Yoxil macan̈ lolonel
22
Ix yalanxi vin̈aj Elifaz aj Temán icha tic:2 ¿Tocval ay tas ol yicꞌ Dios dꞌa junoc anima, vachꞌchom to aj pensar?
3 Qꞌuinaloc te tojol tzutej a bꞌa, mato malaj a mul, ¿tom ay jabꞌoc tas ol yicꞌ Dios Syal Yuj Smasanil dꞌa a patic?
4 Man̈ yujoc to tza cꞌanabꞌajej, ma yuj a vachꞌil syacꞌan a cachnabꞌil yedꞌ a yaelal Dios chiꞌ.
5 Palta yujto a val a chucal yedꞌ a mul chiꞌ malaj slajvubꞌ.
6 Ix a cꞌancanecꞌ spichul ebꞌ mebꞌaꞌ ayic ix acꞌan tas sqꞌuex ebꞌ, vachꞌchom ix elcan bꞌeran ebꞌ.
7-8 Vachꞌchom te bꞌinajnac ach, to ic masanil lum luum tic, palta maj acꞌ jabꞌoc aꞌ yuqꞌuej ebꞌ ay staquin̈tial, maj acꞌ pax va ebꞌ ay svejel.
9 Ix a chec meltzaj ebꞌ ix ix chamnac yetbꞌeyum, malaj jabꞌoc tas ix acꞌ dꞌa ebꞌ ix. Ix icꞌanecꞌ tas aycan dꞌa ebꞌ chamnac smam.
10 Yuj chiꞌ tzoymaj chucal dꞌa a patic ticnaic, tzach somchajqꞌue yuj tas ay smay.
11 Ichato qꞌuicꞌalqꞌuinal yaj dꞌayach, maxtzac yal ilan jabꞌoc. Icha val to a junoc aꞌ elumaꞌ van ach yicꞌanbꞌati.
12 A Dios ay dꞌa satchaan̈, najat ayqꞌue dꞌa yibꞌan̈ qꞌuen cꞌanal, syilemta masanil tastac tzuji.
13 ¿Am a naani to max yil co bꞌeybꞌal? ¿Tom a qꞌuicꞌal asun tzach cꞌubꞌanel dꞌay?
14 ¿Am a naani to yuj qꞌuicꞌal asun chiꞌ max yil Dios, yacbꞌan van sbꞌeyecꞌ dꞌa yibꞌan̈ satchaan̈ chiꞌ?
15 ¿Tom tza tecꞌbꞌejn̈ej a bꞌa a bꞌeybꞌalan sbꞌeybꞌal ebꞌ pecaꞌ anima chuc sbꞌeybꞌal?
16 Pet chamnac ebꞌ chiꞌ, icha tzꞌaj yicꞌjibꞌat junoc mach yuj aꞌ elumaꞌ.
17-18 Vachꞌchom a Dios Syal Yuj Smasanil ix acꞌan bꞌudꞌjoc spat ebꞌ yuj masanil tastac, palta ix spatiquejel Dios chiꞌ ebꞌ. Snaan ebꞌ to malaj tas tzꞌutaj ebꞌ yuuj. Mocabꞌ in na icha sna ebꞌ pit syutej sbꞌa chiꞌ.
19 Ayic ol yilan ebꞌ vachꞌ spensar satel ebꞌ chuc, ol tzalajqꞌue ebꞌ. Axo ebꞌ malaj smul ton̈ej ol tzevaj ebꞌ ol yalan ebꞌ icha tic:
20 A ebꞌ cajcꞌool van satel ebꞌ, van stzꞌabꞌat sbꞌeyumal ebꞌ, xcham ebꞌ.
21 Ach Job, ochan̈xi juncꞌolal yedꞌ Dios, tato icha chiꞌ vachꞌ ol ach ajxieqꞌui.
22 Schaocabꞌ a cꞌol to a Dios chiꞌ tzach cꞌaybꞌani. Canocabꞌ val slolonel dꞌa a pensar.
23 Tato tziqꞌuem a bꞌa, tzacꞌanxioch a bꞌa dꞌa yol scꞌabꞌ Dios Syal Yuj Smasanil chiꞌ, ol ach yicꞌxichaan̈. Tato najat tzicꞌcanel chucal dꞌa a pat,
24 tato man̈xa yelcꞌoch qꞌuen oro jantac svachꞌil dꞌa yol a sat, ichaxon̈ej lum pococ, ma qꞌuen comon qꞌueen ay dꞌa yoltac a aꞌ tzꞌajcan qꞌuen dꞌayach,
25 tato icha chiꞌ tzutej a bꞌa, a Dios Syal Yuj Smasanil chiꞌ ol och a bꞌeyumaloc, icha jantac qꞌuen oro, ma qꞌuen plata.
26 Ol ach tzalaj yedꞌoc, ol acꞌpaxoch yipoc a cꞌool.
27 Tato ay tas ol a cꞌan dꞌay, ol yabꞌ tas ol alaꞌ, a achxo ol aqꞌuelcꞌoch bꞌaj ix acꞌ a tiꞌ dꞌay.
28 A tastac ol a naꞌa, ol elcꞌoch dꞌayach, yujto a svachꞌcꞌolal Dios ol ochn̈ej edꞌoc.
29 A Dios tzꞌicꞌanem ebꞌ syicꞌchaan̈ sbꞌa, scolvaj dꞌa ebꞌ emnaquil syutej sbꞌa.
30 An̈ejaꞌ scolan ebꞌ malaj smul, ol ach scol paxi tato malaj a mul, xchi vin̈aj Elifaz chiꞌ.