24
A Dios Syal Yuj Smasanil, ¿tas yuj max yal scꞌual ayic schꞌolbꞌitani, yic vachꞌ stan̈vaj yuj ebꞌ svachꞌcꞌol chiꞌ dꞌa jun cꞌu chiꞌ?2 A ebꞌ chuc sqꞌuex stzꞌacan̈il lum luum ebꞌ, syelcꞌan nocꞌ calnel ebꞌ, syacꞌanoch nocꞌ ebꞌ dꞌa scal nocꞌ yicoꞌ.
3 Syicꞌanecꞌ nocꞌ sbꞌuru ebꞌ mebꞌaꞌ chamnac smam ebꞌ, scꞌanancan nocꞌ svacax ebꞌ ix ix chamnac yetbꞌeyum yuj qꞌuen tumin syacꞌ ebꞌ majanil.
4 Tzꞌicꞌjicanel ebꞌ mebꞌaꞌ dꞌa yoltac bꞌe yuj ebꞌ. Axo ebꞌ anima emnaquil yeqꞌui, scꞌubꞌejel sbꞌa ebꞌ dꞌa ebꞌ chuc chiꞌ.
5 A ebꞌ mebꞌaꞌ chiꞌ lajan tzꞌajcan ebꞌ icha nocꞌ caltacteꞌal bꞌuru dꞌa tzꞌinan luum. Ataꞌ say va sbꞌa ebꞌ. A dꞌa tzꞌinan lum chiꞌ say svael yalyuninal ebꞌ.
6 A ebꞌ mebꞌaꞌ chiꞌ sbꞌat ebꞌ dꞌa smunlajel ebꞌ chꞌoc animail. Sbꞌat sicꞌqꞌue ixim jolom trigo ebꞌ, sbꞌat pax ebꞌ dꞌa scal yavbꞌen uva ebꞌ chuc chiꞌ, sbꞌat ebꞌ say teꞌ sat tzato cani ayic smolji.
7 A ebꞌ mebꞌaꞌ chiꞌ, malaj spichul ebꞌ ayochi tzꞌecꞌ acꞌval. Malaj jabꞌoc tas spichan ebꞌ dꞌa siic.
8 Ayic syacꞌan n̈abꞌ, tzꞌecꞌchaj aꞌ dꞌa ebꞌ dꞌa caltac teꞌ, axo dꞌa yoltac qꞌuen n̈aqꞌueen scol sbꞌa ebꞌ.
9 A ebꞌ chuc chiꞌ syiqꞌuecꞌ snenetac unin ebꞌ ix chamnac yetbꞌeyum ebꞌ, yic scan dꞌa ebꞌ yuj tas syacꞌ ebꞌ majanil dꞌa ebꞌ ix.
10 A ebꞌ mebꞌaꞌ chiꞌ, jabꞌtzin spichul ebꞌ ayochi. Tzꞌecꞌ ebꞌ cuchoj trigo, palta van schampax ebꞌ yuj vejel.
11 Smunlaj ebꞌ yedꞌ qꞌuen molino tzꞌicꞌanelta aceite. Stecꞌanel yal sat teꞌ uva ebꞌ, palta van schampax ebꞌ yuj taquin̈tial.
12 Axo ebꞌ ya yaji, tzꞌel yav ebꞌ scꞌanan colval. Van scham ebꞌ dꞌa cal chon̈abꞌ, palta max abꞌchajlaj yel yav ebꞌ yuj Dios.
13 Ay ebꞌ malaj sgana dꞌa jun bꞌe yic saquilqꞌuinal, max sbꞌeybꞌalej tojolal ebꞌ.
14 Ayic qꞌuicꞌto sqꞌue vaan ebꞌ macꞌumcham anima, yic sbꞌat smacꞌancham ebꞌ mebꞌaꞌ ebꞌ. Axo tzꞌecꞌ acꞌval, a elcꞌal syacꞌ ebꞌ.
15 A ebꞌ tzꞌem ajmulal stan̈vej ebꞌ sqꞌuicꞌbꞌi, smacan sat ebꞌ. Snaan ebꞌ icha tic: Malaj mach ol on̈ ilanochoc, xchi ebꞌ.
16 A ebꞌ elcꞌum chiꞌ, a dꞌacꞌvalil tzꞌoch ebꞌ elcꞌal dꞌa teꞌ pat. Axo dꞌa cꞌualil macan ebꞌ, yujto max schalaj scꞌol saquilqꞌuinal ebꞌ.
17 Xiv ebꞌ dꞌa saquilqꞌuinal chiꞌ, axo qꞌuicꞌalqꞌuinal stzalaj ebꞌ yedꞌoc, yujto ataꞌ xiv juntzan̈xo anima.
18 A ebꞌ chuc chiꞌ, elan̈chameln̈ej ol ecꞌ ebꞌ icha sbꞌey svomal a aꞌ, axo sluum ebꞌ ol catabꞌajcanoc. Man̈xa mach ol munlaj bꞌaj ay yavbꞌen uva ebꞌ.
19 Icha tzꞌaj yulaxbꞌat qꞌuen cheev yuj scꞌacꞌal yoc cꞌu, icha chiꞌ ol aj satem ebꞌ chuc chiꞌ bꞌaj smucchaji.
20 A ebꞌ chuc chiꞌ sbꞌatcan ebꞌ satcꞌolal yuj snun. Man̈xa mach snaancot ebꞌ, axo nocꞌ aꞌay schianbꞌat ebꞌ. Stelvi ebꞌ icha tzꞌaj stelvi junoc te teꞌ schꞌacchaji.
21 Tzꞌixtaj ebꞌ ix ix toxon max unevilaj yuj ebꞌ. Max colvajpaxlaj ebꞌ dꞌa ebꞌ ix chamnac yetbꞌeyum.
22 Palta a Dios yedꞌ spoder satanel ebꞌ chuc chiꞌ. A val yic schꞌoxan spoder Dios chiꞌ, man̈xa junoc mach max xiv dꞌa chamel.
23 Tato tzꞌel dꞌa scꞌol Dios, juncꞌolal pitzan ebꞌ chuc chiꞌ, palta ayn̈ejoch sat dꞌa tas scꞌulej ebꞌ.
24 Quenn̈ej tiempo tzꞌicꞌjichaan̈ ebꞌ chuc chiꞌ, palta elan̈chamel satxicanel ebꞌ. Icha tzꞌaj stacji ixim trigo jochbꞌilxo, icha chiꞌ tzꞌaj ebꞌ.
25 Tato man̈ ichoctaꞌ, ¿mach ex syal eyalani to van vesani, to satnac in? xchi vin̈aj Job chiꞌ.