42
Ix lajvi chiꞌ ix yalan vin̈aj Job chiꞌ dꞌa Jehová icha tic:2 Vojtac to masanil syal uuj, a tas tza nibꞌej, tza bꞌon̈ej.
3 A ach ix al dꞌayin icha tic: ¿Tas aji, yuj chiꞌ yedꞌ a lolonel malaj yelcꞌoch tzalaꞌ scheclaji to max a chalaj tato tzꞌacan in jelanil? xa chi. A in tic a tas satubꞌtac yedꞌ tas max nachaj vuuj, a chiꞌ ix valaꞌ.
4 Ix alan pax dꞌayin icha tic: Abꞌ tas ol valaꞌ, tza pacan dꞌayin tas ol in cꞌanbꞌej dꞌayach, xa chi.
5 A dꞌa yalan̈taxo an̈ej abꞌixal ix vabꞌi, palta axo ticnaic tzach vil val och yedꞌ in sat.
6 Yuj chiꞌ snachajel vuuj to malaj jabꞌoc velcꞌochi, vachꞌ tzin emxon̈ej cꞌojan dꞌa cal pococ tic yedꞌ dꞌa scal qꞌuen ticꞌaqꞌuil taan̈ tic yic tzin naan in bꞌa, xchi vin̈aj Job chiꞌ.
Svachꞌcꞌolal Dios dꞌa vin̈aj Job
7 Ayic ix lajvi yalan juntzan̈ tic Jehová dꞌa vin̈aj Job chiꞌ, ix yalanpax dꞌa vin̈aj Elifaz chiꞌ icha tic: Scot val voval dꞌayach yedꞌ chavan̈xo ebꞌ vin̈ ajun edꞌ chiꞌ, yujto man̈ vachꞌoc tas ix eyal dꞌa in patic, man̈ lajanoc ix eyutej e bꞌa yedꞌ vin̈ in checabꞌ aj Job tic. 8 A ticnaic, iqꞌueccot ucvan̈oc nocꞌ quelemtac vacax yedꞌ ucvan̈oc nocꞌ chꞌac calnel, tzul eyacꞌan nocꞌ dꞌa vin̈ in checabꞌ aj Job tic, axo vin̈ ol n̈usantzꞌa nocꞌ smasanil silabꞌil dꞌayin eyuuj. A vin̈ ol lesalvoc eyuuj, ol in chaan slesal vin̈ chiꞌ. Vachꞌchom to smoj e chaan eyaelal, yujto man̈ vachꞌoc tas ix eyal dꞌa in patic, man̈ ichoc ix yutej sbꞌa vin̈ in checabꞌ aj Job tic ix eyutej e bꞌa, palta man̈xa tas ol ex vutej, xchi Jehová.
9 Yuj chiꞌ ix cot vin̈aj Elifaz chiꞌ, vin̈aj Bildad yedꞌ vin̈aj Zofar, ix scꞌulan ebꞌ vin̈ icha val ix aj yalan Jehová. Ix chaji slesal vin̈aj Job chiꞌ yuj Jehová chiꞌ.
10 Ayic lesalvinacxo vin̈aj Job yuj ebꞌ vin̈ yamigo chiꞌ, ix yacꞌanxi svachꞌcꞌolal Jehová dꞌa vin̈ icha dꞌa yalan̈taxo, ecꞌbꞌalto pax ix aj yacꞌan dꞌa vin̈ icha ay dꞌa vin̈ dꞌa yalan̈taxo. 11 Ix javi pax ebꞌ yucꞌtac vin̈ yilaꞌ, ebꞌ ix yanabꞌ vin̈, juntzan̈ ebꞌ yamigo vin̈ yedꞌ masanil ebꞌ anima ojtannac vin̈ dꞌa yalan̈taxo. Ix och val jun nivan vael yuj ebꞌ dꞌa spat vin̈. Ix yacꞌan snivanil scꞌol vin̈ ebꞌ. Ix yalan ebꞌ to ix cuspax ebꞌ yuj yaelal ix yacꞌcot Jehová dꞌa yibꞌan̈ vin̈. Ix yacꞌancan qꞌuen tumin ebꞌ yedꞌ junjun colcꞌabꞌ nabꞌa oro dꞌa vin̈.
12 Ix yacꞌ jantac svachꞌcꞌolal Dios dꞌa yibꞌan̈ vin̈aj Job chiꞌ, ecꞌbꞌalto nivan dꞌa yichan̈ tas ay dꞌa vin̈ dꞌa yalan̈tax chiꞌ. Ix qꞌuecꞌoch sbꞌisul nocꞌ scalnel vin̈ dꞌa 14 mil, 6 mil nocꞌ camello, mil par nocꞌ vacax smunlaji yedꞌ mil nocꞌ bꞌuru. 13 Ix aljixi ucvan̈ yuninal vin̈ yedꞌ oxvan̈ yisil. 14 A ix bꞌabꞌel, Jemima ix yacꞌ vin̈ sbꞌiej ix, axo ix schabꞌil Cesia ix sbꞌiej ix, axo ix yoxil, Keren-hapuc ix sbꞌiej ix.* 15 Malaj ebꞌ ix ix dꞌa yolyibꞌan̈qꞌuinal tic stzacꞌvan svachꞌil yilji icha yilji ebꞌ ix yisil vin̈aj Job chiꞌ. Ix acꞌji smacbꞌen ebꞌ ix icha yic ebꞌ vin̈ snulej yuj smam chiꞌ.