17
Jabꞌxon̈ej val syal vicꞌan vicꞌ svabꞌi. Vanxo scꞌoch in qꞌuinal dꞌa slajvubꞌ, vachꞌxo yaj vedꞌtal dꞌa campusante.2 A ebꞌ anima, oyanoch ebꞌ in sbꞌuchani, masanil tiempo syacꞌ cus in cꞌol ebꞌ, maxtzac yal in colan in bꞌa dꞌa ebꞌ.
3 Palta Mamin colin, yujto malaj junocxo mach syacꞌoch sbꞌa in scolani, a achn̈ej syal uuj.
4 A ach ix a cꞌubꞌejel jelanil dꞌa juntzan̈ ebꞌ vin̈ vamigo tic, man̈ in a cha acꞌjoc ganar yuj ebꞌ vin̈.
5 Elocabꞌcꞌoch icha syal jun abꞌix: A junoc mach syixtej junoc yamigo, axo yuninal ol abꞌan syail yuj jun tas scꞌulej chiꞌ.
6 A ach ix acꞌ yal chuc ebꞌ anima dꞌayin, ix laj stzubꞌan in sat ebꞌ.
7 Toxon̈ej qꞌuicꞌaminac vilan yuj in yaelal. Ichato man̈ chequeloc in nivanil tic, yujto ix in te bꞌacbꞌi.
8 Ayic syilan ebꞌ anima vachꞌ sbꞌeybꞌal tas tzin icꞌan tic, sat scꞌol ebꞌ, scot yoval ebꞌ, yujto chuc in snaan ebꞌ.
9 A ebꞌ vachꞌ sbꞌeybꞌal, vachꞌn̈ej ol elcꞌoch ebꞌ. A ebꞌ malaj chucal scꞌulej, ol qꞌuen̈ejchaan̈ ebꞌ.
10 Palta cotan̈ec dꞌa tic ex vamigo. Malaj junoc aj pensar tzꞌilchaj vuj dꞌa e cal.
11 Bꞌelbꞌon yecꞌ in qꞌuinal, axo tas nabꞌil vuuj, ma tas tzin nibꞌej, toxo ix juvieli.
12 A ex tic a dꞌacꞌvalil tzeyaloch cꞌualil, axo yic qꞌuicꞌqꞌuinal, tzeyalani, lacꞌanxo ay saquilqꞌuinal.
13 Toxon̈ej tzin tan̈vej in chami, yic scꞌoch telan in nivanil svay dꞌa cal qꞌuicꞌalqꞌuinal.
14 A nocꞌ aꞌay yedꞌ campusante svaloch in mam in nunoc yedꞌ vanabꞌoc.
15 ¿Bꞌajtil ay tas svacꞌoch yipoc in cꞌool? ¿Ay am mach ojtannac tas ol in ajoc?
16 ¿Tom ol cꞌoch jun chiꞌ vedꞌ dꞌa yedꞌtal ebꞌ chamnac? ¿Tom ol cann̈ej vedꞌ taꞌ dꞌa yol lum luum chiꞌ? xchi vin̈aj Job chiꞌ.