13
Masanil juntzan̈ tic ix vil val yedꞌ in sat, ix vabꞌ val yedꞌ in chiquin.2 A tas eyojtac a ex tic, vojtacpaxi, mantoc yelxo val emnaquil vaj dꞌayex.
3 Palta tzin nibꞌej tzin lolon yedꞌ Dios Syal Yuj Smasanil. Tzin nibꞌej tzin telaj in bꞌa yedꞌoc.
4 A ex tic, yuj eyesalvumal tze cꞌubꞌanel tas yel. Lajan ex yedꞌ ebꞌ an̈tum malaj vachꞌ yochi.
5 Comonoc numan tzex aji, yic icha chiꞌ scheclaji to jelan ex.
6 Maclejec eyabꞌ tas ol valaꞌ, ol val tas nabꞌil vuuj.
7 ¿Am e naani to ol ex colvaj dꞌa Dios yuj eyesalvumal chiꞌ? ¿Am e naani to ay tas ol yicꞌ dꞌa e acꞌoj musansatil chiꞌ?
8 Tze nibꞌej tzeyacꞌoch e bꞌa yedꞌ Dios, tze colan e naani.
9 Palta qꞌuinaloc tzex chꞌolbꞌitaj yuj Dios chiꞌ, ¿tas tzex aj e naani? ¿Tzam yal eyacꞌan musansatil, icha tzeyutej junoc anima?
10 Tato tze comon aqꞌuejoch e bꞌa yedꞌ Dios e naani, ol ex stumej sicꞌlabꞌil.
11 A val smay ol icꞌan e xivi, mato syal e tecꞌbꞌan e bꞌa dꞌa yichan̈ e naani.
12 A juntzan̈ pecaꞌ cꞌaybꞌubꞌal tzeyalaꞌ, malaj yelcꞌochi, lajan icha junoc muro nabꞌa luum scacꞌoch yipoc co cꞌool.
13 Axo ticnaic, tzꞌinec xe chi to ol in lolonoc, taxon̈ej scot dꞌa vibꞌan̈ yuj tas ol val tic.
14 Vachꞌchom scotxon̈ej dꞌa vibꞌan̈, palta ol valn̈ej.
15 Vachꞌchom yuj chiꞌ tzin smilcham Dios, palta ol vacꞌn̈ejoch yipoc in cꞌool. Ol in coln̈ej in bꞌa dꞌa yichan̈.
16 Talaj ataꞌ ay in colnabꞌil, yujto a junoc mach chuc max stecꞌbꞌej sbꞌa yoch dꞌa yichan̈ Dios.
17 Maclejec val eyabꞌ tas ol aj valani.
18 Toxo ix in naꞌ tas ol vutej in colan in bꞌa, vojtac to vachꞌ ol in elcꞌochoc.
19 Tato ay mach schꞌoxaneli to ay in mul, syal voch vaan valani masanto tzin chami.
20 Ach in Diosal, chabꞌn̈ej val tas tzin cꞌan dꞌayach, icha chiꞌ syal in cꞌoch dꞌa ichan̈.
21 Actejxo acꞌanoch in yaelal tic, man̈xo in a xibꞌtej yedꞌ tas ay smay.
22 Avtej in, ol in tacꞌvoc dꞌayach, ma jun, tzin bꞌabꞌlaj loloni, tzach tacꞌvi dꞌayin.
23 Al dꞌayin, ¿bꞌajtil ix och in mul, ma in paltail? ¿Bꞌajtil ay bꞌaj ix in ecꞌ dꞌa yibꞌan̈ chiꞌ?
24 ¿Tas yuj tza cꞌubꞌejel a bꞌa dꞌayin? ¿Tas yuj icha junoc ajcꞌol tzin utej?
25 Lajan in icha junoc xil teꞌ tzꞌicꞌjibꞌat yuj icꞌ, ma icha an̈ taquin̈ ac. ¿Tas yuj tzacꞌ oval vedꞌoc, tza nibꞌej tzin a sateli?
26 Te ya tzal dꞌayin svabꞌi. Tza cꞌanbꞌan dꞌayin tastac in mul yictax in quelemal.
27 Ichato ix acꞌoch qꞌuen cadena dꞌa voc, qꞌuelan achn̈ej ochi bꞌaj tzꞌem voc.
28 Yuj chiꞌ vanxo in cꞌabꞌat icha junoc tas scꞌai, ma icha junoc pichul ijtacxo.