16
Ix tacꞌvixi vin̈aj Job chiꞌ icha tic:2 Ayxo scajvi in te abꞌan juntzan̈ lolonel tzeyalubꞌtan̈ej tic. Tzeyacꞌoch e bꞌa eyacꞌan snivanil in cꞌool, palta an̈ej yaelal tze vachꞌ iqꞌuejcot dꞌa vibꞌan̈.
3 ¿Tom malaj slajvubꞌ juntzan̈ e lolonel malaj yelcꞌoch tic? ¿Tas eyaji yuj chiꞌ an̈ej val aꞌ e pacan dꞌayin?
4 Qꞌuinaloc a ex tic icha val vaj tic eyaji, max am val-laj icha tzeyutej eyalan tic dꞌayin, max am in tzicubꞌtan̈ej in sat valan jantac lolonel dꞌayex.
5 Palta jun, a am lolonel vachꞌ syacꞌ snivanil e cꞌool, syacꞌ e tecꞌanil, a am sval dꞌayex.
6 Man̈ yujoc to tzin loloni, tzꞌoch vaan in yaelal tic, man̈ yujoc pax to tzin em numan tzꞌochpax vaan.
7 A Dios tzꞌacꞌan lajvoquel vip. A pax tzꞌicꞌanel ebꞌ vamigo dꞌayin.
8 Ichato preso vaj yuuj. Jantac tas syicꞌchaan̈ ebꞌ anima dꞌa in patic, jantac es lolonel syicꞌcot ebꞌ dꞌa vibꞌan̈.
9 A Dios tzacꞌanoch vuuj yic tzin sataneli, icha junoc nocꞌ chium nocꞌ. Ay val och sat dꞌayin, icha val to vajcꞌool yaji.
10 Jantac ebꞌ anima smolbꞌej sbꞌa yic tzin sbꞌuchan ebꞌ. Stzꞌitanbꞌat in sat ebꞌ, emnaquil tzin yutejcan ebꞌ.
11 A Dios ix in acꞌanoch dꞌa yol scꞌabꞌ juntzan̈ anima te chuc spensar.
12 Juncꞌolal vajeqꞌui, ix in svecchitani. Ix och yubꞌnaj dꞌa in jaj, chocꞌ ix in yutej, ix in yacꞌanoch dꞌa sat sjul-labꞌ.
13 Yaln̈ej bꞌaj sjavi sjul-labꞌ chiꞌ dꞌayin, ichato scꞌaxpaj dꞌa in nivanil tic, man̈xa jabꞌoc snivancꞌolal dꞌayin. Toxon̈ej spuccanbꞌat yol in cꞌol dꞌa sat luum.
14 Jantac in aj in lajvi yuuj. Scot val dꞌayin icha junoc soldado te tecꞌan.
15 Te cuscꞌolal vaji, ayoch pichul ya sva vuuj, man̈xa jabꞌoc vopisio.
16 Ste mal in sat voqꞌui, sqꞌuicꞌbꞌi qꞌuinal svilaꞌ.
17 Icha chiꞌ vaji, vachꞌchom malaj mach bꞌaj ix och in mul, vachꞌn̈ej in lesal.
18 Mocabꞌ cꞌubꞌchajel jantac chucal ix acꞌjioch dꞌa vibꞌan̈. Abꞌchajocabꞌi ayic tzin tevi yic tzin cꞌanan tojolal.
19 Ay jun ayoch in testigooc ayecꞌ dꞌa satchaan̈, aꞌ ol och vedꞌoc.
20 A ebꞌ vamigo ton̈ej tzin sbꞌuch ebꞌ, a inxo tic tzin ocꞌn̈ej dꞌa yichan̈ Dios.
21 Ayoc val junoc mach tzꞌalan dꞌa Dios vuuj, icha syutej junoc mach scolan junoc yetanimail.
22 Jayexon̈ej abꞌil ayin eqꞌui, axo in bꞌat dꞌa chamel chiꞌ bꞌaj maxtzac yal co paxta.