Schabꞌil macan̈ lolonel
15
Ix yalanxi vin̈aj Elifaz aj Temán icha tic:2 A mach jelan, man̈ smojoc stacꞌvi dꞌa comon lolonel, man̈ smojoc pax syicꞌchaan̈ sbꞌa syalan tas ton̈ej sbꞌat yuj icꞌ.
3 Man̈ ton̈ejoc scomon loloni, max scꞌanlaj comon pensar.
4 Ach Job, tzalaꞌ to malaj yelcꞌoch xivcꞌolal dꞌa Dios, malaj pax yelcꞌoch ejmelal dꞌayach.
5 A yuj tas tzalaꞌ a schꞌoxanel a mul. Tza nibꞌej tza musej co sat yedꞌ sjelanilal a pensar chiꞌ.
6 Man̈ a naꞌ to a in ol valqꞌueta a mul, a yuj tas tzalaꞌ tzicꞌcot dꞌa ibꞌan̈.
7 ¿Tom a a naani to a ach bꞌabꞌel bꞌobꞌil ach? ¿Tom ayachxo ayic ix laj bꞌoji lum nivac vitz?
8 ¿Tom tzꞌeyanoch a chiquin ayic ix snaan Dios tas ol scꞌulej? ¿Tocval a achn̈ej jelan ach dꞌa yolyibꞌan̈qꞌuinal tic?
9 Masanil tas ojtac, cojtac pax a on̈ tic.
10 A co jelanil, ix co cꞌaybꞌej dꞌa ebꞌ ichamtac vinac sacxo xil sjolom, aton ebꞌ ichamtac vinac dꞌa yichan̈ vin̈ a mam.
11 A Dios snibꞌej syacꞌ snivanil a cꞌol yedꞌ lolonel cꞌununi scal dꞌayach, ¿tas yuj max a cha abꞌi?
12 ¿Tas yuj tziqꞌuel a bꞌa dꞌa Dios, tzꞌelvalcot jin̈jin̈ yol a sat scot oval?
13 ¿Tas yuj scot val oval dꞌa Dios, comonxon̈ej tzal juntzan̈ lolonel?
14 ¿Toc ay junoc anima vachꞌn̈ej to malaj jabꞌoc smul?
15 Inatax ebꞌ ángel, man̈ ayococh ebꞌ yipoc scꞌol Dios yedꞌ pax satchaan̈, man̈ val yelxo vachꞌoc dꞌa yol sat.
16 Ocxo val a on̈ anima on̈ tic yajbꞌentac on̈. Icha co comon ucꞌan a aꞌ, icha chiꞌ co cꞌulan chucal chiꞌ.
17 Ach Job, comonoc tza maclej abꞌ tas ol valaꞌ. A jabꞌoc tas vojtac, aꞌ ol valaꞌ.
18 A ebꞌ aj pensar, a ebꞌ ix on̈ cꞌaybꞌani. A tas yojtac ebꞌ chiꞌ scꞌaybꞌejnaccan ebꞌ dꞌa ebꞌ smam yicham.
19 Aton dꞌa ebꞌ smam yicham ebꞌ chiꞌ acꞌbꞌil lum luum tic, man̈ scalejnacoc sbꞌa ebꞌ yedꞌ ebꞌ chꞌoc chon̈abꞌil.
20 A ebꞌ anima chuc sbꞌeybꞌal, tzapan sqꞌuinal ebꞌ, scaln̈ej yaelal tzꞌecꞌ ebꞌ.
21 Ayic syabꞌan ebꞌ scꞌan̈ junoc tas, xivqꞌue ebꞌ. Axo yic malaj tas sna ebꞌ, sjavi ebꞌ elcꞌum, syelcꞌanbꞌat ebꞌ tas ay dꞌa ebꞌ.
22 Man̈xa tas ayoch yipoc scꞌol ebꞌ yic scolchaj ebꞌ dꞌa scal qꞌuicꞌalqꞌuinal. Ayxo och ijan qꞌuen cuchilubꞌ dꞌa ebꞌ yic scham ebꞌ.
23 Axo snivanil ebꞌ ol chijocbꞌat yuj nocꞌ ostoc. Yojtac ebꞌ to a tas ol cot dꞌa yibꞌan̈ ebꞌ, man̈ ol ecꞌlaj.
24 A yaelal yedꞌ ilcꞌolal ol acꞌan xivqꞌue ebꞌ, icha tzꞌaj co xivqꞌue dꞌa yichan̈ junoc yajal sjavi yacꞌ oval dꞌayon̈.
25 Icha chiꞌ tzꞌaj sjavi dꞌa yibꞌan̈ ebꞌ syicꞌchaan̈ sbꞌa dꞌa yichan̈ Dios Syal Yuj Smasanil, stecꞌbꞌan sbꞌa ebꞌ dꞌa yichan̈.
26 Ichato yedꞌnac smaclabꞌ jul-labꞌ ebꞌ, sbꞌat lemnaj ebꞌ yacꞌ oval yedꞌ Dios.
27 Te bꞌaqꞌuech sat ebꞌ yedꞌ snivanil,
28 yujto yacꞌnac ganar juntzan̈ chon̈abꞌ ebꞌ, yicannaccan juntzan̈ pat ebꞌ man̈xalaj yajal, palta ol lajvoquel juntzan̈ chon̈abꞌ chiꞌ yedꞌ juntzan̈ pat chiꞌ yuj oval.
29 Man̈ najtiloc ol ecꞌ ebꞌ yedꞌ sbꞌeyumal. Ol satel ebꞌ icha yecꞌ svevenal asun.
30 Man̈xo ol yal scolanel sbꞌa ebꞌ dꞌa scal qꞌuicꞌalqꞌuinal. Lajan ol aj ebꞌ icha junoc teꞌ cꞌabꞌ teꞌ stzꞌa yuj cꞌacꞌ, ma icha junoc te teꞌ tzꞌel xumaquil yuj icꞌ.
31 Mocabꞌ yacꞌoch tas chuclaj ebꞌ yipoc scꞌool, yujto a spac ol scha ebꞌ aton yaelal.
32 Ol pet cham ebꞌ, icha junoc teꞌ cꞌabꞌteꞌ stzepjiel dꞌa snunal maxtzac yaxbꞌi.
33 Lajan ol aj ebꞌ icha junoc ibꞌ teꞌ uva tzꞌel bꞌulnaj sat ayic manto qꞌuin̈bꞌi, ma icha junoc teꞌ olivo ton̈ej scꞌajbꞌanel xumaquil.
34 A ebꞌ chuc chiꞌ, malaj yin̈tilal ebꞌ ol elcanoc. A jantac sbꞌeyumal ebꞌ ix yicꞌ dꞌa elcꞌaltac, ton̈ej ol tzꞌacanbꞌatoc.
35 Aton ebꞌ an̈ej chucal nabꞌil yuuj, an̈ej ixtoj anima naan yuj ebꞌ, xchi vin̈aj Elifaz chiꞌ.