18
Ix yalanxi vin̈aj Bildad icha tic:2 ¿Bꞌaqꞌuin̈ val ol actej a loloni? Nachajocabꞌ uuj, ichato pax chiꞌ syal co loloni.
3 ¿Tas yuj tzon̈ al nocꞌal, man̈xa jabꞌoc quelcꞌoch dꞌa a sat?
4 ¿Tas yuj tza chalchitej a bꞌa yuj chichoncꞌolal? ¿Am a naani yujto icha chiꞌ tzutej a bꞌa ol can tzꞌinan lum luum tic, ma ol qꞌuexvoc yedꞌtal qꞌuen tenam?
5 A tas ayoch yipoc scꞌol junoc mach chuc spensar, ol tupemoc, icha stup junoc candil vanxo stup scꞌacꞌal.
6 Ol tup scꞌacꞌal scandil dꞌa yol spat, man̈xa saquilqꞌuinal taꞌ.
7 Maxtzac yal yecꞌ yedꞌ stecꞌanil, van slocan sbꞌa yoc, stelvi yuj tas nabꞌil yuuj.
8 Ichato ol em junoc chꞌan̈ yaal dꞌa yol sbꞌe, ol can sudꞌnaj dꞌa yol jun chꞌan̈ yaal chiꞌ.
9 Ol em jun chꞌan̈ yaal chiꞌ dꞌa yol sbꞌe. A dꞌa sjaj yoc ol och sudꞌnaj chꞌan̈.
10 Cꞌubꞌeltac yajem jun yaal chiꞌ dꞌa yol sbꞌe.
11 Ayn̈ejoch xivcꞌolal dꞌa spatic yichan̈, ichato spechji bꞌeyecꞌoc.
12 Ay tas dꞌay dꞌa pecaꞌ, axo ticnaic van scham yuj vejel, a yaelal qꞌuelanxo och dꞌay.
13 A jun ilya slajanel snivanil, axo scꞌabꞌ yedꞌ yoc ichato ol cꞌuxjocbꞌat yuj jun ilya chiꞌ.
14 Ol icꞌjoquel dꞌa scal juncꞌolal bꞌaj cajan, ol n̈erjoccanbꞌat dꞌa yichan̈ jun aj chamel.
15 Chꞌocxo mach ol cajnajcan dꞌa scajnubꞌ. Ayic toxo ix cham chiꞌ, ol tzicchajecꞌ azufre dꞌa yol spat chiꞌ, yic satel jun yabꞌil chiꞌ.
16 Lajan val icha junoc te teꞌ taquin̈xo schꞌan̈al yibꞌ yedꞌ scꞌabꞌtac.
17 A sbꞌinajnaquil ol satcanel dꞌa sat luum tic. Man̈xa bꞌaqꞌuin̈ ol bꞌinajoc.
18 Ol icꞌchajel dꞌa scal ebꞌ pitzan bꞌaj sacqꞌuinal. Bꞌaj ay ebꞌ chamnac dꞌa qꞌuicꞌalqꞌuinal ol yumjoccanbꞌatoc.
19 Man̈xa yin̈tilal ol can dꞌa schon̈abꞌ yedꞌ bꞌaj cajan.
20 Ayic ol abꞌchaj tas ix javi dꞌa yibꞌan̈, ol xivcanqꞌue ebꞌ cajan dꞌa stojolal bꞌaj sjavi cꞌu yedꞌ bꞌaj tzꞌem cꞌu.
21 Icha val chiꞌ ol aj satel ebꞌ chuc, aton ebꞌ malaj yelcꞌoch Dios dꞌay, xchi vin̈aj Bildad chiꞌ.