14
A on̈ anima on̈ tic tzon̈ alji dꞌa co nun, jabꞌn̈ej tiempo squilaꞌ, scaln̈ej yaelal tzon̈ eqꞌui.2 Lajan co qꞌuinal tic icha junoc an̈ xumac vanto spojeli, elan̈chamel stacjipaxi. Lajan pax icha tzꞌaj satxicanem junoc en̈ul.
3 Mamin, ¿tas yuj tzacꞌ val och a sat dꞌayin to anima inn̈ej? ¿Tas yuj tza nibꞌej tza chꞌolbꞌitej junoc tas malaj yelcꞌochi?
4 ¿Toc ay mach syal yicꞌanel tas vachꞌ dꞌa scal tas man̈ vachꞌoc?
5 A ach tic tzalaꞌ jantac tiempo syil junjun anima. Chequel yaji jayeꞌ sbꞌisul cꞌual squilaꞌ, max yal yecꞌ jayeocxo cꞌual uuj.
6 Iqꞌuel a sat dꞌayin yic tzin can dꞌa juncꞌolal. Acꞌ tzalajbꞌoc in cꞌol icha stzalajbꞌi scꞌol ebꞌ munlajvum, ayic slajvi smunlaj ebꞌ.
7 Ayic schꞌacjiel junoc te teꞌ, scacꞌoch yipoc co cꞌool to ol ja svol teꞌ, axo te svol chiꞌ sqꞌuibꞌxi.
8 Vachꞌchom te ichamxo teꞌ schꞌan̈al yibꞌ chiꞌ, vachꞌchom vanxo scꞌabꞌat teꞌ yibꞌ,
9 axo yic tzꞌemcꞌoch sical a aꞌ dꞌa teꞌ, syaxbꞌixi teꞌ, svolanxi teꞌ icha junoc teꞌ yuneto tzꞌavchaji.
10 A on̈xo pax anima on̈ tic, ayic tzon̈ chami, man̈xa tas syal cuuj. Ayic tzꞌel co pixan, man̈xalaj mach tzon̈ ilani.
11 Icha tzꞌaj sqꞌue vaan xobꞌal aꞌ mar, ma icha tzꞌaj stup a aꞌ sbꞌeyi,
12 icha chiꞌ tzꞌaj co cham a on̈ anima on̈ tic. Yacbꞌan aytoecꞌ satchaan̈ tic, malaj val junoc chamnac anima ol comon pitzvoc bꞌaj mucan, malaj junoc ol comon qꞌue vaan dꞌa yedꞌtal chiꞌ.
13 Comonoc tzin a cꞌubꞌejel dꞌa chamel chiꞌ, yacbꞌan tzꞌecꞌbꞌat yoval a cꞌool. Tza naanpaxi bꞌaqꞌuin̈ tzin a naxicoti.
14 A junoc anima schami, ¿tom ol pitzvocxi? Palta a inxo tic ol vacꞌ techaj in yaelal tic, masanto ol cꞌoch scꞌual vel dꞌa libre.
15 Ol ach avaj dꞌayin, ol in tacꞌvoc dꞌayach. Ol am ach tzalaj in ilanochi, yujto a ach a bꞌonac in.
16 A ticnaic, qꞌuelan ach och dꞌa in bꞌeybꞌal. Axo dꞌa jun cꞌual chiꞌ, man̈xo ol icꞌ a cuenta dꞌa in mul.
17 Ol bꞌatcan in chucal chiꞌ satcꞌolal uuj. Ol acꞌan lajvoc in mul.
18 A lum nivac vitz ayic tzꞌelta lum cꞌacapil, satem luum, axo qꞌuen nivac qꞌueen tzꞌel qꞌuen dꞌa yedꞌtal.
19 An̈ejtonaꞌ icha tzꞌaj yulaxbꞌat qꞌuen qꞌueen dꞌa yol sbꞌe a aꞌ, ma icha tzꞌaj yicꞌchajbꞌat lum luum yuj aꞌ, icha chiꞌ tzꞌaj acꞌan lajvoc tas ayoch yipoc co cꞌool a on̈ anima on̈ tic.
20 A ach te ecꞌbꞌal achn̈ej dꞌa quichan̈, tzon̈ icꞌanxi meltzaj dꞌa juneln̈ej, tzacꞌan ixtax co sat yic tzon̈ chami.
21 Vachꞌchom a ebꞌ calcuninal te bꞌinajnac ol aj ebꞌ, mato ay ebꞌ man̈xalaj ol aj yelcꞌochi, palta man̈xo cojtacoc, man̈xalaj mach ol yal yalan cabꞌi.
22 Qꞌuinaloc chamnac on̈xo, axon̈ej am cuuj scacꞌ pensar, yujto scabꞌval syail, xchi vin̈aj Job chiꞌ.