21
Ix yalanxi vin̈aj Job chiꞌ icha tic:2 Maclejec val eyabꞌ tas svalaꞌ, tato icha chiꞌ ol eyacꞌ snivanil in cꞌool.
3 Nivan tzeyutej e cꞌool yacbꞌan tzin loloni. Slajvi in lolon chiꞌ tzex bꞌuchvajxi dꞌayin bꞌian.
4 ¿Tocval a yedꞌ junoc anima van vacꞌan oval? ¿Tom man̈ smojoc scus in cꞌool e naani?
5 Ilinecnabꞌi ol ex xivbꞌatoc, man̈xalaj tas ol elta dꞌa e tiꞌ.
6 Ayic tzin naancot juntzan̈ chiꞌ, tzꞌibꞌxiqꞌue in nivanil tic yuj xivelal.
7 ¿Tas yuj nivan tiempo syil ebꞌ chuc? Scꞌoch ebꞌ icham animail, sbꞌinaj val ebꞌ.
8 Tzato yil ebꞌ sqꞌuibꞌ yuninal, stzalaj pax ebꞌ yoch oyan ebꞌ yixchiquin dꞌa stzꞌey.
9 Malaj tas xibꞌtan ebꞌ, juncꞌolaln̈ej yajecꞌ ebꞌ. Malaj syaelal ebꞌ tzꞌacꞌji yuj Dios.
10 A nocꞌ smam svacax ebꞌ, vachꞌn̈ej yel yin̈tilal nocꞌ. Ayic stajni nocꞌ snun svacax ebꞌ, max ecꞌlaj yuneꞌ nocꞌ.
11 A yalyuninal ebꞌ sqꞌue cheneljoc ebꞌ icha sqꞌue tzꞌitiljoc nocꞌ yunetac chiva.
12 Ayic syabꞌan ebꞌ yoch sjajil yamcꞌabꞌ yic bꞌit, aton teꞌ arpa, teꞌ tan̈bꞌil yedꞌ teꞌ spuchaji, sqꞌue cheneljoc ebꞌ yuj tzalajcꞌolal.
13 Vachꞌn̈ej yaj ebꞌ chuc chiꞌ, juncꞌolal tzꞌaj sbꞌatcan ebꞌ bꞌaj smucchaji.
14 Syalan ebꞌ dꞌa Dios: Man̈ on̈ a tzuntzej, max yal co cꞌol scojtaquejel a checnabꞌil.
15 ¿Mach jun Dios Syal Yuj Smasanil chiꞌ, yic tzon̈ och ejmelal dꞌay? ¿Tas scacꞌ yalaꞌ tzon̈ tevi dꞌay? xchi ebꞌ.
16 A snaan ebꞌ chuc chiꞌ to yujn̈ej sjelanil ebꞌ ay sbꞌeyumal ebꞌ. A inxo tic max in cha vabꞌ tas syal ebꞌ.
17 ¿Tom scomon cham ebꞌ chuc icha tzꞌaj stup junoc candil? ¿Tom scomon javi yaelal dꞌa yibꞌan̈ ebꞌ? ¿Tom scomon cot yoval scꞌol Dios dꞌa yibꞌan̈ ebꞌ syabꞌan syail ebꞌ yuuj?
18 ¿Tom scomon saclembꞌat ebꞌ icha an̈ ac tzꞌicꞌjibꞌat yuj chacxuxum icꞌ?
19 A eyalani to ato ebꞌ uninabꞌil stupan smul smam. Palta a in tic svalaꞌ to smoj a val lacꞌan ebꞌ stupan smul chiꞌ, yic syojtaquejel ebꞌ to yuj smul ebꞌ icha chiꞌ tzꞌaj ebꞌ.
20 A ebꞌ chuc chiꞌ smojton schaan yaelal ebꞌ sjavi dꞌa yibꞌan̈ yuj yoval scꞌol Dios Syal Yuj Smasanil.
21 Ayic toxo ix cham ebꞌ, man̈xalaj yalan yic ebꞌ yuj tas scotcan dꞌa yibꞌan̈ yuninal ebꞌ chiꞌ.
22 Palta, ¿mach syal scꞌaybꞌan Dios dꞌa jelanil? An̈ejton val Dios chiꞌ schꞌolbꞌitan ebꞌ te nivac yelcꞌochi.
23-24 Ay ebꞌ vachꞌn̈ej tzꞌaj yeqꞌui, tecꞌan val yip ebꞌ scham ebꞌ.
25 Ay pax ebꞌ jun, te cuscꞌolaln̈ej tzꞌaj yecꞌ ebꞌ scham ebꞌ, malaj jabꞌoc tzalajcꞌolal syil ebꞌ.
26 Palta jun, a bꞌaj smucchaj ebꞌ chamnac chiꞌ, lajann̈ej ol aj ebꞌ. Junlajan ol chijocbꞌat ebꞌ yuj nocꞌ aꞌay.
27 Vojtac tas tze na dꞌa in patic yedꞌ e chuc pensaril.
28 Tze naan icha tic: ¿Bꞌajtom ix can spat jun vin̈ chuc tic, jun vin̈ yajalxo ix yutej sbꞌa tic? xe chi.
29 ¿Tom malaj bꞌaj tzex lolon yedꞌ ebꞌ anima sbꞌeyeqꞌui? ¿Tom maj eyabꞌ tas syicꞌtiej ebꞌ?
30 Ayic scot yoval scꞌol Dios, syacꞌancot junoc yaelal, axo ebꞌ chuc malaj tas tzꞌicꞌan ebꞌ.
31 ¿Mach tzꞌalanoch dꞌa sat ebꞌ yuj tastac scꞌulej chiꞌ? ¿Mach ol acꞌan spac yuj tas scꞌulej ebꞌ chiꞌ?
32 Axo sbꞌat mucchajcan ebꞌ, stan̈vaj bꞌaj smucchaj ebꞌ chiꞌ.
33 Siclabꞌinac lum luum sbꞌatcan dꞌa yibꞌan̈ ebꞌ. Jantac ebꞌ mucbꞌilxo taꞌ, jantacto pax ebꞌ ol mucjocpaxoc.
34 ¿Tas tzꞌaj eyacꞌan snivanil in cꞌol yedꞌ juntzan̈ e lolonel malaj yelcꞌoch tic? Nabꞌa es juntzan̈ tzeyal tic dꞌayin, xchi vin̈aj Job chiꞌ.