23
Ix yalanxi vin̈aj Job chiꞌ icha tic:2 A ticnaic an̈ejaꞌ yel vav yuj in yaelal tic. Vachꞌchom tzin te cꞌacvi, palta an̈ejaꞌ yacꞌanoch in yaelal Dios.
3 Comonoc svojtaquejeli bꞌajtil tzꞌilchaj Dios chiꞌ vuuj, tas pax tzꞌaj in cꞌoch bꞌaj ay sdespacho.
4 Tato icha chiꞌ tzam val dꞌay yuj in yaelal tic, yujto tzijtum tas tzin nibꞌej sval dꞌay yuj in colan in bꞌa.
5 Tzin nibꞌej svojtaquejeli tas ol yal dꞌayin.
6 ¿Tocval ol yacꞌlabꞌej yip yic tzin scachanem numnajoc? Maay, ol smaclej yabꞌ tas ol valaꞌ.
7 Ol am yojtaquejeli to yel svalaꞌ, ol am yalani to malaj in mul. Icham chiꞌ ol aj in yacꞌanel dꞌa libre dꞌa juneln̈ej.
8 Tzin sayecꞌ Dios dꞌa stojolal bꞌaj sjavi cꞌu, malaj ayecꞌ taꞌ. Tzin saypaxecꞌ dꞌa stojolal bꞌaj tzꞌem cꞌu, max ilchajpaxlaj vuj taꞌ.
9 Tzin sayecꞌ dꞌa stojolal norte, max ilchajlaj vuuj. An̈ejtonaꞌ, tzin sayanxi dꞌa stojolal sur, max schꞌox pax sbꞌa dꞌayin taꞌ.
10 Palta yojtac in bꞌeybꞌal. Ayic ol lajvoc in yacꞌan proval, vachꞌxon̈ej ol in ajcan icha qꞌuen oro sbꞌo dꞌa cal cꞌacꞌ.
11 A jun bꞌeybꞌal ix schꞌoxcan dꞌayin, malaj bꞌaqꞌuin̈ svactejcan in bꞌeybꞌalani.
12 Tzin cꞌanabꞌajejn̈ej schecnabꞌil yedꞌ scꞌaybꞌubꞌal. Ecꞌbꞌalxo yelcꞌoch schecnabꞌil chiꞌ dꞌa yichan̈ bꞌeyumal dꞌa yol in sat.
13 Ayic snaan Dios scꞌulan junoc tasi, scꞌulejn̈ej, malaj junoc mach syal scachanoch vaan.
14 A tas nabꞌil yuj scꞌulan dꞌayin, scꞌulejn̈ej. Tzijtumto pax tas nabꞌil yuuj dꞌa vibꞌan̈.
15 Yuj val chiꞌ tzin te xiv dꞌay. An̈ej tzin naancoti tzin te xivqꞌuei.
16 A Dios Syal Yuj Smasanil, yuuj tzꞌel vip yuj xivelal.
17 Vachꞌchom maxtzac vil-laj yuj qꞌuicꞌalqꞌuinal oyanoch dꞌa in patic, palta max in emlaj numan.