19
Ix yalanxi vin̈aj Job chiꞌ icha tic:2 ¿Bꞌaqꞌuin̈ val ol eyactej e tzuntzan ovaj in yaelal tic, tzeyacꞌan cus in cꞌol yedꞌ juntzan̈ e lolonel tic?
3 Ayexn̈ejoch eyalan chucal lolonel dꞌayin. ¿Tom max ex qꞌuixvi eyalan dꞌayin?
4 Qꞌuinaloc yel ay in mul chiꞌ, ¿tom tzeyabꞌ syail yuuj?
5 Tzeyicꞌ val chaan̈ e bꞌa dꞌayin yuj in yaelal tic, tzeyalanoch dꞌa in sat to chuc in.
6 Palta comonoc snachajel eyuuj to a Dios icha tic tzin utani. Aꞌ ix in acꞌanem dꞌa yol jun yaal tic.
7 Scomon el vav, svalan icha tic: Svabꞌ val in chami, xin chi. Palta malaj mach stacꞌvi dꞌayin. Tzin nibꞌej ay mach tzin colani, palta malaj mach sbꞌoan yaj dꞌayin.
8 A Dios ix macan yol in bꞌe, yic maxtzac yal in bꞌeyeqꞌui. Ichato dꞌa scal qꞌuicꞌalqꞌuinal tzin ecꞌ yuuj.
9 Ix yiqꞌuecꞌ in bꞌeyumal, ix yicꞌanecꞌ snivanil velcꞌochi.
10 Ix in satem dꞌa juneln̈ej. A tas ayoch yipoc in cꞌool, pilan ix lajviel icha junoc te teꞌ malaj schꞌan̈al yibꞌ.
11 Ix seccot yoval scꞌool dꞌa vibꞌan̈, icha val junoc yajcꞌool ix in yutej.
12 Masanil ebꞌ soldado Dios chiꞌ ix och oyan dꞌayin. Ix oymaj ebꞌ dꞌa spatictac in pat yic syacꞌan oval ebꞌ vedꞌoc.
13 A Dios chiꞌ ix icꞌanel ebꞌ vucꞌtac yedꞌ ebꞌ vamigo dꞌa in tzꞌey, ichaxon̈ej junoc comon anima ix in yutejcan ebꞌ.
14 A ebꞌ ayto vuj in bꞌa yedꞌoc yedꞌ ebꞌ vamigo, ix in yactejcan ebꞌ, ix in bꞌatcan satcꞌolal yuj ebꞌ.
15 Axo ebꞌ cajan dꞌa in pat yedꞌ masanil ebꞌ in checabꞌ, icha junoc chꞌoc animail ix in ajcan dꞌa ebꞌ, maxtzac in yilochlaj ebꞌ.
16 Tato svavtejcot junoc ebꞌ in checabꞌ chiꞌ, maxtzac tacꞌvilaj ebꞌ dꞌayin, vachꞌchom tzin tevi dꞌa ebꞌ.
17 Ayic tzin cꞌoch dꞌa stzꞌey ix vetbꞌeyum, chuclaj sjabꞌ xobꞌal in tiꞌ syabꞌ ix, axo ebꞌ ayto vuj in bꞌa yedꞌoc, tzin syajel ebꞌ.
18 Icha pax chiꞌ ebꞌ unin tzin spatiquejel ebꞌ. Ayic syilan ebꞌ veqꞌui sbꞌuchvaj ebꞌ dꞌayin.
19 A val ebꞌ ecꞌbꞌal te vachꞌ vacꞌan yedꞌoc, tzin spatiquejel ebꞌ. A val ebꞌ tzin te tzalaj yedꞌoc, ix meltzajoch ebꞌ ajcꞌolal dꞌayin.
20 Toxo ix tacjioch in tzꞌumal yedꞌ in bꞌacꞌchil dꞌa in bꞌaquil, tevelxon̈ej pitzan in.
21 Ex vamigo, ocꞌocabꞌ e cꞌool dꞌayin, yujto a Dios ix acꞌancot jun yaelal tic dꞌa vibꞌan̈.
22 ¿Tas yuj tzacꞌanexn̈ej vuuj, icha tzin yutej Dios? ¿Tom man̈ cꞌocbꞌilocxo in eyacꞌan cusoc?
23 Ayoc val mach stzꞌibꞌancan juntzan̈ in lolonel tic. Comonoc tzꞌacꞌchajcanoch dꞌa qꞌuen qꞌueen.
24 Comonoc a yedꞌ qꞌuen cincel nabꞌa hierro tzꞌacꞌjicanoch dꞌa qꞌuen qꞌueen yic scan dꞌa juneln̈ej.
25 Vojtac to a in Columal pitzann̈ej, axo dꞌa slajvubꞌ cꞌual ol emul dꞌa sat lum tic yic tzin scolani.
26 Vachꞌchom slajviel in tzꞌumal tic, palta ol vil val och Dios yedꞌ in nivanil tic.
27 A in val lacꞌan ol vil val och yedꞌ in sat, man̈ chꞌococ mach ol ilanoc.
Vanxo slajvicꞌoch vip svabꞌi.
28 Ayic svabꞌan eyalan icha tic: ¿Tas val scutej cacꞌan cus scꞌol vin̈, yujto munil a vin̈ tzꞌicꞌancot syaelal chiꞌ dꞌa yibꞌan̈? xe chi.
29 Palta xivan̈ec dꞌa qꞌuen espada, aton yoval scꞌol Dios syacꞌlabꞌej dꞌa ebꞌ scꞌulan chucal. Ojtaquejequeli to ay jun Dios tzon̈ chꞌolbꞌitani, xchi vin̈aj Job chiꞌ.