41
An̈ejaꞌ pax nocꞌ leviatán, ¿tocval syal a yaman nocꞌ yedꞌ qꞌuen anzuelo? ¿Tocval syal a tzecꞌan stiꞌ nocꞌ yedꞌ junoc chꞌan̈ chꞌan̈?*2 ¿Tom syal acꞌanecꞌ junoc chꞌan̈ chꞌan̈ dꞌa yol sn̈iꞌ nocꞌ, ma tzaqꞌuecꞌ junoc qꞌuen gancho dꞌa yalan̈ stiꞌ nocꞌ?
3 ¿Tom syal stevioch nocꞌ dꞌayach yic tzꞌocꞌ a cꞌol dꞌa nocꞌ? ¿Tom nanam syutej sbꞌa nocꞌ dꞌayach yic malaj tas tzutej nocꞌ?
4 ¿Tom syal acꞌan a trato yedꞌ nocꞌ yic tzꞌoch nocꞌ a checabꞌoc dꞌa masanil tiempo?
5 ¿Tom syal a tajni yedꞌ nocꞌ icha tzach tajni yedꞌ nocꞌ much? ¿Tom syal acꞌanoch schꞌan̈al nocꞌ yic stajni ebꞌ ix isil yedꞌ nocꞌ?
6 ¿Tom syal spojchajecꞌ schibꞌejal nocꞌ? ¿Tom syal scotac xicanbꞌat nocꞌ ebꞌ chon̈vajum?
7 ¿Tocval tzꞌecꞌ junoc jul-labꞌ dꞌa stzꞌumal nocꞌ uuj? ¿Tocval scꞌaxpaj qꞌuen arpón dꞌa sjolom nocꞌ uuj?
8 Tato tzacꞌlej a yaman nocꞌ, tzacꞌan oval yedꞌ nocꞌ, man̈ ol bꞌat satcꞌolal uuj tas tzach yutej nocꞌ, man̈xa bꞌaqꞌuin̈ ol a tzuntzej nocꞌ.
9 Yaln̈ej mach tzꞌilan nocꞌ leviatán chiꞌ, tzꞌel yip ebꞌ yuj xivelal.
10 Malaj junoc mach stecꞌbꞌej sbꞌa stzuntzan nocꞌ. Ocxom val in a in tic, ¿tocval ay junoc mach stecꞌbꞌej sbꞌa dꞌa vichan̈?
11 Malaj junoc mach acꞌjinac junoc tas dꞌayin, yuj chiꞌ malaj bꞌaj ay in bꞌoc, yujto vicn̈ej masanil tas.
12 Max vactej valan yuj yoc nocꞌ leviatán chiꞌ, yujto teꞌ ay yip, malaj tas stzacꞌvan icha yip nocꞌ chiꞌ.
13 Malaj mach syal yicꞌanel stzꞌumal nocꞌ, mato stecoch slanza ebꞌ dꞌa stzꞌumal nocꞌ chiꞌ, yujto a stzꞌumal nocꞌ chiꞌ icha qꞌuen smacul sn̈iꞌ scꞌol ebꞌ soldado yaji.
14 Malaj mach syal sjacan stiꞌ nocꞌ, yujto a qꞌuen ye nocꞌ yelxo te ay smay yilji qꞌueen.
15 A stzꞌumal yich spatic nocꞌ latzꞌanochi, te tzatz icha qꞌuen qꞌueen, lajan icha maclabꞌ jul-labꞌ.
16 Bꞌucꞌuqꞌui yaj stzꞌumal nocꞌ chiꞌ, man̈xa jabꞌoc icꞌ syal yecꞌ dꞌay.
17 Junn̈ej yaman̈ yaji, malaj mach syal sn̈icꞌchitani.
18 Ayic tzꞌadꞌisvi nocꞌ, lajan val icha yecꞌ lebꞌlon. Axo yol sat nocꞌ stziquiqui yilji icha sjavi cꞌu dꞌa qꞌuin̈ibꞌalil.
19 A dꞌa yol sn̈iꞌ nocꞌ tzꞌelta cꞌacꞌ, spucbꞌat icha namix cꞌacꞌ,
20 tzꞌelta tabꞌ, icha xobꞌal junoc chen van xej dꞌa scal teꞌ cꞌacꞌ.
21 A yedꞌ yicꞌal sn̈iꞌ nocꞌ schacbꞌi teꞌ tzacꞌacꞌ, tzꞌeltapax namix cꞌacꞌ dꞌa yol sn̈iꞌ nocꞌ.
22 A sjaj nocꞌ te ay yip. Masanil anima xiv dꞌa nocꞌ.
23 A schibꞌejal nocꞌ te tzatz, icha val qꞌuen hierro bꞌobꞌil dꞌa cal cꞌacꞌ.
24 A spixan nocꞌ te tzatz icha qꞌuen qꞌueen, tzatz icha qꞌuen chaꞌ.
25 Tato scot nocꞌ dꞌa ebꞌ anima, a ebꞌ te vinac yalani xiv ebꞌ dꞌa nocꞌ, sbꞌat ebꞌ elelal yuj xivelal chiꞌ.
26 Malaj tzꞌoch qꞌuen espada, qꞌuen lanza, ma jul-labꞌ yic syacꞌan oval ebꞌ anima yedꞌ nocꞌ.
27 A qꞌuen hierro icha teꞌ unin teꞌ yaj qꞌuen dꞌa nocꞌ, axo qꞌuen bronce icha te teꞌ cꞌaeltac yaj qꞌuen dꞌa nocꞌ.
28 A jul-labꞌ sjulchajoch dꞌa nocꞌ, max xivlaj jabꞌoc nocꞌ yuuj. A junoc qꞌuen qꞌueen sjulchajoch dꞌa nocꞌ icha yoch an̈ ac icha chiꞌ yoch qꞌuen dꞌa nocꞌ.
29 Tato sco jicoch junoc teꞌ nivan macꞌlabꞌ dꞌa nocꞌ, ichan̈ej co pajanoch junoc teꞌ aj dꞌa nocꞌ. Ayic scꞌan̈ stiꞌ jul-labꞌ sjavi dꞌa nocꞌ, ton̈ej tzꞌoch qꞌuelan nocꞌ.
30 Ayic sbꞌat n̈ern̈on nocꞌ dꞌa sat luum, jul tzꞌajcan yecꞌbꞌen bꞌaj tzꞌecꞌ nocꞌ chiꞌ, icha tzꞌaj yuj sjayil stiꞌ qꞌuen rastrillo.
31 Ayic tzꞌecꞌ nocꞌ dꞌa sjulal aꞌ mar, tzꞌibꞌxi sat aꞌ yuj nocꞌ, ichato xej aꞌ, icha xej nocꞌ mantecat dꞌa yol yedꞌtal.
32 Sac tzꞌajcan aꞌ mar bꞌaj tzꞌecꞌ nocꞌ chiꞌ, icha saquil xil jolom.
33 Malaj junocxo tas dꞌa sat lum tic syal slajbꞌan sbꞌa yedꞌ nocꞌ. A juntzan̈ nocꞌ nocꞌ chiꞌ, a in in bꞌonac nocꞌ, max xivlaj nocꞌ.
34 A nocꞌ sat yaj vuj dꞌa masanil nocꞌ nocꞌ ay smay. A nocꞌ ayoch reyal dꞌa masanil nocꞌ chium nocꞌ, xchi Jehová dꞌa vin̈aj Job chiꞌ.