̈ tic?
4 Vachꞌchom a in tic malaj in mul, ma in paltail, vachꞌchom ix yabꞌ Dios in tevi dꞌa yalan̈taxo, axo ticnaic toxon̈ej tzin tzetzaji.
5 A ex malaj jabꞌoc tas tzex icꞌan tic, tzex te bꞌuchvaj dꞌayin. Lajan ex icha junoc mach svachꞌ ecan telvoc junoc mach vanxo stelvi.
6 A ebꞌ elcꞌum, tzalajcꞌolal yaj ebꞌ dꞌa yol spat. A ebꞌ tzꞌalan chuc dꞌa Dios, juncꞌolal yaj ebꞌ. A snaan ebꞌ to malaj tas ol utaj ebꞌ yuuj.
7 Cꞌanbꞌejec dꞌa nocꞌ nocꞌ dꞌa sat luum yedꞌ dꞌa nocꞌ sjen̈vi, syal ex scꞌaybꞌan nocꞌ.
8 Cꞌanbꞌejecpax dꞌa nocꞌ tzꞌecꞌ n̈ern̈on dꞌa sat luum yedꞌ nocꞌ ay dꞌa yol aꞌ mar, syal ex scꞌaybꞌan nocꞌ dꞌa jelanil.
9 Masanil juntzan̈ nocꞌ nocꞌ chiꞌ, yojtac nocꞌ to a tas tzuji a Jehová tzꞌacꞌancoti.
10 A dꞌa yol scꞌabꞌ ay sqꞌuinal masanil tastac pitzan, syacꞌan yicꞌ yicꞌ ebꞌ anima.
11 A yol co tiꞌ tzꞌabꞌlan svachꞌil tas scabꞌlej. A pax co chiquin tzꞌabꞌan tas tzꞌalchaji.
12 A ebꞌ ichamtac vinac, ayxo spensar ebꞌ, yujto tzijtumxo abꞌil syil ebꞌ, yuj chiꞌ ay spensar ebꞌ.
13 Palta a Dios toxonton jelan, syal yuj smasanil.
14 A tas satel Dios, man̈xa junoc mach syal sbꞌoanxi. A junoc mach syamchajoch vaan yuj Dios, man̈xa junoc mach scolani.
15 Tato aꞌ syamanoch vaan n̈abꞌ, stacjiel masanil tastac dꞌa sat luum tic. Tato syacꞌpaxcot n̈abꞌ, sbꞌat aꞌ dꞌa yalan̈ luum.
16 A Dios ay spoder, jelan toni, tzꞌeln̈ejcꞌoch yuuj. Aꞌ dꞌa yol scꞌabꞌ ayecꞌ ebꞌ smusan sat ebꞌ anima yedꞌ pax ebꞌ tzꞌacꞌji musansatil chiꞌ.
17 Aꞌ tzꞌacꞌan satel spensar ebꞌ jelan. Axo ebꞌ juez somchajcanqꞌue spensar ebꞌ yuuj.
18 Aꞌ tzꞌicꞌanel ebꞌ rey dꞌa yopisio, syacꞌan icꞌjocbꞌat ebꞌ dꞌa preso dꞌa junocxo chꞌoc chon̈abꞌil, bꞌeranel ebꞌ sbꞌatcan ebꞌ.
19 Aꞌ tzꞌacꞌan quistalax ebꞌ sacerdote. Aꞌ tzꞌacꞌan acꞌjoc ganar ebꞌ nivac yopisio.
20 A ebꞌ acꞌum razón yipcꞌolal yaji, man̈xalaj tas syal yalan ebꞌ. A ebꞌ ayoch yopisio schꞌolbꞌitan ebꞌ anima, tzꞌicꞌjiecꞌ sjelanil ebꞌ yuuj.
21 Aꞌ tzꞌacꞌan paticajcanel ebꞌ nivac yelcꞌoch dꞌa ebꞌ anima. Axo ebꞌ te tecꞌan, tzꞌelcan yip ebꞌ yuuj.
22 Syacꞌan ojtacajel tas cꞌubꞌeltac yaji. Syacꞌan checlaj tas man̈ ojtacabꞌiloc.
23 A Dios chiꞌ tzꞌicꞌanchaan̈ juntzan̈ nivac chon̈abꞌ, an̈ejaꞌ satanpaxeli. A saclemanbꞌat ebꞌ anima, an̈ejaꞌ smolbꞌanxi ebꞌ.
24 A tzꞌicꞌanecꞌ sjelanil ebꞌ yajalil junoc chon̈abꞌ, yuj chiꞌ ichato satcanbꞌat ebꞌ dꞌa tzꞌinan lum bꞌaj man̈xalaj bꞌe.
25 Toxon̈ej machmon yecꞌ ebꞌ icha dꞌa qꞌuicꞌalqꞌuinal. Toxon̈ej squetconecꞌ ebꞌ icha ebꞌ ucꞌum an̈.