20
Ix yalanxi vin̈aj Zofar aj Naamat icha tic:2 Ach Job, maxtzac yal-laj to ton̈ej numan tzin aji. Yuj chiꞌ tzin nibꞌej tzin tacꞌvi dꞌayach.
3 Ix on̈ a bꞌuch val yedꞌ a chucal lolonel, palta vojtac tas ol aj in pacan dꞌayach.
4 A ach tic ojtactaxoni to atax yic ix te qꞌuibꞌchaan̈ anima dꞌa sat luum tic,
5 a stzalajcꞌolal ebꞌ chuc max najtilaxlaj. Junn̈ej rato syacꞌ jabꞌ stzalajcꞌolal ebꞌ chiꞌ.
6 Vachꞌchom te chaan̈ yajqꞌue ebꞌ icha schaan̈il satchaan̈, axo sjolom ebꞌ sqꞌuecꞌoch bꞌaj ay asun,
7 palta ol lajvoquem ebꞌ icha stzaꞌ nocꞌ nocꞌ, axo ebꞌ yamigo ebꞌ, man̈xo ol nachaj yuj ebꞌ bꞌaj ol cꞌochcan ebꞌ chuc chiꞌ.
8 Ol satem ebꞌ dꞌa ichn̈ej taꞌ icha junoc vayich. Man̈xalaj mach ol ilanoch ebꞌ.
9 A ebꞌ tzꞌilantaxonoch ebꞌ yedꞌ ebꞌ junn̈ej tzꞌecꞌ yedꞌ ebꞌ, man̈xa bꞌaqꞌuin̈ ol iljococh ebꞌ yuj ebꞌ.
10 A tas yelqꞌuejnac ebꞌ, axo ebꞌ yuninal ebꞌ ol acꞌan meltzaj dꞌa ebꞌ mebꞌaꞌ bꞌaj yelqꞌuejnac ebꞌ chiꞌ.
11 Ayic tecꞌan val yip ebꞌ dꞌa squelemal, ol emcan ebꞌ bꞌaj smucchaj ebꞌ chamnac.
12 Vachꞌchom te vachꞌ scꞌulan chucal ebꞌ syabꞌi, ste tzalaj ebꞌ yedꞌoc,
13 te chiꞌ jun chucal chiꞌ dꞌa ebꞌ,
14 axo dꞌa yol scꞌol ebꞌ, ol meltzajoch venenoal, icha svenenoal nocꞌ chan.
15 Masanil sbꞌeyumal ebꞌ ix sbꞌuqꞌuemi, ol xejejxiqꞌueta ebꞌ, yujto a Dios ol icꞌanqꞌueta dꞌa yol scꞌol ebꞌ chiꞌ.
16 Ichato ix stzꞌubꞌbꞌat svenenoal nocꞌ chan chiꞌ ebꞌ. A jun veneno chiꞌ ol icꞌan scham ebꞌ.
17 Man̈xo ol yacꞌ tzalajbꞌoc scꞌol ebꞌ yedꞌ jantac tas ay dꞌay, aton lech, nocꞌ yal chabꞌ to man̈xa yalnabꞌil.
18 Masanil tas yicꞌnaquecꞌ ebꞌ, yovalil ol yacꞌxi meltzaj ebꞌ. Man̈xo ol yal yacꞌan tzalajbꞌoc scꞌol ebꞌ yedꞌ sbꞌeyumal chiꞌ.
19 Ix te ixtaj ebꞌ mebꞌaꞌ yuj ebꞌ, man̈xa jabꞌoc tas ix can dꞌa ebꞌ. A ebꞌ chuc chiꞌ ix macanqꞌue yicoc juntzan̈ pat to man̈oclaj ebꞌ bꞌojinac.
20-21 Man̈xa jabꞌoc tas ix colchajcanel dꞌa yol scꞌabꞌ ebꞌ. Axon̈ej ebꞌ smacbꞌej sbꞌa dꞌay smasanil, palta man̈ najtiloc ol yacꞌ tzalajbꞌoc scꞌol ebꞌ yedꞌoc.
22 Ayic tzijtum tas tzꞌaj dꞌa ebꞌ, tzijtum pax cuscꞌolal ol javoc dꞌa yibꞌan̈ ebꞌ.
23 A val yic van yacꞌan bꞌudꞌjoc scꞌol ebꞌ, syacꞌan sgana ebꞌ yedꞌ tastac ay dꞌay, ataꞌ ol seccot yoval scꞌol Dios dꞌa yibꞌan̈ ebꞌ.
24 Tato ol yacꞌ ganar ebꞌ yel dꞌa qꞌuen espada nabꞌa hierro, axo jul-labꞌ nabꞌa bronce ol ecꞌ dꞌa ebꞌ.
25 A jun jul-labꞌ chiꞌ ol cꞌaxpajecꞌ dꞌa snivanil ebꞌ. Ol ecꞌ dꞌa seyubꞌ ebꞌ, ol elcꞌoch dꞌa yich spatic ebꞌ. Ol te xivqꞌue ebꞌ yuj jun chiꞌ.
26 A qꞌuicꞌalqꞌuinal ol cꞌubꞌanel tastac sicꞌan yuj ebꞌ. A jun cꞌacꞌ max tupi, aꞌ ol n̈usantzꞌa masanil tastac ay dꞌa ebꞌ.
27 A Dios ol acꞌan checlaj schucal ebꞌ. Ol yalanpax ebꞌ anima to ay smul ebꞌ.
28 Ayic ol javoc yoval scꞌol Dios dꞌa yibꞌan̈ ebꞌ, ol satel masanil sbꞌeyumal ebꞌ.
29 Aton val juntzan̈ tic nabꞌil yuj Dios dꞌa yibꞌan̈ ebꞌ chuc chiꞌ, vachꞌxo yajcan dꞌa yibꞌan̈ ebꞌ yuuj, xchi vin̈aj Zofar chiꞌ.